Том 14 (Конец XVI - начало XVII века, подступы к решительным переменам)

И вскоре царский благий совет въ дело произходит. Патриархъ же, совершивъ молебная пения, и чюдную ту икону Пречистые Богородицы епископу суздалскому Иеву прияти повелеваетъ:[83] «Приими, епископе, владыки нашего Бога пространное вместилище! Приими Матере всехъ Царя и спасение всего мира! Приими хранилище и печаль граду нашему и заступницу непостыдную всех насъ! Изыди против нечестивых сил варваръ! Сия нам будет стена нерушима и страж крепокъ граду нашему и воевода непобедим христолюбивому воинству». Сам же благочестивый царь, припадая пред иконою Царицыною, из глубины сердца стенание неумолчно и слезы ото очию непрестанныя, яко быстрины речныя, испущающе, молящеся, сице глаголюще: «О Владычице госпоже Дево Богородице! Не остави жребия достояния твоего и не предаждь, Владычице, в росхищение иноплеменныхъ сего винограда, его же насади крепкая десница Сына твоего! Иди, божественный киоте пречеснейши всеа твари, и стани в помощъ нашу! Иди, преславная Владычице, и спаси нас! Иди, небранное оружие, и возрази поганых яростное стремление и сотвори с нами милость твоего заступления и спаси град нашъ и всю страну християнскую от нахождения иноплеменъных сихъ варвар! Якоже и древле избавила еси сей нашъ град от нашествия окаянного царя Темир-Аксака[84] преславнымъ пришествиемъ честнаго и чюдотворного образа твоего, сице и ныне, Владычице, подщися, подвигнися, ускори, умоли сына своего Христа, Бога нашего, да спасетъ нас, не имущих помощи развее тебе, Владычица! Ты нам помози, на тебя ся надеемъ и тобою ся хвалимъ, яко ты еси утвержение наше и, на тя надеющеся, во веки не постыдимъся».

Архиепископъ же приим чюдную ту икону Пречистые Богородицы, со кресты и со инеми чюдотворными иконами, изыде отъ царствующаго града в пятокъ и стены градные окрестъ обхожаше и молебная совершающе. По сем же приносят чюдную ту икону Пречистые Богородицы в преждереченный град обозъ и поставляютъ во церкви чюдотворца Сергия, идеже царское христолюбивое воинство пребываше, и тамо непрестаныя молитвы къ Богородицы возсылают. Назаутрия же отшествия Царицыны чюдные иконы, в день суботный, благочестивый царь и великий князь Федор Ивановичь всеа Русии отпусти против нечестивых варвар изрядного своего правителя Бориса Федоровича и с нимъ послал многих бояр своего царского синклита и многа воинства; самъ же паче на молитву подвигся и всехъ сущих своих укрепляя и на молитву подвизая. И скоро быти пременению от злых возвещает, яко не боятися ополчения беззаконного оного царя. Якоже убо и древле великий боговидец Моисей избранное израилтеское воинство изооруживъ и отпусти на нечестиваго Аммалика,[85] самъ же, на гору возшед, молитвы и моления возношаше всехъ Содетелю и Владыце о спасении всех людех моляшеся; такоже сей великий самодержецъ непрестанныя к Богу молитвы и моления возсылая, да в мире и в тишине сохранитъ богохранимую державу царствия его непоколебимую, и о избавлении града от нашествия неверных пророчествуя, глаголя: «Аще ли убо сей окоянный царь и со тщанием прииде на мое достояние, но помощию Божиею и заступлением Пречистые Богородицы и великихъ чюдотворцов со срамом паки и с велицемъ студом во своя возвратится»; еже и збыстьсяпо словеси его.

Великий же и изрядный воевода Борис Федоровичь и со всею сущею с ним ратию изыде от царствующего града яко поприщь пять и ста на реце, на Котле, тако зомово, ожидая оного окоянного царя пришествие. И своим бодроопасным разсужениемъ самъ окрестъ воинства непрестанно обходитъ и полки изрядно устрояетъ и к бранному ополчению всехъ поощряетъ и не отпадати надежда повелеваетъ и на подвиг всехъ укрепляет. И егда беззаконный царь достиже близ царствующего града Москвы, тогда убо и он изрядный благочестиваго царя достохвалный воевода Борис Федоровичь от полка своего посылаетъ избранных воин противъ нечестиваго оного царя.

Бе же убо тогда лето 7099-го месяца июля въ 4 день, в день неделный; полцы рустии брань поставиша с нечестивыми немалу и весь день той на розличных местех окрестъ царствующего града Москвы бьяхуся непрестанно. Сам же изрядный правитель, непобедимый воин Борис Федоровичь с протчими воинскими силами и со многим огнебранным оружиемъ в той день стояща в прежереченнем граде обозе, идеже икона Пречистые Богородицы, молящеся непрестанно и помощи на сопротивных просяще. Весь же день той и нощь со всех стен градных из великиихъ огнедыхающихъ пушекъ непрестанно стреляху и изо всехъ обителей, иже близ царьствующего града Москвы, такоже непрестанно стреляюще и многих от поганых побивающе.