Том 14 (Конец XVI - начало XVII века, подступы к решительным переменам)

Ныне же паки слово помянути хощетъ и другая его царская достохвалная исправления, да не предана будетъ забытию словеси, иже памяти достойна. Еже быша въ лета приснопамятного отца его благочестиваго царя и великого князя Ивана Васильевича всеа Русии нечестивыи болгари, иже близ Русии пребывающе, живуще по реце глаголемей Волзе, во мнозех летех приходяще на пределы Русийскаго его государства[62] и многия пакости деюще православъным християном, брани составляюще и пленующе непрестанно. По вся лета воеваху и православнаго християнства кровь, яко речьные быстрины, изливашеся. Мнози же православнии християне отъ нечестивыхъ побиени быша, ови же в плен отведени и многия и различные муки претерпеша.

Царь же и великий князь Иванъ Васильевичь всеа Русии в лето 7061-го, видевъ нечестивых богомерское озлобление, подвижеся на нечестивыя, поиде во мнозе силе и град ихъ великий Казань взят, пределы их Казанския вся поплени и многое множество нечестивыхъ болгар погуби, оставших же от плена всехъ под свою под царскую десницу покори. Не по мнозех летех по сем бранномъ ополчении Божиими судбами царь и великий князь Иванъ Васильевичь всеа Русии ко Господу отиде, по нем же достохвалный сынъ его благочестивый сей царь и великий князь Федор Ивановичь всеа Русии царствия скифетръ приемлет, якоже и преже явлено бысть. Нечестивии же болгари, гордостию бесовскою возношахуся, паки на благочестие востают и пришедше на пределы Росийскаго государства, якоже и преже, пленующе намнозе.

Видевъ же сия преблагий человеколюбивый Богъ нашъ и не остави до конца погибнути наследию христоименитого звания, вложи в сердце благочестивому царю и великому князю Федору Ивановичю всеа Русии, яко да православное християнство от нечестивых насилования исторгнетъ. Благочестивый же царь, истинный рачитель благочестия, слышавъ сия, божественною ревностию разжегся, повеле изрядному своему правителю Борису Федоровичю послати многое свое воинство на нечестивые болгары. Достохвалный же правитель Борис Федоровичь вскоре повеление благочестиваго царя исполняетъ, собираетъ многое христолюбивое воинство и воеводы им поставляетъ и в велицей силе, изоруживъ, на болгары посылаетъ. Воинство же благочестиваго царя пришедше в пределы Болгарския области и тамо, намнозе пленующе, воеваше; и Божиим пособиемъ нечестивыи побежени быша и мнози от них острием меча падоша. Они же, видевше христолюбиваго воинства храброе ополчение и невозвратное устремление и свою погибель пред очима зряще, вскоре ко благочестивому царю рабское покорение принесше. Царь же и великий князь Федор Ивановичь всеа Русии повеле многия грады своя в пределех ихъ поставити,[63] и оттуду же царьским его благостройнымъ правителством вся страны Болгарския в велицем покорении и в рабском послушании под его царскою десницею и доселе пребываютъ. Не точию же сия нечестивыя болгары под свою царскую десницу покори и послушни во веки сотвори, но и Сибирскую страну всю и живущих въ ней злочестивых сыроядцевъ себе рабы сотвори и всею землею их облада, и многия от них своя царские уроки и дани по вся лета приимая, и тамо нечистыя и бесовския службы вся разоривъ и грады многия возгради[64] и православными християны вся насеи, божественные церкви созда и благочестие велие царьскимъ его правлением устроися, даже и доныне непременно пребываютъ.

К сим же и прочая царския добродетели да неумолчныи будутъ: зело бо бе нищелюбивъ, вдовица и сироты милуяй, паче же священнический и иноческий чинъ велми почитая и пространною милостынею повсегда удовляя. И толику ревность по благочестии показа: не токмо во всей державе богохранимаго его царствия, но и во всю вселенную непремолчная слава благочестия его, яко солнечныя луча, простирашеся, и толма милостив бе, яко не точию въ своей богохранимой державе пространную милостыню требующим подавая, но и в далныя страны земля, яко нескудная река, повсегда изливашеся. Глаголю же, во Святую гору Афоня и во Александрею и в Ливию и в Великую Антиохию и во вся святая места, да иже и до самого Божия града Иерусалима, пространная милостыня по вся лета от него посылашеся.