Том 14 (Конец XVI - начало XVII века, подступы к решительным переменам)

И еще не довле тому Борису таковое дело в насыщение, еже убити неповиннаго сего незлобиваго отрока, благовернаго царевича князя Димитрия, и желание свое получи, повеле и матерь его, благоверную царицу Марию, нуждею и великимъ бесчестиемъ во иноческий образъ облещи,[132] и наречеся во инокиняхъ Марфа. И повеле ю заточити в место бедно и горко, едва человеки наследимо, — в Белоезерских пределех негде малъ монастыръ, нарицаемъ Николае Чюдотворецъ на Выксе,[133] — и пристави к ней злых и немилостивых стражей и приставниковъ, и повеле ю стрещи крепостию великою зело, и запрети, да отнюдъ входу и исходу не быти к ней никому кроме тех злых приставъниковъ его, и пищу ей повеле во урокъ дати, аки сущей осужденице, и ины многи досады и поношения творя, ихже нелеть есть и писати. И пребысть в таковом заточении и тесноте пятьнадесять летъ и болше, донележе и самъ той Борисъ искоренися.[134] И еще ему и се недоволно бысть: самъ на ся третицею гневъ Божий воздвиже и гневомъ боряся, душу свою погубляя и сердцемъ своимъ яряся напрасно, повеле от гражданъ углечанъ многихъ избранных людей, иже поборашя по благоверномъ царевиче князе Димитрие, домы ихъ и имения взяти, самех со женами и чады ихъ в далныя грады расточити.[135] И бысть во граде Углече вторый плачь и рыдание велико, зря кийждо свое разлучение от сродникъ и от ближних и лишение имения.

И в лета седмь тысящь сто шестое, генваря в седмый день, во осмое же лето по убиении благовернаго царевича князя Димитрия Иоанновича, случися Божиими судбами, имиже самъ весть, благоверному царю и великому князю Феодору Иоанновичю всеа Росии от земнаго царствия к Небесному преселитися, — и приемлетъ престолъ Российскаго государства прежьдереченный той Борисъ Годуновъ,[136] убийца царевича князя Димитрия Иоанновича. И начатъ царствовати и вся земная добре и разумне строити, токмо едино нелепо дело являя: и нача многи неповинныя крови проливати, а иных в заточение отсылати. И царствуя летъ шесть и полъ,[137] — не судя, рещи, не царьствуя, но всегда болезнуя, аки Каинъ по убиении братнемъ, совестию внутрь обличаемъ[138] и аки копиемъ прободаемъ. От новаго бо сего Богомъ возлюбленнаго венечника благовернаго царевича князя Димитрия слыша, яко начаша знамения и чюдеса бывати, и тая во сердцы своем, аки в некоей храмине светилника затворяя и под спудомъ его поставляя,[139] не воспомянувъ слова Господня, яко «не можетъ градъ укрытися, верху горы стоя»,[140] и всемъ возвещающимъ запрещаше смертми, да не яве будутъ знамения и чюдеса его. И не восхоте покаяния пред нимъ положити, ниже прощения от него получити, и последи за таковую гордость зле гневомъ Божиимъ побежденъ бысть, такожде и родъ его весь погибаетъ и искореневается, — какоже и коимъ образомъ, вкратце скажемъ.

Хотя Богъ прославити на небесехъ и на земли неповинное убиение создания своего и кровь его мстити, и всемъ творящим таковая образъ дати, да накажутся сицевых не творити.

Въ первое-на-десять лето по убиении своемъ явися благоверный царевичь князь Димитрий некоему от калугеръ, тамо живущих во граде Углече, именемъ Тихону, и сказа ему сице: «Некто назовется у васъ именемъ моимъ царевымъ, сыномъ отца моего, благовернаго царя и великого князя Иоанна Василиевича всеа Росии, и сести имат на престоле царьстемъ Российскаго государьства, и того властолюбца и губителя моего Бориса со престола свержетъ и царьства лишитъ, и родъ его весь погубит; и той самъ ложный нарекователь не много имать царьствовати, но зле живота своего гонзнет и убиенъ будетъ; и инии же воследовати имутъ ему, и тако же нелепо скончаются». И последи вся збышася сия по глаголом богоизбраннаго сего венценосца.

Бысть же сице грехъ ради нашихъ и всяких неправдъ, яже к Богу, сихъ ради насъ наказующу, да быхомъ творили заповеди его и отвратилися от всех злобъ своихъ, и попусти на насъ за наше беззаконие аки новаго Улияна Законопреступника[141] или, истиннейшее рещи, на отмщение неповинныя сея праведнича крови. Бяше бо некто от града Галича, от обычна рода, зовомъ Юшка Отрепьевъ,[142] облечеся во иноческий образъ и нареченъ бысть Григорий, и ста во диаконский чинъ, и паки по диаволю действу забы иноческаго обещания обетъ и сверже с себе иноческий образъ, и шедъ в Литву, назвася тамо сыном благовернаго царя и великаго князя Иоанна Васильевича всеа Росии, преждереченнымъ царевичемъ княземъ Димитриемъ,[143] егоже достоверно той преждереченный Борисъ убилъ, и всемъ то ведомо и знаемо есть. И умысли сей розстрига хитростне и коварне зело, яко избавленъ бысть и сохраненъ от того своего раба Бориса и убежа яко от своего отечества, из Русския земли. Король же литовский и мнози велможи его яша лжи его веру и мняше, яко сущий царевъ сынъ князъ Димитрий, и даде ему честь велию, якоже подобаетъ, и по томъ злата и сребра немало, да соберетъ и люди многи и идетъ ратию ко своему отечеству, к царьствующему граду Москве, и мститъ яко своему врагу и губителю преждепоминаемому Борису; и бысть тако.