Том 14 (Конец XVI - начало XVII века, подступы к решительным переменам)

Великий же самодержец, слышав сия, зело возрадовася и от радости многи слезы испусти и к Богу велие благодарение изрече, яко не браннымъ ополчениемъ, ниже острием меча супротивнии победишася, но Божиим неизреченным человеколюбиемъ и Пречистые Богородицы заступлениемъ нечестивии постыдешася и во своя с великимъ студом возвратишася. Царь же великий князь Федоръ Иванович всеа Русии благодарив Бога и Пречистую Богородицу и сотвори брак великъ в царских палатах своих и трапезу многоядну устрои, на ней же самъ зело веселящеся, о избавлении града от безбожных варвар неизреченною радостию радовашеся, изрядного жь своего правителя Бориса Федоровича зело почтивъ и всему своему царьскому сигклиту и всему христолюбивому воинству велие учрежьжение творяше на трапезе в полатах своих. Тогда жь благочестивый самодержец по совершении царьского стола своего приемлет от своея царьския выя златокованную чепъ, еяже ношаше в почесть великого своего самодержавънаго царьствия, и возлагает на выю достохвалному своему воеводе Борису Федоровичю, достойную честь победе его воздая и симъ паки на немъ прообразуя царского своего достояния по себе восприятия и всего превеликого царьствия Русийскаго скифетродержателства правление, еже последи Божиимъ смотрениемъ не по мнозех летех царьское его на семъ пророчество совершися. Бояром же своим и всему христолюбивому воинству такоже свое царское великое милосердие и жалованья неоскудно ко всем простирая.

По прехожении же единого лета, или мало вяще, по преславномъ том чюдеси Пречистые Богородицы, благочестивый самодержецъ повеле устроити монастырь честен близ царьствующего града Москвы на том месте, идеже прежереченный град обоз стояше, и в немъ созда церковь камену во имя Пречистые Богородицы, честныя и славныя ея Похвалы, и всякими изрядными лепотами пречюдно украси ю; и подобие пречюдные иконы Богородицы Донския написати повеле, златомъ и камением драгим украсив; и в тамо сущем храме поставляют в память преславнаго того чюдеси, еже како человеколюбивый Богъ показав нам преславную победу на супротивных, пречюдною иконою Матере своея спасение и избавление и граду нашему дарова; яко да незабвенныи пребудут намъ великия щедроты Бога нашего и Пречистые его Матере Владычицы нашея помощь и заступление. Во обители же той благочестивый царь повеле игумна устроити и братию совокупив и многая стяжания потребных имъ предаде; еже и доныне обитель та честная Пречистые Богородицы нарицаетца Донская; оттоле же по вся лета Пречистой Богородицы празнество совершаетца воспоминания бывшего ея тогда чюдеси.

Мы же паки возвратимся на предлежащее слово, к повести подвигнемъ разумы вперяя, благочестиваго царя и великого князя Федора Ивановича всеа Русии по достоинству изрядныя добродетели похваляя. Бе же убо сей крестоносный царь зело благочестив и милостив ко всемъ, кроток и незлобивъ, милосердъ, нищелюбив и странноприимецъ, наипаче же вдовица и сироты щадя и всех скорбных милуя и напастным помогая, повинныхъ же смерти на живот свобожая, и во всей своей богохранимой державе Росийского царьствия правду любя, злобы ненавидя, любовъ имея, лукавство жь разрушая и межусобныя брани, востающая во всем царьствии его, своим царьским смиренномудриемъ украшая, и вся пределы богохранимаго царьствия своего в мире и въ тишине и во всяцем благоденствии, и утвержая, и вся окрестныя страны неверных языкъ, востающая на благочестивую християнскую веру и на его богохранимую царь-скую державу, не бранным ополчениемъ, ниже остриемъ меча побеждая, но всенощным бдением и непрестанными к Богу молитвами сих до конца низлагая. Сице всесилный Богъ своими божественными пречистыми судбами и многими чюдесными знаменми повсюду прославляя свое трисвятое имя Отца и Сына и Святаго Духа, наипаче же снабдевая свое святое избранное достояние, великия Росийския державы благочестиваго царя нашего великого князя Федора Ивановича всеа Русии царьствие, въ мире сохраняя, в немже утвержая непоколебимо истинное благочестие и от всяческих еретических смущений невредимо сохраняя, и от находящих врагъ всячески защищая, и от всяких бед милосердно избавля(я), и на сопротивныя победы даруя.

Царьствующу же благочестивому царю и великому князю Федору Ивновичю всеа Русии в Велицей Росии на престоле приснопамятного отца своего летъ 13 и месяцъ 9, имея же и благозаконную супругу свою благоверную царицу и великую княгиню Ирину Федоровну всеа Русии по всему благими нравы подобну себе, бе же добродетелию и верою к Богу друг друга преспевая. И во всемъ своемъ царьскомъ сожитии иместа едину блаженную летарасль царьского своего благочестиваго корене, благородную дщерь благоверную царевну и великую княжну Феодосью,[89] и та еще юностию, яко летом четырмя или мало вящеи, ко Господу отиде, яко некий прекрасный цвет вскоре увядше отпаде, или яко некий пречестный бисер в скалке скрыйся; своимъ же благочестивым родителемъ великую скорбь и сетование сотвори и их царьскому сигклиту и всему народу православного християнства печаль немалу нанесе.