Том 15 (XVII век)

Слышевъ же многие цари и короли про то златое древо и посылаху пословъ своих во Царьград з дары бесчисленными ко царю Михаилу благочестивому, и прошаху у него, чтобы дал древа златова посмотрить. И послы приидоша во Царьград и поклонишася благочестивому царю Михаилу, и дары подаша, и прошаху у царя древа посмотрить. Благочестивый же царь Михаил велелъ дары приняти, а послом повелелъ древа посмотрить. И послы же видя древо и дивяся много. И поклонишася царю, и пойдоша во свою землю ко царемъ и королемъ своимъ. И пришед, все по ряду[1466] поведоша.

Цари ж и короли слышавъ от пословъ своих про златое древо и много дивяся. И умысливъ, советъ сотвориша, хотяху у царя Михаила древо златое отставить. И отрядиша иных послов своих и послаша во Царьград, и повелели давать за златое древо городы и именья многа. Послы же приидоша во Царьград з дары и поклонишася царю Михаилу, и рекоша: «Великий царю Михаилъ! Цари наши и короли нас прислали к тобе, великому царю. А велели тобе говорить и у тебя просить древа златова. А велели тобе, царю, давать много городовъ и именья много». Благочестивый же царь Михаилъ велелъ дары принять, а посломъ повелелъ древа смотрить, а на городы и на именья древа златова не отдал. И рече царь Михаил посломъ: «Рките[1467] царемъ своимъ и королемъ: цареградцкий великий царь Михаил велелъ вамъ говорить: за что царю Михаилу златое древо отдать на городы и на именья? Во Цареграде древомъ златым царь славенъ, зело изобиленъ во всемъ однеми дарами». Послы же поклонишася царю Михаилу и пойдоша во свою землю ко царемъ своимъ и королемъ. И сказаша все по ряду, что царь Михаил приказал. Цари же много дивяся.

По мнозе же времени благочестивый царь Михаилъ преставися от царствия своего, и на ево место во Цареграде сяде на царство царь Левтасар. И бысть пьющъ велми, всю царскую казну пропил цареградцкую. И князей и бояр много казны взял, все то пропил. Церкви пресвещенные разграбилъ, сосуды серебреные из церквей поимал, все то пропилъ. Монастыри разграбилъ, да уже нечево ему пропить. Дограбився до златово древа, и все древо златое розламал, и все то пропил.

И некоторого вечера веселящеся со князи и бояры, пьюще и тешася велми. И слышавъ, что древа златова одна ветвь. А на той ветви золотой попугай говорит человеческимъ голосомъ, что сей де нощи царю Левтасару напрасною[1468] смертью умереть. Царь же Левтасар рече: «Князи и бояря, слышите, что золотой попугай говорит?» Князи же и бояря рече: «Великий царю Левтасар, слышимъ».

Царь же Левтасар возревъ[1469] на подволоку[1470] и виде много множество на подволоке рукъ человеческихъ пишуща, а лицъ не видитъ. И велми царь Левтасар ужаснулся и рече: «Князи мои и бояря, видите ли, что на подволоке руце человеческии пишут, а лицъ не видеть? Некоторые[1471] волхвы чары на меня нанесоша». И повелелъ в вестовой колоколъ звонить[1472], и проповедникомъ повелелъ по улицамъ ездить, чтобы все князи и бояря, и все мужи ехали на царевъ двор велия чюда смотреть.

Тот же час сьехашеся весь град на царевъ двор, и начаша ходити смотрить чюда в полату по десяти человекъ. Руки же не бояшеся никого, пишуще харатьи[1473], из руки в руку подаяше. Аки буря великая шумяше от харатей в полате. И рече царь Левтасар: «Князи и бояря, и все мужи градцкии! Что у меня в полате велие учинилося? Некоторые волхвы чары на меня нанесоша». Князи же и бояря все рекоша: «Великий царю Левтасару! То намъ чюдо несведома. А сведома то чюдо Данилу пророку. Данил пророк живет в монастыри, от Царяграда шестьдесятъ поприщ».

Царь же Левтасар повеле послать тотчас по Данила пророка. Посланник же къ Данилу пророку приеде и з Даниломъ пророкомъ стал во Цареграде, у царя в полате, во мгновения ока. И сказаша царю про Данила пророка. Царь же встретилъ среди полаты пророка Данила и рече Данилу пророку: «Что в полате у меня велие чюдо явися? Некоторые волхвы чары нанесоша».

Данил же пророкъ виде: ангельские руце пишутъ. И бысть трепетенъ[1474] велми. Пророк же Данил рече: «Великий царю! Не волхвы чары нанесоша на тебя. То пишут ангельские руцы действо твое, царю: что ты царьскую казну пропил, святая святых разорил, сосуды церковные, златые и серебреные, из церквей поимал, то все пропил. Монастыри розграбилъ, бояр и всяких людей ограбилъ, то все пропил. И златое древо все то пропил. Царьград да и вы, цари во Цареграде, ото всехъ царей и королей з древомъ златымъ чесны и славны были, и весь Царьград изобиленъ был древомъ златымъ. Сей тебе нощи напрасною смертью умереть».

Царь же Левтасар со гневомъ повелелъ Данила пророка посадить в темницу, а сам повелел себя стеречи всему царству, чтоб к нему смерть не пришла. И начал он в полате своей един пребывать, толко с ним Дарей Менденис. И дастъ ему копъе свое, и приказал ему, никово к себе в полату не велелъ пускать: «Хто станет царскимъ имянемъ пролыгатца[1475], убей ево, не верь ему». — И повелелъ ему у дверей стоять.