Том 14 (Конец XVI - начало XVII века, подступы к решительным переменам)

Изыде же слух о его благочестивомъ добродетелномъ исправлении и до самого царствующаго Констянтинаграда и вниде во уши святейшаго патриарха кир Иеремея. Той же убо патриархъ Иеремей, слышавъ сицева благоверного царя Федора Ивановича всеа Русии добродетелное исправление и великое благочестие, вскоре подщася преитти толики долгий и скорбный путь, прииде въ Великую Росию, жалая видети великия християнские соборные Церкви изрядное украшение и благовернаго царя Федора Ивановича великое благочестие. Якоже и древле южеская царица Сивилла приходяще от востокъ во Иерусалим, хотя видети премудрость Соломанову,[65] такоже и сей светейший патриархъ Иеремей, велиею ревностию о благочестии распалаяся, отложивъ многолетную старость и забывъ великий труд, вскоре ко благочестивому царю и великому князю Федору Ивановичю всеа Русии приходить, яко некий добрый купецъ, несый с собою не злата богатства, ниже драгих камыков честности, но самое неистощимое духовное сокровище благодати безценного бисера Христа или, яко некий пречестный даръ, великого патриаршества сан. Престол же тогда Великия Руския митрополия содержашеся пресвященным кир Иевом митрополитом всеа Русии.

Царь же и великий князь Федор Ивановичь всеа Русии с великою любовию и неизреченною радостию патриарха Иеремея приемлетъ и достойную честь святителству его воздаетъ, от него же миръ и благословение приемлет и своими царскими многими потребами его по вся дни удоволяя. Посем же благочестивый царь и великий князь Федор Ивановичь всеа Русии советъ свой царской с патриархомъ Иеремеемъ полагаетъ, да поставитъ в Велицей Росии въ его богохранимой державе патриарха по правилом святых апостол и святых отецъ. Патриархъ же, слышав советъ благочестиваго царя, зело удивися царскому великому благочестия желанию и нача помышляти в себе, како устроити на престоле Руския митрополии патриарха, поминая предания святыхъ апостол и заповеди святых отецъ, яко четырем токмо быти патриархомъ: въ Велицей Антиохии и во Иерусалиме и въ Констянтинеграде и во Александреи; пятому быти папе въ Риме. Известно бо, веды, яко римский папа многими леты благочестия отлучися и християнские истинные веры отпаде, ово же помышляя, яко ныне царьствующий Констянтинъград неверными обладаем и благочестивая вера ими ненавидима бываетъ, и многие брани на благочестие повсюду устрояютъ; в Велицей же Росии видевъ толикое православие, многими леты цветуще, яко солнце на тверди небесней сияше, наипаче же пречестнейши сего узре и самую Матери Божия Слова церковь, неизреченною лепотою украшену, и в ней многия священныя вещи и всякия святыни в различных и многообразных потребах устрояеми, иже в похвалу и славословие вседержителю Богу и Пречистой Богородице и всемъ святым; и видевъ пречестные и златокованныя раки, в нихже яко некое многоценное сокровище лежаше многочюдесныя и целбоносныя мощи великих чюдотворцов, рускихъ митрополитовъ Петра и Алексея и Ионы,[66] многими леты ничим невредимы; и благочестиваго царя и великого князя Федора Ивановича всеа Русии теплое рачителство и веру к Богу и великое прилежание и многое попечение, еже имея о исправлении всего благочестиваго народа православного християнства, зело удивися о семъ и хвалу воздав всемогущему Богу и упование положи на его превеликих щедрот милость, и поставляетъ в Велице Росии патриарха на Рускую митрополию бывшаго тогда митрополита Иова в лето 7097-го, нарицая его быти четвертому патриарху. В место же папино константянополский патриархъ оттуду начатъ нарицатися.

Царь же о семъ зело возрадовася и его превеликою честию потчте и многоценными великими дары одаривъ, не по мнозе времяни с великою честию отпустивъ ево во Царьград.[67] И егда убо патриархъ Иеремей достиже царского града, собирает все свое христоименитое стадо православнаго христианства и с велицем удивлением начат поведати, елико виде въ Велицей Росии благочестивыя християнския церкви греческаго закона пречюдное украшение и царское изрядное благочестие и всех православных християн божественных догмат исправление; к сему же и многоценныя дары показуя, иже приятъ от руки благочестиваго християнского царя и великого князя Федора Ивановича всеа Русии; по сих же возвещает всемъ и патриаршеское иже в Велицей Росии поставление.

Они же, слышевше таковое благочестие, въ Велицей Росии просиявшее, нача со слезами благодарити всемилостиваго Бога, глаголя: «Щедрый и милостивый Боже! Вся строя на ползу всемъ верующимъ в тебе, единаго истинного Бога, яко утвердилъ еси толикое благочестие в последнем нашемъ роде в земли благочестивые Руския державы! Такоже, премилостивый Боже, сотвори с нами древнюю свою милость и не предаждь в поношение врагомъ достояния твоего! Ты бо еси Богъ нашъ, мы же — людие твои и овца пажити твоея, и сохрани, Владыко, церковъ и люди своя невреждены от всехъ наветъ вражиихъ, да не рекутъ супротивнии наши: „Где есть Богъ их?”[68] Ты бо еси Богъ нашъ, творяй чюдеса, единъ».