Том 14 (Конец XVI - начало XVII века, подступы к решительным переменам)

Принесены к Москве мощи святаго благовернаго царевича Димитрия с Углеча. И поставиша мощи его во церкви Архистратига Божияго служителя Архангела Михаила на маломъ столе посреде церкве, и патриархъ Ермогенъ нача пети погребалная, и пеша погребалная, и ископаша могилу, где положенъ бысть царь Борисъ, в пределе у Иоанна, списателя Лествицы.[175] И в то время начаша по государеву повелению сещи гробъ камененъ, в чемъ положити мощи святаго благовернаго царевича Димитрия, и соделаша гробъ камененъ, и понесоша во церковь, и той гробъ стал короток. И царь Василий и патриархъ Ермогенъ о томъ сташа скорбети и поносиша подмастерия Василия, сиречь брань воздвигнуша на него, и повелеша высещи вторый гробъ камененъ по таковой же мере, что снята мера со благовернаго царевича Димитрия, — и той каменный гробъ сталъ велми длинен, и царь Василей и патриархъ Ермоген в велицей скорби сташа и сняша меру с царевича Димитрия, измериша сами. И благословилъ патриархъ Ермогенъ своею рукою — и той третий гробъ ста четвероуголенъ, а могила, которую ископаша благоверному царевичю Димитрию, погребсти мощи его, в то же время сама о себе засыпашеся. И видеша, яко чюдо велие, царь Василий и патриархъ Ермоген испусти велия слезы, и начаша пети молебная, и поставиша гробъ с мощми святаго благовернаго царевича Димитрия во церкви Архангела Михаила у праваго столпа; и бысть велия чюдеса.

Чюдо 1. Того же месеца, наутрие, въ 4 день, нача пети литоргию Божественую, и помолишася слепая жена именем Агафия, — бысть одержима слепотою 20 летъ, — и молитвами святаго благовернаго царевича Димитрия прозре в томъ часе, и бысть здрава. И возвестиша сие чюдо царю Василию, и царь Василий наипаче вопроси самъ тоя жены, и поведа та жена истинну, яко прозрела молитвами святаго благовернаго царевича Димитрия.

Чюдо 2. Поведа диаконъ именемъ Григорий предстоящымъ гробу святаго, котории приставлени ко гробу царевича Димитрия, и протопопу, и всему Архангелскому собору: болеша у него нога полгода, и жилы скорчило; и услыша, яко исцеления подаваетъ святый благоверный царевичь Димитрий с верою приходящимъ к нему, и притекъ ко гробу его и нача молитися, дабы Божиею милостию и молитвами святаго благовернаго царевича Димитрия исцелела у него нога, — и в той часъ молитвами святаго благовернаго царевича Димитрия исцелела у него нога.

Чюдо третие. Некий человекъ именемъ Аверкий, прозвище Богданъ,[176] поведа о исцелении святаго благовернаго царевича Димитрия: болеша у него, Аверкия, очи 15 летъ, отнюдъ не виде света, и приидоша помолитися во церковь Архангела Михаила, и от множества народа не возмогоша от тесноты доити до гроба святаго, и ста от гроба далече, молящеся Богу и призывая на помощь благовернаго царевича Димитрия, — и в томъ часе прозре и прославиша Бога и святаго царевича Димитрия.

Чюдо 4-е. Некая черноризица именемъ Полинария, великою болезнию одержима, яко изгниша у нея нозе злымъ гноемъ, и услыша, яко точитъ целбы благоверный царевичь Димитрий, и в коемъ часе пришедше ко гробу царевича Димитрия, помолишася, исцеле в томъ часе.

Чюдо 5-е. Некий человекъ, поведа себе родомъ Краснаго села,[177] именемъ Григорий Власовъ, бе бо одержимъ злымъ недугомъ, бесновася; приведоша его сродники ко гробу святаго благовернаго царевича Димитрия, и стояше той человекъ у гроба святаго царевича Димитрия нощь, и на утре, и до вечерни, велми бесновася и испущаше злыя скверныя глаголы. Последи же вечерни Божиею милостию и молитвами святаго благовернаго царевича Димитрия бысть здравъ и моля в совершеннем разуме, и поведа, яко исцеле он молитвами святаго царевича Димитрия совершенно.

Чюдо 6. Некая жена поведа имя свое Акилина, Леонтиева жена Пенкина, а жила в Пушкаряхъ, и поведа о себе, яко болеша у нея очи долгое время, и светъ от очию отпаде. И приведоша ю ко гробу святаго царевича Димитрия, — и в томъ часе молитвами святаго благовернаго царевича Димитрия прозре и исцелеша от всехъ болезней.

Чюдо седмое. Некая жена поведа имя свое Мария, не виде она однемъ окомъ свету долгое время, и приведоша ю ко гробу святаго царевича Димитрия, — и в томъ часе молитвами святаго благовернаго царевича Димитрия исцеле совершенно.

Чюдо осмое. Некая девица поведа имя свое Анна, а жила она на Покровке у горшечника, и поведа она о себе: было у нея на правомъ оке белмо, и слыша от страных людей, приходящих с верою, — получаютъ исцеления молитвами святаго благовернаго царевича Димитрия различнымъ болезнемъ. И притекоша и та девица помолитися ко гробу святаго царевича Димитрия, — и в той часъ спаде у нея со ока белмо, и бысть здрава.

Чюдо 9-е. Некая жена поведа имя свое Антонида, родомъ Галицскаго уезду, поведа, яко болеша у нея внутреняя 20 летъ, и издах врачемъ все имение свое, и не обретоша отнюд нимало ползы. И слыша она, яко исцеление получаютъ приходящии различнымъ болезнемъ молитвами святаго царевича Димитрия от мощей его, и притекоша к нему, и помолися, — и в той часъ бысть здравй.