Том 14 (Конец XVI - начало XVII века, подступы к решительным переменам)

Слышавше благочестивый царь и великий князь Федор Иванович всеа Русии, яко безбожный крымский царь со многою силою идетъ на его царское наследие, оскорбися зело, паче же на молитву подвигся к Богу, моляся сице, глаголя: «Суди, Господи, обидящим мя и возбрани борющимся со мною, приими оружие и щит и стани в помощъ мою[79] и сотвори с нами милость человеколюбия твоего, якоже и древъле при Езекии царе Израилеве,[80] егда на Иерусалимъ Сенахиримъ царь асириский хвалящеся, сице глаголя, в силе велицей хотя разорити достояние твое, к сему же и хулу изрицая на имя твое святое, и послалъ еси ангела своего, и уби во едину нощь от полка асирийска 185 000. Такоже и ныне посли, Владыко, мне, рабу твоему, в помощь ангела своего и не попусти нечестиваго сего варвара и сущих с нимъ, гордостию бесящихся, хвалящихся разорити достояние твое, отечество мое, да не рекутъ сопротивни наши: „Где есть Богъ ихъ?”, но разумеют воистинну, яко ты, избавитель, с нами еси». Егда же крымский царь к царствующему граду начатъ приближатися, тогда благочестивый царь повеле изрядному правителю и своему царскому шурину, достохвалному воеводе, прежереченному боярину Борису Федоровичю вскоре собрати все свое христолюбивое воинство, прилучившееся тогда в царской его державе, и к бранному ополчению повелеваетъ вскоре уготовлятися (занеже в то время много воинство послано бысть въ Великий Новъград против ополчения нечестиваго воинства короля свийского, злаго советника крымского оного царя, прочее же христолюбивое воинство благочестиваго царя в то время по своим домомъ пребывающе и нашествие ратных не ведуще).

Бе же бо сий Борис Федоровичь премудростию украшен и к бранному ополчению зело искусен и во всехъ воинских исправлениихъ непобедимый воевода явися. Въскоре собираетъ чиноначалники и тысущники и сотники и все многое людное воинство Росийского царствия, прилучившеся тогда в царствующемъ граде Москве, да готови будутъ всопротивъ ополчения востающихъ паганых варвар. Таже и устроити повеле в царствующем граде окрестъ всехъ далнихъ посадов град древянъ и велики пушки и пищали и по стенам и стрелницам градным повелеваетъ уготовляти. Близ же царствующего града, яко поприща два или мало вдалее, повеле изрядный правитель Борис Федоровичь поставити град, обоз нарицаемый,[81] иже некоею премудростию на колесницах устроенъ и к бранному ополчению зело угоденъ. И тамо повеле совокупити царское христолюбивое воинство и великие пушки и многие бранные хитрости тамо повелел устроити. Внутрь же града того повеле поставити церковь во имя преподобнаго Сергия чюдотворца, иже от полотна устроена, якоже и древняя израителская скиния,[82] в сохранение и спасение града от нашествия поганыхъ варвар.

Благоверный же царь и великий князь Федор Ивановичь всеа Русии, велию веру и молитву простирая ко Всемогущему Богу и Пречистой Богородице и великих чюдотворцовъ, и прииде в память его преславное и великое чюдо Пречистые Богородицы, еже чюдотворною иконою ея неисчетное человеколюбие показав Премилостивый Богъ нашъ молением Пречистые своея Матери прародителю его, благоверному князю Дмитрею Ивановичю, иже на Дону изрядную победу на нечестиваго Мамая дарова. И вскоре свой царской советъ отцу своему и богомолцу Иеву патриарху изъявляетъ, да повелит устроити Пречистой Богородице соборное молебное пение, и чюдотворную ея икону въземши и со животъворящими кресты и с прочими чюдными иконами повеле окрестъ града обходити; и отнести повелевают в прежереченный град обоз и в тамо сущимъ храме преподобнаго чюдотворца Сергия поставити повелеваетъ, да и тамо Владычице покажетъ милость своего заступления и спасетъ град нашъ, якоже и преже, от нахожения иноплеменых варвар.