Том 14 (Конец XVI - начало XVII века, подступы к решительным переменам)

И вложи имъ Богъ благий советъ в сердца, еже взяти мощи новаго сего страстотерпца, благовернаго царевича князя Димитрия Иоанновича, от града Углеча и принести в царьствующий градъ Москву,[164] на славу и хвалу отечеству его и на утвержение граду Москве от нахождения иноплеменных, и на обличение техъ многих лжехристовъ;[165] и сотворися тако. По повелению ихъ и совету посланъ бысть преосвященный Филаретъ, митрополитъ Ростовский и Ярославский,[166] иже последи благодатию Святаго Духа и самъ патриархъ бысть во всей Росии,[167] и с ним боляре, и архиепископы, и епископы, и многъ чинъ освященный.[168] И егда приидоша во градъ Углечь и внидоша во церковь, идеже лежитъ тело новаго сего страдалца, и открыша гробъ его, и в той часъ благоуха от него воня благовония, яко от священных араматъ. И обретоша мощи его целы и нетленны, яко днесь положены, токмо мала часть взята бысть от руки перста его, свойствено бо есть земли своя сродная взяти; такожде и одеяния его вся цела и нетленна, и срачица его, аки виссомъ,[169] кровию очервлена, в нейже убиенъ и положен бысть.[170] В той же часъ начаша велия чюдеса быти, и мнози различными болезньми исцелеша, якоже сказують.

И тако взяша мощи его со многою честию и благоговеинствомъ и идоша ко царьствующему граду Москве. И егда принесенымъ бывшимъ мощем его близъ самого царьствующаго града Москвы, тогда благочестивый царь Василий слыша и возрадовася радостию великою зело, яко при державе его прослави Богъ угодника своего, и изыде на сретение его со всемъ своимъ царьскимъ сигклитомъ, и святейший Ермогенъ патриархъ со всемъ освященнымъ соборомъ, и с материю его, благоверною царицею инокою Марфою, и со множествомъ народа, с честными иконами и свещами и кандилы,и сретоша его со многою честию, и прияша и с радостию. И повеле царь и патриархъ нести внутрь самого града Москвы в соборную церковь Небесных силъ воеводы Архистратига Михаила,[171] еже есть зрится и ныне близ двора царева; и повеле царь уготовати в том же храме Архистратига Михаила и украсити ковчегъ; патриарху же вся узаконеная над мощми праведнаго отпевшу, и повеле царь мощи святаго ту вложити и покрыти багры царьскими и окрестъ свещи и кандилы поставити.

И егда принесены быша честныя мощи, тогда в тыя дни и паки многи чюдеса сотворишася, и различными болезньми мнози исцелеша, яко мнози сему самовидцы быша. И паки повеле царь праздньство светло сотворити[172] и составити песней торжество на славу и хвалу дающему благодать Богу и на память праведному сему новому венценосцу, благоверному царевичю князю Димитрию. Принесены же быша мощи его от града Углеча во царьствующий градъ Москву в лето 7114 году июня въ 3 день, на память святаго мученика Лукиана,[173] а по убиении его в 15 лето.

А се по преложному. В той же день. Убиение благовернаго царевича князя Димитрия, Углечского и Московскаго и всеа Росии новаго чюдотворца

Сей благоверный царевичь, князь Димитрий Иоанновичь, родися от благочестиваго корене, царя и великого князя Иоанна Васильевича всеа Росии. И царю убо Иоанну Васильевичю доволна лета держащу скипетръ Российскаго государьства и от жития сего в вечную жизнь преставльшуся, сему же сыну его царевичю князю Димитрию младу сущу оставшуся, от рождения своего полутора года; и по действу диаволю, зависти ради и властолюбия, повелениемъ некоторого сигклита ихъ царьскаго, зовомого Бориса Годунова, убиенъ бысть во уделномъ своемъ граде Углече, в лета 7099-го году, маия въ 15 день, на память преподобнаго отца нашего Пахомия Великаго, а от рождества своего въ 9-е лето, — закланъ бысть ножемъ и погребенъ бысть в том же во уделномъ своемъ граде Углече, во храме боголепнаго Преображения Господа нашего Иисуса Христа. И тако тою злою неподобною смертию скончася и взыде ко Христу, радуяся, приимъ с мученики радование и со ангелы ликование. И по убиении его в 15 лето повелениемъ и советомъ благочестиваго царя и великого князя Василия и киръ[174] Ермогена патриарха принесены быша мощи его от града Углеча во царьствующий град Москву, целы и нетленны, в лета 7114-го году, июня въ 3 день, на память святаго мученика Лукиана, и положены быша в соборной церкве Архистратига Михаила, яже и ныне зрится близъ двора царева. И егда принесенымъ бывшимъ мощемъ, тогда в тыя дни различными недуги мнози исцелеша о Христе Иисусе, Господе нашемъ, емуже слава со Отцемъ и со Святымъ Духом ныне и присно и во веки вековъ. Аминь.

Лета 7114-го, июня въ 3 день