Том 11 (XVI век, сочинения Ивана Грозного и Андрея Курбского)

Посланейцо твое, любовию помазанное, дошло до меня. Книгу и Герасимово житие и счет летом привезли же ко мне, и много челом бью на благы твоих. Да паметца обрелася в твоей грамотки запечатана, а написано в ней, яко Григорей рече Богослов называет тайным учеником Христовым Никодима.[1046] Ино аз вем то, что истинна. И инде об нищелюбии в слове рече о нем, якоже Никодим исполу Христа любил.[1047] И се по прилучею слова написа о нем Богослов, мнит ми ся, а не уничижая мужа. Блаженныя же мужи Иосиф[1048] и Никодим безмеръным похвалам достойны от Бога Отца, и от аггелъ удивленны, и от соборов верных возвеличенны, сподобивыися послужити во[1049] время спасенныя страсти живодательному агнецу Божию, заколенному за весь мир. И опрятающе тело мертво суще живоноснаго Исуса, ово пеленами обвивающе, ово столитренными араматами мажюще, и затвориша во гробе убиеннаго Господа плотию, всем сущим во гробех живот даровавша. Ихже сего ради многие от святых похвалами ублажиша, овы во словех торжественных, овы в канунех возпевша. Паче златы языком и усты похвалу слагающим глаголет: «Блажени, — рече, — руце Иосифа и Никодима, осязающе тело неприступнаго Бога, пред нимже стояще, херувими трепещут, и от лица славы его серафимы ужасаются, Иосиф же и Никодим со дерзновением приступают и всех живота плотию умершаго со креста снимают», и протчая. И инде той же: «Ученицы, — рече, — разбегошася страха ради июдейска, владыку и учителя единого оставивша, яко от убогих и от незнаменитых суще, паче же во пророцех лежащая и о них исполнися. Распаляют же ся верою потаенныя ученицы, и от благородия, и от светлости ради вину вземше, Иосиф дерзостно к Пилату приступает и вкупе с Никодимом пригвожденаго Господа со креста снимает, и погребению Христову служители бывают, не боящеся июдей, величества ради сана»,[1050] и прочая.

И аз, не тем противяся чюдным мужем, первое посланейцо послал к тебе — прочти его со вниманием — но противлюся лжесловесником, преобразующимся во истовыя учители, и пишет повесть сопротив еуаггельским словесем, и имена своя скрывше, да не обличенны будут, и подписуют их на святых имена, да удобно их писание приимется простыми и ненаученными. И о таковых издавна Павел богогласный пишет: «Блюдитеся, — рече, — да не погибнет простота ваша въ их лукавъстве».[1051] И инъ, иже почерп премудрость от животворящих персей, от ипостасныя Премудрости Божия: «Не всякому, — рече, — духу веруйте, но искушайте духи»,[1052] и прочая. А яз и паки вам воспамяну, аще вам и инаково некаково обретется. Хто стерпит таковаго супротивления апостолом? Петръ глаголетъ: «Емше Исуса»; а еуагглисты все вопиют: «Приведоша связанна Господа от Каияфы х Пилату во многих муках и поругании, да грехи связанное человечество разрешит и поруганныхъ и мучимых от Диявола избавит». А нового Еуаггелия повесть: «Корсур, рече, со многою честию и молениемъ пред Пилата приведе Исуса». Не дивно врагомъ нашим, искони бо им обычай межю чистыя пшеницы плевелы сеяти. Дивно православным, паче же искуснейшим в чинех, вместо пшеницы плевелы услажатися, а всегда имеюще пророческая словеса пред очима лежаща. «Словеса, рече, Господня, словеса чиста, сребро раждежно, искушенно земля, очищенно седморицею».[1053] И инде: «Сказали мне законопреступницы суесловие, а не яко закон твой, Господи».[1054]

Али не слышал еси, какову беду от таковых в Литовской земле церковь Божия приемлет, и како на апостолская словеса и на святых учение и уставы самыя християньския дети от врагов возверенны бысть? И от овчии кротости зверие обретошася, и стада верных нещадно расхищают и, апостолская словеса превращающи, развращенне толкуют, и на святых хулу возлагаютъ, паче же на Златауста клеветами ополчаются. И от книг руских емлючи словеса развращенныя, от Еремеи,[1055] попа болгарскаго сложены, и иных таковых, и на Златаустово имя подписано и на иных святыхъ, яко щиты себе носят, и из-за них на закон Христовъ ругании и хулами стреляют, и верных, тяжющихся с ними по неведению, аки за словеса святых удобне одолевают, яко безответных, и от истиннаго пути на прелесть свою возводят.