Том 11 (XVI век, сочинения Ивана Грозного и Андрея Курбского)

Возведем мысленное око на восток[1067] и посмотрим разумным видением. Где Индея и Ефиопия? Где Египет и Ливия, и Александрия, страны великия и преславныя, многою верою ко Христу древле[1068] усвоенныя? Где Сирия, древле боголюбивая? Где Палестина, земля священная, от неяже Христос по плоти и вси пророцы, и апостоли? Где Евтропия, иже бе в премудрости правоверия многи? Где Констянтинъград преславный, онже бысть яко око вселенней благочестиемъ? Где новопросиявшия во благоверии Сербы и Болгары, и ихъ власти высокия, и грады преизобильныя? Не вси ли сия преславныя и преименитыя царства в прежних летах единодушно правую веру держаще? И ныне, грех деля многих, безбожными властели обладанны и врагом креста Христова в руце преданны, и от нихже верныя люди беспрестани прелыцаеми, и томими, и на различныя прелести от правоверия отводими, овы ласкании, и тщами славами прелестнаго мира сего, овы бедами и скорбми многими принуждаеми. И аще где обретутся народи православныя, крепце православие держаще, и от безбожныхъ тех властелей гонения горшаго и на поругания беспрестани претерпевают, яко им пригоже, мнит ми ся, живыми мученики ото всех православных нареченными быти. Понеже догматы благочестия невредно соблюдают и законом Христовым, яко светила, в мире сияют, живуще посреде рода строптива и развращена.

И паки обратим зритильное души к западным странамъ и посмотрим опасне мыслию. Где Рим державный, в немъже[1069] Петра апостола наместники, древние папы пожиша? Где Италия, от самых апостолъ благоверием украшенна? Где Испания славная, от апостола Павла благочестием насаженная? Где Медиолам, град многонародный, в немже Амбросий великий благочестием кормила управлял? Где Карфаген? Где Галаты внуренныя? Где Германия Великая? Где различныя языки, по западным странам живуще, в них бе ото апостолъ и от наместник апостолских Еуаггелия Христова смотрения проповедано и нарочитыми епископы по всем тем странам, яко многими звездами светлыми, украшенны были и многие лета единомыслием благоверия со восточными святыми пожиша, и сошедшеся на всех соборех единая мудръствоваша и единодушно со усердием противу мысленных и чювственных враговъ ополчашася? И бе тогда дивно было видети от самых край вселенныя, яко крылати летающе, ко единому месту збирающеся слова ради Божия и веры утвержения, ихже ревности по Бозе и долгота пути, ни беды шума морскаго, ни разбойническая лютости возможе одолети. Возрим днесь мыслене. Где сиа вся? Не все ли в различныя ереси разлияшася? И от толь великия любви и ревности по Бозе наипачи неверных непримирительныя враги праве мудръствующим обретаются?

Мы же, убогия, от древних родов мало и познаваемыя, во едином угле вселенныя живуще, и на последок века[1070] благодатию Христовою не от делъ признани, ни от добродетелей познани, но от неизмеримаго его благодатнаго человеколюбия призвани быхом въ его достояние, якоже бе ему обычай искони человеческому роду даром премногое милосердие простирати. И днесь в какую высоту достигохом? Книги, от Божия Параклита написанны, Ветхия и Новыя, своим языком имуще. Епископи по великим властем седяще, всяким преизобилием полны суще, в церквах мног мир имуще. И аще бы хотели учити священному учению, ни от когоже нигде возбраняеми. И вся земля наша Руская от края до края, яко пшеница чиста, верою Божиею обретается. Храми Божии на лице ея подобни частостию звездъ небесных водруженны. Множество монастырей создани, имже числа не вем — хто весть? в нихже бесчисленное множество преподобных мнихов водворяются. Царие и князи в православной вере от древних родов и поднесь от превышняго помазуются на правление суда и на заступление от врагов чювственныхъ. Со Еремием рещи милосердие Господне должно есть: «Земля наша наполнена веры Божия и преизобилует, якоже вода морская».[1071] Что воздадим Господеви, еже воздалъ намъ? Кто не подивится, и кто от радости не восплачет, и кто не возблагодарит несказанныя его и бесчисленныя милосердиа щедрот к нашему языку?

Возрим же с прилежанием и разумеем внятно, что мы творим противу великих даров человеколюбиваго Бога, крепце нам заповедающе о соблюдении заповедей своих, а хотяще нас сподобити царствия своего небеснаго. Мы же, нечювственнии и неблагодарнии, яко аспиды, затыкая ушы свои от святых[1072] словес его, и приклоняемся послушанием паче ко врагу своему, лстящему нас тщею[1073] славою мира сего и ведуще нас по пространному пути в погибель. Не возможе бо он, злоначальный, благодати ради Божия, в вере у нас никакова порока сотворити, и он иными лестьми начинает, древле учиненым чином смущение наводит, хотя испразнити апостолом реченное слово: «Хто в чем призван, в том и да пребывает».[1074] Зрим и зде прилежно, како сопротивныя злым советом его проходят.