Том 11 (XVI век, сочинения Ивана Грозного и Андрея Курбского)

О, горе нам! Како не зрим прилежно мысленным своим оком древняго дракуна, врага нашего бодрово и никогдаже спящаво, и множайшими леты искуство злобы имущаго! Он бо древле праотцемъ завистию во едеме смерть сотвори, и роду их на безбожие и чародейства разумы преврати, и скотолепному и нечистому жительству научи. Он праведному Иеву внезапу все имение и дети погуби, и тело нещадно сокруши. Онъ во Египте против Моисея чародейцев воздвиже и чародействовати сотвори. Он противу пророческих ликов пророчествовати научи ложно, не именемъ Господнимъ, якоже при Амосе Азарию,[1056] сына Зороавля, и при Еремеи Ананию,[1057] и иных таковых, от ихъже напастей Божий пророкъ и живота своего отрицашеся.[1058] Он, лютый, богоборных жидов на самого Господа вооружи, творя их бутто законоревнителей. Он ото апостолскаго лика предателя Христу ученика сотвори. Он апостоломъ в проповеди многия беды и напасти наведе. Он прелютых царей-гонителей на Христову церковь воздвиже и нестерпимыя и горчайшая муки на верных умысли.

И видев церковь Господню ото множайших гонений не одолеваему и кровми апостолъ и мученикъ наипаче светлейшу явившая, и царей-гонителей без вести погибших и вместо их православныя возведенны, и боагочестие на лице всея земли повсюду растуще, — и он, злокозненый, иная умышляет: ото учителей християнских мужей востави, глаголющих развращенная, яков же бе Арий, и Макидоний, и Несторий,[1059] и иныя различныя злославныя еретики, и иже церковь Христову по различным временем и летом неистовне смущаше. Их же Господь седмочисленных полков богособранными святители тогда от стада паствъ своих отогна, и церковь свою догматы благочестия светлейши солнъца украси и неприступну, светлости ради, врагом мысленымъ и чувственнымъ содела.

И недругъ нашъ древний иная умышляет. И начальников наших, и пастырей подходит, и некоих от нихъ гордостем и жительству растленному научает, и соль земли[1060] в буйство претваряет. Яко им бе должно негиблющими брашны и пребывающими всех питати и свет миру быти, и грехъ ради людских спротивная явися: вместо света — тма и смущение образ показася. И оставя твердыя и священныя словеса, бабскими баснями и растленными словесы, и отнюдь не сведетельными от священных буков, услажатися увещевая их. Апостольская же и пророческая словеса, и святыхъ преподобных великих учителей, точию кожами красными и златом со драгоценнымъ камением и бисеры украсив, и в казнах за твердыми заклепы положи, и тщеславующеся ими, и цены слагающе, — «толики и толики», — сказуют приходящим.

Аще ли лучится от тех священных словес прочитаемыи коим быти, и мы, смеющеся меж собя, — а не глаголю, ругающеся, — глаголем: «Ефремовы, рече, словеса[1061] подобны горестию хрену обретаются». И противу иных божественных книг изветы иныя лукавыя умышляем: «Первыя, рече, роды по тех жительство имели, а нам тако не вмещается». И от сего явно не на пользу, но на тщеславие себе держим ихъ, якоже и делом показася. И аще бы прочитали их со охотою, и внимали лежащему разуму в них со усердием, не бы никогдаже хотели услажатися чюждописанными и несогласными повестьми, ниже бы на законопреступление и слабость когда укланялися. И ими же нас Лютор и ученики его потязуют: «Се и се, ваши святые учители ложно и несогласно написали». А учители того и не слыхали. Написал неведомо и неслыханная, и покрыв себе, да не слышан будет, а подписал на святыхъ имя, и удобно творя къ прелыцению слышащих Писания своя развращенная. И о подобных таковых Господъ пророком рече: «Не послах ихъ, а они течаху, и никогдаже глаголах имъ, а они именем моим пророчествоваху».[1062] Тако и ныне враги наши[1063] имяны святыхъ действуют: иже во святых, рече, слово Иоанна Златоустаго, или иных святых слово[1064] о том и о томъ, а Иван и иные святые не слыхали таковых.

Благовременно днесь рещи аггелов глас, къ Громову Сыну реченной: «Горе, горе живущим на мори и на земли! Яко разрешен бысть Сотона от темницы своея на прелыцение ихъ, имея в себе ярость велию».[1065] Воистину разрешен есть по всему уже, и излиял ярость свою на верныя и изливает, и прельстил страны многия и прелыцает, по вселенней отступлению от Бога языки научает. И слыша Павла к солуняном[1066] вещающа въ 2.