Том 11 (XVI век, сочинения Ивана Грозного и Андрея Курбского)

Державные, призванные и на власть от Бога поставленны, да судом праведным подовластных разсудят и в кротости и в милости державу управят. И грех ради наших вместо кротости сверепее зверей кровоядцовъ обретаются, яко ни от естества подобново пощадети попустиша, неслыханые смерти и муки на доброхотных своих умыслиша. О нерадении же державы и кривине суда, и о несытстве граблений чюжих имений ни изрещи риторскими языки сея днешния беды возможно.

Посмотрим же и на священнический чин, в каких обретается — не яко их осужаемъ, не буди то, но беду свою оплакуем, — не токмо душа своя за паству Христову полагают, но и расхищают, вем, — яко бедно ми глаголати — не токмо разхищаютъ, но и учители расхитителем бывают, начало и образ всякому законупреступлению собою полагают. Не глаголютъ пред цари, не стыдяся, о свидении Господни, но паче потаковники бывают. Не вдовиц и сирот заступают, ни напаствованных и бедных избавляют, ни пленников от пленения искупуют, но села себе устрояют, и великия храмы поставляют, и богатествы многими кипят, и корыстьми, яко благочестием, ся[1075] украшают. Где убо хто возпрети царю или властелем о законопреступленных, и запрети благовременно и безвременно? Где Илия, о Нафееве крови возревновавый,[1076] и ста царю в лице обличением? Где Елисей, посрамивый царя Иилева израилева сына Ахавова?[1077] Где велики пророкъ, обличающи неправедных царей? Где Амбросий Медиаламский, смиривый великаго царя Феодосия?[1078] Где златословесный Иван, со зельным запрещением обличив царицу[1079] златолюбивую? Где патриарховъ лики и боговидных святителей и множества преподобных, ревнующе по Бозе, и нестыдно обличающих неправедных царей и властелей в различных законопреступных делех, исполняюще и блюдуще слово Спасителя Христа, глаголющее: «Аще кто постыдится мене и моих словес в роде сем прелюбодейнем и грешнем, Сынъ Человеческий постыдится его пред аггелы Божиими».[1080] Кто ныне, не стыдяся, словеса еуаггельская глаголеть, и кто по братии души своя полагают?[1081] Аз не вем хто. Но якоже пожару люту возгоревшуся на лици земли всея нашея, и премножество домовъ зрим от пламени бедных напастей искореневаеми. И хто, текше, от таковых отъимет? И хто угасит? И хто братию от таковых и толь лютых бедъ избавитъ? Никтоже! Воистинну ни заступающаго, ни помогающаго несть, разве Господа. Но кождо своим богатеством промышляет и, обнявши его, простерты лежат, и ко властем ласкающеся всячески и примиряющеся, да свое сохранятъ и к тем еще множайшее приобрящут. И аще хто где явится по Бозе ревнующи правостию слова, и за то от держав властей, яко злодеи, осужение приемлют, и по многих томлении горце безообразным смертем предаются. Такоже и иноковъ, отрекшихся волею всех красных мира сего, и проклявше себе страшными клятвами пред Богомъ и святыми его аггелы, подходитъ и увещеваетъ вселукавый змий, яко, забыв обеты своя, многими богатествы подавлятися и безмерных имений, многих сел, властелем быти, и от тех себе великие богатства собирати, и в твердых хранилищах их затворяти и, наполнився имъ, отрыгати от сих во иныя, яко язычником бе обычай, ихже древле Псаломник окаевает, и тем хвалитися не стыдящеся пред всеми, яко велику некую часть благочестия исправив. Многие же мятежи и крови, от тех именей бываемыя, и межуусобныя брани, и клятвам преступление хто может изглаголати? Росты же и мшелоимства июдейские, и презрение убогих братей, и гладом и мразом, и нуждами всяческими мучащихся, — хто может сказати? И иная же злая и неисповедимая дела, ихже писанию предати невозможно: совесть их да ведает.

Воинской же чинъ ныне худейши строевъ обретеся, яко многим не имети не токмо коней, къ бранем уготовленныхъ, или оружий ратных, но и дневныя пищи. Ихже недостатки и убожества, и бед их смущения всяко словество превзыде.

Купецкий же чинъ и земледелецъ все днесь узрим, како стражут, безмерными данми продаваеми и от немилостивых приставов влачими и без милосердия биеми, — и, овы дани вземше, ины взимающе, о иных посылающе, и иныя умышляюще.

Бедно видение и умилен позоръ! Таковых ради неистерпимых мукъ овым без вести бегуном ото отечества быти, овым любезныя дети своя, исчадия чрева своего, в вечныя работы продаваеми; и овым своими руками смерти себе умышляим — удавлению и быстринам речным и иным таковым себе предавати — ото многия горести душам помрачатися естественому их бытству.

Зри Павла к солуняном глаголюща.[1082] Видиши ли, яко древний змий разрешен от темницы своея и како ратует завистными всеми козньми своими на церкви Божия, како вселенную смяте и множество языков отступлению от Христова закона научает, и научи, и в различныя их ереси разлиявъ? И како ныне в нашей земли злим советом своим горняя доле постави, чины чиномъ злыя обедники сотвори, и братиям единоверным вместо хлеба единым от других снедатися учини, умышляет вся злая беспрестани, и научает человеков в сопротивных к Богу обращатися?