Том 14 (Конец XVI - начало XVII века, подступы к решительным переменам)

Безбожный же царь в той день к вечеру прииде в царское село, нарицаемое Воробьево. Бе же то Воробьево близ царьствующего града яко поприща три, тамо же бе горы велики, зело превысоки. Оттуду же узре окаянный царь красоту и величества всего царьствующего града и великие каменоградные стены и златом покровенные и пречюдно украшенныя божественныя церкви и царския великия досточюдные двоекровные и трикровные полаты; паче же слышавъ великий тресновенный гром и неизреченный гласовом звук, иже бысть от великого во граде и изо обитель пушечного стреляния. Видевъ же окоянный царь благочестивых сопротивное ополчение, зело убоявъся, и ужас велий нападе нань, и вскоре возвратися со всем своим злочестивым воинством и побеже с велицем страхом, ниже от пути в нощъ мало почити хотяще. И на бегство устремишася,[86] тыл къ Русе показающе, и все, еже в плене взятое окрестъ царствующего града, все на пути оставляюще. Гоними убо невидими быша гневом Божиимъ и заступлениемъ великия и непостыдныя нашея предстателницы Пречистые Богородицы и молитвами великих чюдотворцов руских вскоре вси посрамишася; яко и самый окоянного оного царя возокъ на пути в реце обретоша рустии полцы оставленъ, и многия вещи на пути повержены лежаще: се же убо все окоянныи они мечюще, себе облегчающе суетнаго ради скорого бегъства своего.

Наутрия же бранного ополчения великий изрядный воевода Борис Федоровичь, видевъ нечестиваго оного царя отшествие и все его съ нимъ богомерского воинства возвращения и уведевъ известно, яко помощию Божиею и Пречистые Богородицы и великих чюдотворцовъ руских заступлением отидоша противнии посрамлении и на бегъство вси устремишася, посылает вскоре в царствующий град к благочестивому самодержцу, возвещая ему нечестиваго царя и сущих с ним возвращение. Слышавъ же великий самодержецъ, яко беззаконный царь со всемъ своим богомерским воинством посрамлении оттойдоша вскоре, приходит в соборню церковъ Пречистые Богородицы с великою радостию, благодарныя песни Богови возсылающе и того Пренепорочной Матери, Владычице нашей Богородицы, неложной заступницы, истиной християнской предстателнице, хвалу благодарение преносяще, молебная совершающе. Возвещаетъ же о семъ отцу своему богомолцу Иеву патриарху и всему освященному собору; они же, слышавше сия, руце на небо воздевше, благодарно Богови вопияху, со слезами глаголюще: «Десница твоя, Господи, прославись в крепости, десная твоя рука, Господи, сокруши враги, и множеством славы твоея стерль еси супостаты наша».[87]

Благочестивый же царь и великий князь Федор Ивановичь всеа Русии падаетъ пред иконою Пречистые Богородицы, иже нарицается Владимерская, и, от многия радости источники слез от очию своею изливая, глаголаще: «Благодарю тя, о Пресвятая Госпоже Дево, Владычице Богородице, християнская непостыдная заступница, яко великое свое милосердие днесь показала еси на нас! Якоже и древле самый царствующий Констянтинград избавила еси предстателнымъ заступлением от нахождения прегордаго перскаго воеводы Хоздроя[88] или якоже и древле, Владычице, сохранила еси жребий достояния твоего, сей нашъ царствующий град в нахождение злосквернаго царя Темир-Аксака пришествием пречистые иконы твоея, тако и ныне, Владычице, явила еси на нас превеликие своея милости пучину и щедроты и человеколюбия бездну преславно и паче надежди избавила еси насъ и град нашъ от нахождения окоянного варвара, сего злочестиваго варвара царя и сущих с ним. И всегда, Владычице, неотступно буди, спасая стадо свое ото всякого обстояния и невредны сохраняя нас и все отечество наше Росиския державы, яко да непрестанно величаем заступление твое, Владычице!» По семъ же великий самодержецъ приходитъ к целбоносным и многочюдесным мощемъ великихъ чюдотворцовъ руских Петра и Алексея и Ионы, такоже припадая, моляся прилежно, благодарение приносяще: «О велицы святителие и заступницы и хранителие царствию нашему и о нас к Богу неусыпни молитвеницы! Вашим предстателством ныне царьствующий град нашъ сохранен и невредимъ бысть от нашествия окоянного сего злочестиваго царя; и что имам воздати вам, велицыи чюдотворцы, противу толикому вашему милосердию и заступлению?» Великий же достохвалный воевода Борис Федоровичь, пришед в царствующий град и благочестивому царю и великому князю Федору Ивановичю всеа Русии достойное поклоняние сотворивъ, возвещает ему вся по ряду, како Божиею милостию и Пречистые Богородицы заступлением и великих чюдотворцовъ молением и его царскимъ счастиемъ окаянный царь крымский устрашися, побеже и все свое богомерзское воинъство с собою отведе; к сему же возвещаетъ похваляя и христолюбиваго царского его воинства супротив ратных храброе ополчение.