«Человече, внимай глаголы моя, господину мой Анадане! Всякому наказанью яснъ буди во всех днехъ жития твоего. Аще что слышиши от царя или видиши в дому его, да съгниеть въ сердци твоемь, и не известиши его человекомъ. Аще ли исповеси, чи будуть ти углье горящи и последокъ ожещися, и тогда тело твое с порокомъ будет. Сыну, аще что слышиши, не поведай никому, аще что узриши, не обавляй. Увязана ужа не отрешай, а отрешена не завязяй. Сыну, не взирай на красоту женьскую и сердцемь не жадай ея. Аще и все имение даси ей, тоже никоторыя ползы обрящеши от нея, но паче къ Богу въ грехъ въпадеши. Чадо, не буди жестокъ, якоже кость человеча, но буди, яко бобъ, мякокъ. Сыну, очи твои да будета долу зряща, глас твой обниженъ; аще бо и великымъ гласомъ храмине ся создати, оселъ бы риканиемь своимь 2 храмене въздвиглъ единым днемь. Сыну, уне есть со умным каменъ двигнути, нежели съ безумнымъ вино пити. С разумнымъ безумья не твори, и с безумным не яви ума своего. Не буди сладокъ без меры, но егда когда пожруть тя, не буди без меры горекъ, да не отбежить от тебе другъ твой. Сыну, едну сущю на нозе твоей, не велми въступай на ню, и уготова путь сыномъ и дъщеремъ своимь.[22] Сыну, богата мужа сынъ змию снел и ркоша ему людие: “Целбы деля снел ю есть", а убога мужа сынъ змию снел есть, и ркоша ему людие: “Гладенъ бе и снел есть ю”. Сыну, свое участье дай, а чюжего не заимай. Иже света не приемлеть муж, то с темъ на пут не ходи и со облестивым на трапезе не яждь. Чадо, аще вышеши тебе отпадеть, не велми ся обрадуй, ни въздай же глас пред други своими, да не явить ти глаголи твои, егда како, въставъ, мужь въздасть ти. Сыну, егда мужь възвелицится, то не завиди ему, аще злоба придеть, то не порадуйся. Сыну, не прикасайся жене безумне, и язычне, и величаве, и женьстей красоте не жадай: тоя бо красота слабость язычная.[23] Сыну, аще другъ твой възненавидить тя, начнеть кляти и камение метати, а ты и́ хлебомь срящи, и оба приимета ответъ в день Судный.[24] Сыну, безумен муж падеть, а праведный востанеть. Сыну, аще от биения сына своего не воздержайся, оже бо рана сынови, то яко вода на виноград възливается. Сынъ бо ти от раны не умреть, аще ли его небрега будеш, иную кую либо вину приведеть на тя. Чадо, сына своего от детьска укроти, аще ли его не укротиши, то преже дний своихъ состарееться. Сыне, не купи раба величава, ни рабы тативы, да те имения не расточать. Чадо, аще кто навадить на друга твоего, не послушай его, и твою бо вину ко иному понесеть. Чадо, аще тя кто сретъ, възмолвить к тобе, со въздержаниемь отвещяй ему, зане напрасно человекъ въборзе изронить слово и после каеться. Чадо, лживъ человекъ исперва възлюбленъ будетъ и наконечь въ смесе будет и въ укоризне бываеть. Лжива человека речь, яко птича шептания суть, и безумнии послушають его. Чадо, отца своего почти, яко все стяжание оставляеть тобе. Сыну, отца и матере клятвы не приимай, егда и от чад своихъ не приимеши радости. Егда на тя найдеть гневъ золъ, не молви зла, егда когда безуменъ наречешися. Сыну, безъ оружьи в ночь не ходи, кто бо свесть, кто тя срящеть. Чадо, древо с плъдомъ прегне е с твердостию своею, тако въ красе пребываеть, такоже и съ ближними своими и другъ со другом своимь, такоже суть. Яко левъ въ твердости своей страшенъ есть, тако и мужь въ близоцехъ своихъ честенъ есть. Иже родомъ скуденъ есть и детми и близоки, то пред врагы своими хуленъ есть, и подобенъ есть древу стоящю при пути, яко вси мимоходящеи секуть е. Сыну, не рци, яко: “Мой осподин безуменъ есть, азъ уменъ есть”. Наказание осподина своего приими, и помилованъ будеши, и своей мудрости не надейся. Елико можеши терпети — терпи, а зла не глаголи. Сыну, немногоречивъ буди, ибо пред господиномъ своимъ согрешиши. Чадо, аще тя на посолъ послуть, не медли чресъ годину, да не ины послуть въ следъ тебе. Сыну, да не речеть осподинъ твой тобе: “Отида от мене, оскорбееши”; нъ да бы ти реклъ: “Приступи близъ, и обрадуешися”. Сыну, въ святый день церкви не лишися. Чадо, идеже в дому печаль будеть, оставль ту беду, а на чюжь обедь не ходи, но преже посетивъ, толи на обедъ иди и помяни, яко тобе умреты же есть. Сыну, коня не имея, на чюжемь не езди, аще бо опешаеши, и посмеють ти ся. И, чреву не алчющю, не яжь брашна, егда обьястливъ наречешися. Со силнийшими себе брани не въздвизай, тобе не ведущу, не веси что възъдвигнуть на тя. Сыну, аще храм твой высокъ есть, обнизи стену его, и тако влази во нь, и умомъ своимъ возвышися. Сыну, гнева своего устягни, и за терпенье приимиши благодать от Бога. Сыну, велику меру вземъ, а в малу не продай, не рчи, яко “тъ ми есть прибытокъ”:[25] зло бо то дело есть. Кто бо весть, чи и Богъ, узривъ, разгневаеться на тя и потребить домъ твой акы безаконьника. Чадо, Божиимъ именемъ не кленися во лъжю, да не умалится число дний твоихъ. Сыну, аще что просиши у Бога, то не забывай, и не буди яко небрегый, но помни, внимай, благословенъ будеши. Чадо, старейшаго сына възлюби, а меншааго не отрей. Аще бо ти не въдно от Бога будеть, тъщивъствомь не обрящеши; убогъ богатъ бываеть, а богатъ убогъ бываеть, и высокъ обнижается и низокъ възноситься. Чадо, к печалному прихажай и утешеная словеса глаголи — уне бо то есть многа злата. Сыну, облакомився на злато и на сребро, не въсхощеши оклеветати, от Бога бо противо тому и от человекъ приимеши. Сыну, без вины крови не проливай, яко мьститель сему Богъ есть. Сыне, удержи уста от зла, а руце твои от татбы: иже украдеть злато или ризы, от обоего едина хула есть. Сыну, от блудниць удалися, паче же и от мужатиць, да не приидет на тя гневъ Божи. Сыну, аще кто послушаеть умна человека, то якоже въ день жадания студеные воды напиеться. Сыну, аще напасть и печаль приидеть на тя, Бога не укаряй, яко ничтоже не одолееши ему, но услышит укоризну твою и отвещаеть ти по истине. Сыну, правъ судия буди, и на старость твою честенъ будеши. Сыну, языкъ твой сладокъ буди, и устне твоеи добром отверзай. Чадо, умну мужю речеши слово, и поболить сердцемь, а безумнаго, аще кнутомъ бьеши, не вложиши во нь ума. Сыну, умна мужа пославъ на путь, не много ему кажи, а безумнаго пославъ, то самъ по нем иди, да не въведеть тебе въ срамъ. Сыну, друга своего не искушай брашномъ и виномъ, и тогда на болше попустится.[26] Сыну, аще тя позовуть на обедъ, по первому зову не ходи, и аще взовуть тя другое, тогда вижь, яко честенъ еси, и въ честь придеши. Сыну, не приемляй мьзды, ибо мьзда очи ослепляеть судиямъ. Золчи и горести вкушах, и не бысть пуще убожьства. Сыну, соль и олово льжее ся мнить понести, нежели въпятити скотъ, егоже въземши.[27] Сыну, железо и камень подъяхъ, и легчи ми ся мнить, нежели мужеви, ведущему законъ, тязатися со ближнимь своимь. Сыну, аще въ знаемых людехъ седя, худобы своея не являй, егда како поругаются и не послушають наказания твоего. Чадо, люби жену свою от всего сердца, яко та есть мати детем твоим и в животе твоемъ похоть твоя есть. Чадо, егда учиши сына своего, то наиболее въздержанию учи и́; емуже бо наученъ будеть, в техъ пребудеть. Сыну, в дому твоемь не сущи вине никоейже, не възмущай дому своего, егда поносъ приимеши от суседъ своихъ. Сыну, уне есть послушати пиана мудра, нежели трезва безумна. Чадо, уне есть слепъ очима, неже слепъ сердцемъ: слепъ бо очима, аще по пути ходить, обыкнеть и начнет обретати стезя своя, а слепъ си сердцемь, совращяся со пути своего, заблудиться. Сыну, уне есть жене, дабы свой сынъ умерлъ бы ей, нели дабы ей чюжь кормити, зане еже ей добро створити, зломъ въздасть. Сыну, уне есть веренъ рабъ, негли свободенъ неверенъ. Чадо, уне есть другъ, иже близъ тебе живеть, негли блишьший, иже далече пребываеть. Сыну, имя и слава чьстьнее есть человеку, нежели красота личная, зане слава въ векы пребываеть, а личе по умертвии увядаеть. Сыну, уне есть человеку добра смерть, негли золъ живот. Сыну, уне есть овча нога въ своею руку, негли плече в чюжей руце, и ближнее овча уне есть, негли далней волъ. Уне есть единъ врабьи, иже в руче держиши, негли тысяща птича, летеща по аеру. Уне есть конопянъ портъ, иже имеешь, негли брачиненъ, егоже не имееши. Сыну, еда призовеши на честь друга своего, веселомъ личемъ предстой ему, да онъ веселом сердцемъ отидеть в дом свой. Егда обед твориши пред другом, не стани посупленъ личемъ, да не будеть ти обедъ в посрамление, егда неблагъ наречешися. Сыну, не благослови человека, а другаго не клени, не сведая дела его, но, испытавъ, то же отвещай. Сыну, уне есть огнем болети, али трясавичею, негли жити со злою женою: да не будеть ти света в дому твоемь, и сердецнаго ей не вещай. Сыну, аще слово хощеши рещи кому, то напрасно не глаголи, но размысли въ сердци си, да еже ти на потребу, то глаголи, зане уне ти есть ногою подъкнутися, негли языкомъ. Сыну, егда будеши въ чади, то же приступивъ к нимъ не смейся: въ смесе бо безумье исходить, а в безумьи сварь бываеть, а въ сваре тязание и бой, а в бою смерть, а въ смерти грехъ свершаеться. Сыну, аще хощеши мудръ быти, да егда упьешися виномъ, не глаголи много и уменъ наречешися. Сыну, аще права суда не усудиши, то лицемеръ наречешися, и днье его прикратятся. Сыну, безумному человеку не смейся, но отступи паче от него и боголишиву не смейся, яко такъ же человекъ есть. Сыну, скота своего безъ послуха не дай въ тъщету да не испортиши его. Сыну, аще хощеши умна послушати, безумнаго не прикладай, несть бо ти в нем потребы. Сыну, перваго друга не отганяй, не согрешившю ти ничтоже, да и новый не отбегнеть от тебе. Сыну, на обеде седъ, другу своему не помышляй зла, егда огорцает ти брашно въ устех твоих. Сыну, господина своего чти, великы не обнизи, ни низъкия не възвышай, но еже ти речеть, то твори. Сыну, в судиинъ виноград не входи и съ безумною женою не сходися и света с нею не твори.[28] Сыну, лживо слово, якоже и олово тяжело есть, а напоследокъ по воде плаваеть. Сыну, искуси друга своего, и яви ему тайну свою и, мимошедшимъ днемъ многымъ, сварися с ним, и аще не явить твоея тайны, то люби и́ от всего сердца, яко известенъ ти есть другъ; аще ли явит тайну твою, отвратися от него и пакы не възратися к нему. Чадо, уне есть, да инъ у тебе украдеть, негли ты татемь наречешися. Сыну, аще пред царемь друга своего ради помощно слово речеши, и будеши, яко от устъ лвов изьятъ овча носимо. Сыну, аще на путь идеши, не надейся о чюжемь брашне, но свое да имееши, аще ли и не имееши своего и ходити начнеши — и въ укоризне будеши. Сыну, друг твой, иже ненавидить тебе, аще умреть, и то не порадуйся, но дабы живъ былъ, и обнизилъ и́ Богъ, дабы от тебе прощение приимал, и подай же ему; и того ради приимеши от Бога благодать. Сыну, стара узревъ, въстани ему, аще ти противу тому не отдасть, да от Бога благословление приимеши. Сыну, друга на обедъ звавъ, к иному делу не преставляй его, то аки ложь наречешися. Сыну, егда вода воспять потечеть или птиця опять полетит, или синечь или срачининъ побелееть, ли желць, аки пресный мед усладееть, тогда безумный уму научится. Сыну, аще к суседу званъ будеши и, влезъ въ храмину, не глядай по угломъ: беществено бо ти есть. Сыну, егоже Богъ обогатить, то не завиди ему, но боле, елико мога, почьсти и́. Сыну, егда внидеши в печаленъ домъ, то о питии и о яденьи не молви; егда сядеши на радостне обеде, тогда беды не поминай. Сыну, человечи ти очи, яко источники кыпя, и скота не насытистася, но когда умреть, и перьсти насытится.[29] Сыну, имение имея, не умаряй себя гладомъ и жежею: умершю бо тобе, инъ приимет и начнет веселитися всемъ, а ты всуе тружалъся будеши. Сыну, аще человекъ въ убожестве украдеть, то прочее помилуй его, зане не онъ то створилъ: убожество принудило и́ будеть. Сыну, на брак шед, долго не седи, егда преже похода твоего иженуть тя. Сыну, къ другу своему не часто ходи, егда бе-щьсти внидеши. Сыну, в новъ портъ облачася, и възраченъ будеши, и иному имеющю не завиди, егоже порты светлы, того и речь чистна есть. Сыну, аще имея или не имея, то не пребывай в печали, кую бо ти ползу принесет печаль? Сыну, аще песъ, отставъ господина по тебе поиде въ след, то обрящься, вземь камень и удари и́, такоже бо и тя оставивъ, по иномь потечеть. Сыну, аще тебе суседъ нелюбити начнеть, но ты паче люби и́, да не приведеть на тя досажения, тобе не ведущи. Сыну, аще зломысль твой въсхощет ти добра творити, и то вборзе не ими ему веры, да не, прельстивъ тебе, свой гневъ свьршить на тя. Сыну, аще человекъ согрешить ти греха ради, то не глаголи, яко без лепа казнять и́, да не впадеши в такую же казнь. Сыну, уне есть от премудра бьену быти, неже от безумна масломъ помазану быти, зане уменъ, аще ударить тя, тако мнится ему, яко сам ся ударяеть, и напоследь размышляеть, како бы тя утешить, а безумный, единою цаты меры масла помазавъ тя, тысящу хощеть приати злата.
