Том 14 (Конец XVI - начало XVII века, подступы к решительным переменам)

По сихъ же патриархъ Иеремия восписует ко всем триемъ патриархомъ, во Александрею и во Антиохию и во Иерусалимъ, возвещая, еже како бывъ в Велицей Росии и тамо патриарха постави на престолъ Руския митрополия, да воспишут к нему согласная и соединительная писания за своими руками, еже быти в Велицей Росии патриаршескому престолу во веки и к тому не требовати поставления от Констянътинополския церкви патриарха, но своими ему митрополиты в Велицей Росии и поставлятися. Они же, прочет писание, вскоре препослаша, яко достойно быти патриарху в Велицей Росии, въ такове благочестии сияюще, и митрополиты и архиепископы и епискупы коегожедо их пределов православных вси к писаниемъ патриаршеским руки свои приложиша. Сие же согласное написание триех патриарховъ с протчими своими митрополиты и архиепискупы и епискупы святейший патриархъ Иеремия вскоре посылаетъ в Великую Росию к благочестивому царю и великому князю Федору Ивановичю всеа Русии, моля его и глаголя: «Приими, о великий самодержавецъ и крестоносный царю, истинныя православныя веры теплый рачителю и непреклонный крепки поборниче, сие от нас твоему благочестивому царствию духовное дароприношение, еже от нас ныне принесеся в славу Святыя и Живоначалныя Троицы и в честь Пресвятей Владычицы нашея Богородицы и великихъ чюдотворцовъ руских и в достоинство похвал твоего самодержавного благочестия, да будетъ престол патрияршеский в твоей богохранимой державе во веки. Видев бо преблаги Богъ нашъ толикое твое достохвалное рачение и веру несуменну, юже имать царское твое благородие о исправлении всего православного благочестия, и подастъ ти дар возжъделененъ по желанию твоему, устроивъ престол великого сана патриаршества нашимъ смирениемъ. И да будет сие соединителное написание о Святем Дусе брату и сослужебнику нашего смирения, вашему же о Святемъ Дусе отцу и богомолцу Иеву патриарху на утвержение святителству его и по нем сущимъ патриархомъ всем во веки».

Слышав же сия благочестиваго царя добродетелное исправление и во всехъ странахъ неверных языкъ, июдеи же и еллины, скифи же и латыня и аравития и бесермени, не точию прости, но и сами царюющгш, во всю бо землю, по пророку, изыде слава о нем[69] и в конце вселенныя его благочестие простирающеся — мнози убо оставляюще свою злоскверную прелесть и ихъ злочестивую и богомерскую веру проклинающе и со мнозем студом отревающе, ко благочестивому его царствию богохранимыя державы с великимъ тщанием приходяще и со мноземъ молениемъ и ревностию правую нашу християнскую веру прияти желающе и во Христа веровати непрелестна хотяще. Он же, великий самодержец и благочестивый царь, во всемъ, яко чадолюбивый отецъ, являшеся и своея прещедрыя милости всем неоскудную руку помощи простирая, овемъ убо великая села и многая стяжания во одержание подавая, овем же веледарными даянии презелне обогащая.

В лето же благочестиваго его царствия управляя и строя под нимъ богохранимую державу шурин его, слуга и конюшей бояринъ Борисъ Федоровичъ Годунов. Бе же убо той Борисъ Федоровичь зело предизрядною мудростию украшен и саном паче всехъ и благимъ разумом превозходя, и пречестным его правителством благочестивая царская держава в мире и в тишине велелепней цветуще; и многая тщания показа по благочестии и великъ подвиг совершивъ о исправлении богохранимыя царския державы, яко и самому благочестивому самодержцу царю и великому князю Федору Ивановичю всеа Русии дивитися превысокой его мудрости и храбрости, и мужеству. И не точию во своем царстве Руския державы изыде слух, но и по всемъ странамъ неверных язык проиде слава о нем, якоже никто же ин обретеся в та лета во всем царстве Руския державы подобен ему храбростию и разумомъ и верою, яже к Богу. И от многихъ стран языческих царей приходяще по славе к царю и великому князю Федору Ивановичю всеа Русии з дары многоценными, рабское поклонение и достойную честь царьскому его величеству воздающе и тому изрядному правителю царские богохранимыя его державы, пресветлой красоте лица его и премудрости разуму его чюдящеся; и возвращеся во своя страны, со удивлением превеликую добродетель поведающе.

Сей же изрядный правитель Борис Федоровичъ своим бодроопасным правительством и прилежным попечением по царскому изволению многи грады камены созда и в них превеликие храмы в славословие Божие возгради и многие обители устрои. И самый царьствующи богоспасаемы град Москву, яко некую невесту, преизрядною лепотою украси: многия убо в нем прекрасные церкви камены созда и великие полаты устрои, яко и зрение их великому удивлению достойна; и стены градные окресть всея Москвы превелики камены созда и величества ради и красоты проименова его Царьград;[70] внутрь же его и полаты купеческии созда во упокоение и снабдение торжникомъ; и ина многа хвалам достойна в Руском государстве устроити. Протчая же добродетели пространное инде слово изъявитъ, мы же к повести слово подвигнем и на предлежащее возвратимся.