Том 14 (Конец XVI - начало XVII века, подступы к решительным переменам)

Он же, благочестивый самодержецъ, вскоре повеле Иванъград от нечестивых истребити и всяких еллинъскихъ богомерских гнусовъ повеле очистити, и божественные церкви в нем поставляти устрояетъ, и своего царского синклита некоего от бояръ в снабдения града воеводством поставляетъ. Во грады же Копорью и Яму такоже посылаше избранныхъ воевод своих и с ними многое воинство, да и тамо же такоже грады от нечестивых очистятъ. Самъ же благочестивый царь не по мнозех днехъ возвратися во свое царское достояние с великою и славною победою и прииде во свое отечество, в Великий Новгород. Преосвященный же митрополитъ Великого Новаграда Александръ и весь освященный соборъ с честными и животворящими кресты и с чюдотворными иконами и всенародное множество изыдоша во сретение ему, хвалу Богу возсылающе и благодарные песни о победе его воспевающе: «Пособивый Господи кроткому Давыду победити иноплеменники, сице и сему благочестивому царю нашему победу на сопротивных и одоление дарова». Благочестивый же царь и великий князь Федор Ивановичь всеа Русии немногое время тамо пребыв и свое христолюбивое воинство овехъ убо отпусти кождо восвояси, овехъ же остави в Велицем Новеграде, самъ же поиде во свой великий царствующий град Москву.

Слышавъ же сия святейший Иев патриархъ, яко благочестивый царь к царьствующему граду уже приближашеся, собираетъ весь освещенный вселенский соборъ, и приемлютъ честные и животворящие кресты и чюдотворныя иконы вседержителя Бога и того Пренепорочныя Матери Владычицы нашея Богородицы и великихъ чюдотворцовъ и изыдоша во сретение благочестиваго царя, молебная совершающе. Егда же прииде благочестивый царь в царьствующий град Москву, и вниде в соборную церковъ Пречистые Богородицы чеснаго и славнаго ея Успения и припадает ко образу Пречистые Богородицы, иже нарицаетца Владимерская, и умиления глаголы с плачем к ней испущающе: «О Пречистая Госпоже Дево Богородице Владычице, крепкая стена и заступница царьствию нашему и всему нашему воинству непобедимый воевода! Тобою, Владычице, супротивнии наши побежаютъся и брани повсюду разсыпаютца! Ты, Владычице, ныне не престай молящи Сына своего Христа, Бога нашего, яко да устроит царьствие моея державы в мире и в тишине и возвратит от неверных древняя грады наследия нашего, яко да и тамо прославитца в них по достоинству пресвятое и поклоняемое имя его со Отцем и со Святым Духомъ во веки, аминь».

По сем же благочестивый царь и великий князь Федор Ивановичь всеа Русии от патриарха Иева благословение приемлетъ, возвещая ему, како Божиею помощию и Пречистые Богородицы и великих чюдотворцов молитвами и заступлением невернии языцы победишася и отческие грады паки к нему возвратишася. Патриархъ же, слышав сия ото устъ благочестиваго царя, зело возрадовася со всемъ священным соборомъ и хвалу воздавъ Всемогущему Премилостивому Богу, победное славословиеприносяще, глаголя: «Кто Богъ велий яко Богъ нашъ? Ты еси Богъ творяй чюдесная единъ; дивенъ еси, Господи, и вся дела твоя истинна и правии путии твои,[75] яко строиши вся на ползу по своему смотрению к нашему спасению. Благодарим же и о семъ великое человеколюбие твоего благоутробия, яко предал еси в руце благочестивому царю нашему неверныя языки незнающих тебе, истиннаго Бога нашего, сих же изгнал еси и верными грады ихъ населил еси, въ нихъ же непрестанно славится твое пресвятое имя, яко благословен еси во веки, аминь». По сих же патриархъ глаголя благочестивому царю: «О великий государь боговенчанный царь и великий князь Федор Иванович всеа Русии! Воистинну еси ты равен явися православному первому во благочестии просиявшему царю Констянтину и прародителю своему великому князю Владимеру, просветившему Рускую землю святым крещением. Они же убо кождо во свое время идолы поправше и благочестие восприяша, ты же ныне, великий самодержце и истинный рачителю благочестия, не единех идол сокрушая, но и служащих имъ до конца истребляя. Твоим же неуклоннымъ к Богу желанием и велиею верою вся благая тебе даровашеся: которые грады православных самодержавънаго вашего царьствия во дни преже тебе в Велицей Росии царствовавшихъ неверными от благочестия быша отторжены и многими леты быша неверными обладаеми, ныне же твоимъ самодержавнымъ правлением вся православными населяеми. Иде же беша ельлинская капища, тамо ныне божественные церкви; иде же быша скверныя службы, тамо ныне безкровныя жертвы; иде же быша бесовския козни, тамо ныне богодухновенныя песни; иде же дьявол величашеся, тамо ныне Христосъ прославляетца; иде же ельлини водворястася, тамо ныне твое царское имя во мнозе славе обношашеся». Царь же и великий князь Федор Ивановичь всеа Русии исполни моление свое, отиде в царския своя полаты.