Том 14 (Конец XVI - начало XVII века, подступы к решительным переменам)

Потом же отложи страх весь во сердцы своем, повеле темъ своимъ преждеименованнымъ злымъ советником безо всякого опасения и страха сотворити: проклятыя руце свои прострети,[112] аки агньца незлобива, яве ножемъ заклати, и повеле на всех путех, иже пристоятъ от града Углеча ко царьствующему граду Москве, стражие крепки поставити и страхомъ великимъ и грозою запретити, да никтоже пропущенъ будетъ и известитъ царю о семъ. Те же проклятыя послушаху его сладостне, хотяще маловременную сию славу и честь от него получити, и между собою злый той советъ крепко утвердивше, и, часъ приспевше, повелеша той преждереченной Василисе, да повелитъ кормилице его, сиречь маме,[113] свести долу ис хором его, — ведяще бо окаяннии, яко обычай ему есть исходити на играние детское.[114] И сотвориста та окаянная, якоже речеся: яко змия ко змии пошептавше, советоваста убо вкупе, аки на птенца голубина, хотяста безвестно погубити; они же злыя кровоядцы готовы быша на пролитие тоя неповинныя крови, и наскочиша на нь, аки волцы немилостивыя, и сотвориша то прелютое дело: среди двора его единъ от них емъ его за выю и пререза гортань ему.[115]

Мати же его, благочестивая царица Мария, во внутренних своих храмех седящи, ничтоже того сведущи, токмо внезапу услыша и узре то сотворенное дело злое, борзостно стече долу и узре сына своего, аки агньца незлобива, заклана и мертва на земли лежаща, и кровь его лиющуся, и воскрича от всея силы своея, и воздохну горко из глубины сердца своего, и забы срама и чина женьска, и начатъ в перси своя бити и гласомъ велиимъ вопити и горестныя глаголы испущати. Нецыи же начаша в колокола бити, граждане же, мужие и жены, и до малых отрочатъ, услышавше напрасенъ шумъ и звонъ у двора ея, вси збегошася скорымъ шествием на звонъ той[116] и на вопль ея — и узреша сего благовернаго царевича князя Димитрия заклана, такожде возопивша вси великимъ гласом из глубины сердечныя и рекоша: «Горе, горе, увы, увы намъ, государя своего великого оставшимъ!», и в перси своя биюще, и другъ другу глаголюще: «Ныне вси надежди нашея остахом!» И бысть во граде Углече вопль и плачь и рыдание зело велико.

Те же окаяннии губители, иже кровопролитие сотворше, то нечеловеческое дело злое, вси разбегошася неправымъ путем: кождо камо устремишася, — не ведяще окаяннии, где бежати, ослепи бо ихъ праведная и неповинная кровь незлобиваго агньца, непорочныя души, — и яты быша от гражданъ и побиени,[117] и тако зле скверныя душы своя испровергоша, еще бо и в семъ веце злую смерть восприяша, во оном же праведный Судия весть, иже воздастъ комуждо по деломъ ихъ.

Побегоша же вестницы к болярину Борису со злою тою вестию и, прибегше, сказаша, яко желание совершися. Он же, слышав сия, и радостенъ бывъ, аки сущаго врага и супостата избывъ, обаче же трепетомъ и боязнию одержашеся во сердцы своемъ и не ведый, что будетъ, яко злое дело сотворися. И повеле царю и великому князю Феодору Иоанновичю сказати ложно, а не истинно, яко брату его самому себе заклавъшу во игрании детьстемъ.[118] И слышавъ царь сия, и оскорбе печалию великою зело о лишении брата своего, паче же — о нелепей той смерти, мняше бо, яко вправду сотворися тако, и воздохнувъ из глубины сердца своего, и велия слезы изо очию своею испущаше, и такоже многожалостныя глаголы испусти. И потомъ восхоте самъ двигнутися и ити ко граду Углечю, да видитъ брата своего тело своима очима и погребетъ его честно, якоже подобаетъ. Той же Борис, бояся восстания людскаго и царьскаго воззрения, и самъ себе зазирая во своей совести, да не будетъ ятъ во своихъ сетехъ и да не зле живота своего гонзнет; обаче и тако и не избы, ни ухитри никакимъ своимъ умышлениемъ, ниже многимъ своим разумом, ни смысломъ, занеже праведнаго кровь вопити будетъ к Богу, аки Авелева на Каина,[119] токмо донележе не приидетъ ему часъ. Сей тако творя и умышляя во уме своемъ, терпеливъ бо есть Богъ и многомилостивъ ко всемъ согрешающимъ: много и на зло попущаетъ и не даетъ отмщения, ожидая всегда на обращение и на покаяние или некое добродетелство поминая, якоже глаголетъ великий Феодоритъ:[120] «Терпит бо и лихаго Человеколюбецъ Богъ, поминая его добродетелствия». Егда же прииде на него от Бога посланный гневъ праведничи ради крови, тогда ничтоже успе, такоже и живота своего нелепо гонзну, и родъ его весь погибе и искоренися,[121] якоже впреди о семъ скажется. Мы же ныне належащую повесть да известуемъ.