Том 14 (Конец XVI - начало XVII века, подступы к решительным переменам)

И первее прииде к пределомъ Русския земли от северныя страны[144] ко граду Чернигову, и тамо прельсти весь градъ и села и веси, и вси яша ему веру и поклонишася. И еще ему далече сущу от царьствующаго града Москвы, слыша Борисъ таковое смятение и прелщение от него в техъ градехъ и во всей Русстей земли колебание, и ужасеся зело сердцемъ своимъ, и умомъ въпаде в скорбь и печаль великую, видя, яко царьству его от него отъятися, и таковыя ради своея беды скоро живота своего гонзаетъ, и внезапу душу свою испущаетъ,[145] и тако живота сего отходитъ.

Той же окаянный розстрига, слыша Бориса умерша, и бысть радостенъ зело злохитрою своею душею и злоумышленнымъ своимъ сердцемъ, яко желание его хощетъ совершитися в конецъ. Воеводы же и воя вся, яже быша посланы противу его от царя Бориса, слышаша Борисово умертвие, и паки мняще его царева сына быти, и еще помышляху в себе, яко страха ради и срама самому себе умертвившу,[146] и вси предашася ему и поклонишася. Он же, окаянный, яко необузданный конь, буестне устремися ити к самому царьствующему граду Москве, никомуже ему возбраняющу. И еще ему не дошедшу града Москвы, посла пред собою своя доброхоты и втайне повеле Борисова сына и жену его нелепей и злой смерти предати,[147] удавомъ убо удавити, да не будетъ ему некоторое пресечение и зазрения въ его совести, аще ли оставитъ ихъ живых. И тако приидетъ к царьствующему граду Москве,[148] и такоже вси, падше, поклонишася ему яко сущему цареву сыну Димитрию. Мнози же и знающе его, яко не царевъ сынъ, но сосудъ диаволь Гришка Отрепиевъ, но ничтоже смеюще ему сотворити, зане страх и смерть пред очима бяше. И взя скипетръ великаго государьства, и седе на престоле царьстемъ,[149] и матерь благовернаго царевича князя Димитрия, благоверную царицу иноку Марфу, назва себе материю,[150] яко сущая ему мати. И того Бориса повеле от прочих царей, с нимиже положенъ бе в соборней церкви Архистратига Михаила, вонъ извергнути; и с последнимъ бесчестием и поношениемъ несенъ и положенъ бысть во единомъ от убогих монастырей, нарицаемъ Варсунофиевъ,[151] тогожде царьствующаго града Москвы. Дщерь же его, благородну и красну зело, повеле во иноческий образ облещи[152] и весь родъ и племя его разсеяти: овых повеле смерти предати, а иных в заточение отсылати, и домы ихъ и богатства на расхищение взяти и раздати, комуждо ему годе. И збысться реченное: «Ровъ изры, и ископа и́, и впадеся в яму, юже содела»;[153] и «обратися болезнь его на главу его и на верхъ его неправда его сниде».[154]

И по томъ начатъ царствовати окаянный розстрига и многи крови напрасно пролия за свое ложное нарицание. И еще же сочетася беззаконному браку:[155] приведе себе жену от папежския веры; егда бо еще ему тамо в Литве бывшу, и обетъ дал сатанинъ отцу ея и ей, яко да возметъ ю за ся, егда будетъ на престоле царьстемъ Российскаго государьства, и того ради окаянный взял у них злата и сребра много на собрание вой тех. И тако приведе ю, и святымъ крещениемъ не соверши ю, и тако венчася с нею, и самую ту великую соборную и апостольскую Церковь[156] осквернивъ недостойнымъ своимъ входомъ и венчаниемъ.

По том же окаянный конечное зло нача помышляти на православную христианскую веру, иже многочисленое множество — от велможъ и до простых людей — погубити и веру христианскую до конца искоренити и своя богомерзская папежская учинити.[157] Всемилостивый же Господь нашъ и Богъ не до конца милость свою отсече, ниже во веки прогневася, не попусти ему сего злаго дела совершити вконец, и прекрати того окаяннаго живот вскоре, зане познанъ и обличенъ бысть от всех, яко не царевъ сынъ, но сосудъ диаволь и сынъ сатанинъ, чернецъ розстрига Гришка Отрепьевъ. И тако злый убиенъ бысть и огнем сожженъ,[158] егоже самъ себе уготова. Царьствова же годищное время неполно,[159] якоже сказа новый венечникъ благоверный царевичь князь Димитрий в явлении своемъ преждереченному старцу Тихону. Богу нашему слава ныне и присно и во веки веков. Аминь.

О принесении мощей благовернаго царевича князя Димитрия от града Углеча во царьствующий градъ Москву

По том же проклятомъ преждепомянутомъ Грише розстриге вскоре избранъ бысть на царство от всего христианского народа благочестивый боляринъ князь Василей Иоаннович Шуйской и нареченъ бысть царемъ,[160] иже много страдание показа от оных растленных царей, паче же рещи, антихристовых детей, понеже мнози начаша называтися тем же царьскимъ именованиемъ[161] и многую и безмерную тщету учиниша всему великому Российскому государьству, сами же, окаяннии, зле скончашася, якоже прежде рехом; он же аки столпъ непоколебимъ стояше, аки пращею[162] злохитрых волковъ от Христова стада, от православныя веры отгнаша; с ним же и святейшему патриарху Ермогену[163] Московскому и всеа Росии, тому тогда престолъ держащу над всею Росиею и такоже велию ревность по православней вере держащу и по Святемъ Дусе побарающу и единодушно с нимъ стоящу.