Том 14 (Конец XVI - начало XVII века, подступы к решительным переменам)

Бысть убо, глаголю, во время, како убо бысть и в которое время, егда убо благочестивая и православная хрестиянская вера в Велицей Росии паче солнца сияющи и своя светозарная луча во всю вселенную испущающе, якоже глаголетъ пророкъ, отъ моря и до моря и от рекъ до конец вселенные[59] слава ея простирашеся, и благочестивыхъ и крестоносныхъ християнских царей Руския державы скипетродержавъство велелепъне цветуще, и благородный царский корень многими леты непременне влечашеся отъ великого Августа кесаря римского,[60] обладающего всею вселенною, якоже история поведаетъ, и до самого святаг сего царьствия богохранимыя державы великого Росиского государства благовернаго и христолюбиваго царя и великого князя Федора Ивановича всеа Русии. Той же убо благочестивый царь и великий князь Федор Ивановичь всеа Русии сынъ бе преименитого государя и храброго царя и великого князя Ивана Васильевича всеа Русии, царьствовавшего в Велицей Росии 49 летъ и месяцъ 9 на престоле приснопамятнаго отца своего великого князя Василья Ивановича всеа Русии и деда своего великого князя Ивана Василевича всеа Русии. Той же убо благочестивый царь и великий князь Иванъ Васильевичъ всеа Русии бе разумомъ и мудростию украшен и въ храборскихъ победахъ изряденъ и к бранному ополчению зело искусенъ и во всехъ царских исправлениих достохвален явися, великия израдныя победы показа и многия подвиги по благочестии совершив. Царьским своимъ бодроопасным правлениемъ и многою премудростию не токмо всехъ сущих богохранимыя державы своея в страх и в трепет вложи, но вся окрестныя страны неверныхъ языкъ, слышаще царьское имя его, с великою боязнию трепетаху. Прочая же его царьского исправления добродетели слово инде изъявитъ.

Тогда же убо благоверный царь и великий князь Иванъ Василиевичь всеа Русии преиде въ пятьдесят третьее лето возраста своего, случися ему велия болезнь, в нейже проувидевъ свое к Богу отшествие, восприятъ великий ангелъский образ и наречен бысть во иноцех Иона, и по семъ скоре остави земное царьство, ко Господу отиде лета 7092-го марта въ 19 день; и по преставлении своемъ вручивъ превеликий скифетръ Росийскаго самодержавного царствия и свой великий царьский престол предастъ благородному сыну своему благочестивому и христолюбивому царю и великому князю Федору Ивановичю всеа Русии. Царь же и великий князь Федор Ивановичь всеа Русии по преставлении приснопамятнаго отца своего царя и великого князя Ивана Василевича всеа Русии Божиим изволением и отческим благословением приемник бывает царского престола всея Великия Росии. Возведенъ же бысть и венчанъ царским венцем преосвященным митрополитом всеа Русии кир Дионисиемъ,[61] иже в та лета содержаша кормило великия и кафолическия церкви Пречистые Богородицы чеснаго и славного ея Успения и содержаше престол великих чюдотворцовъ Петра и Алексея и Ионы внутрь царьствующаго града Москвы. Бе же тогда благочестивый царь и великий князь Федор Ивановичь всеа Русии яко летом 27.

Сей убо благочестивый самодержецъ праведный и досточюдный и крестоносный царь и великий князь Федоръ Ивановичь всеа Русии древнимъ бо царемъ благочестивымъ равнославенъ, нынешним же красота и светлость, будущимъ же сладчайшая повесть и слуха благое насладждения, не токмо единыя Росийския богохранимыя державы, но всея подсолнечныя пречестнейши быти явися. Еще бо от царьския своея юности исполненъ сый духовныя мудрости. Аще бо и безчисленными изрядными и многоценными красными века сего обнимаем бе, ни о едином же их прилежне внимая, ниже о сих когда веселя. Точию о памяти Божией и о всехъ добродетелехъ попечение имы, и не еже бо памятовати ему житейских сихъ многоценныхъ и красных и к симъ вседушно пригвоздитися, но жалая ото всехъ Содетеля и Промысленника вечных благих насладитися и Небесного Царьствия сподобитися. Кто убо доволенъ по достоянию явится сказати яже благочестиваго сего царя достохвалное добродетелемъ исправление? Или кто дерзнет коснутися повесть составити о святемъ его житии? Аще бы и превысочайшего Росийского царствия честный скифетръ содержаше, но Богу повсегда умъ свой вперяше и душевное око бодренно и неусыпно храняше и сердечную веру выну благими делы исполняше. Тело же убо свое повсегда удручаше церковными пении и дневными правилы и всенощными бдении и воздержанием и постом, душу же свою царскую умащая поучением божественных глагол и вниманием, и благихъ нъравъ удобрение украшая прилежно.