Том 3 (XI-XII века, священная история)

Сыну, еже тя научихъ, то с прикупом въздай же ми от своего и от моего».

И сему всему научих азъ, Акиръ, сестричича своего Анадана. Азъ, Акиръ, тако рех въ сердци своемь, яко: «Сынъ мой Анаданъ моего наказания послушаеть, и представлю и́ царю въ свое место». Не уведех, яко Анаданъ не послушаеть речи моея. Азъ тщахся научити и́, а онъ помышляше о смерти моей. И тако деяшеть: «Отець мой старъ есть, и ближе ему къ смерти, а уже умом скуденъ есть». И нача Анаданъ (...) растачати домъ мой безъ милости, и бияше рабы моя и рабыни моя, и милыя моя пред очима моима великими ранами, и коня и ослята моя умаряюще безъ милости. И яко видех Анадана тако деющя и възнегодовах, съжалих си и пощадехъ имения моего, рех: «Сыну, не порти ми скота моего, поистене бо въ Писании та мнить: о немже ся кто не труди, то того не рядить».

Шедъ, възвестих Синагрипу, царю своему, и тако ми отвеща царь: «До живота твоего, Акире, да не обладаеть домомъ твоимь инъ». Анаданъ, узревъ брата своего, егоже такоже кормях в дому своемь, и нача от того дни завидити и гняти, рька: «Еда Акиръ, отечь мой, отженеть мя и оному задничю дасть». Яко учютих и́ тако мысляща, и сварих и́, сице рекъ: «Како попортил ми еси наказания моя, и скотъ мой испортилъ еси». И се слыша от мене сынъ мой Анаданъ, яростью разгневався и иде в дом царевъ и, уловль годину, написа грамоте 2. К ратному цареви перскому, емуже имя Алонъ, и тако написа, рекий: «Синагрипа царя книжникъ и светник азъ, Акиръ, перьскому цесарю Алону радоватися! Во ньже день приидет грамота сия, готовъ буди со своими вои. Азъ ти предамъ Адорьскую землю. И приимеши ю́, не победився ни с кымже». И другую грамоту къ егупетьскому царю Фараону, тако река: «Якоже придет грамота си к тобе, тако готовъ буди и прииди на поле Егупетьское месяца августа въ 25 день, и азъ тя въведу въ Аналивьскый град, и преимеши пределы его не бивъся».

И в то время царь бе распустилъ воеводы своя, и царь единъ бе въ тъ чинъ. И грамоты написалъ бе моемь писмянем, и моимъ перьстьнем запечата, и прия у себе обе грамоти, жда годины, како бы вдати цареви. И написа паки и ину грамоту, река тако: «От царя Синагрипа къ Акирови, светнику моему. Имже дни придет грамота си, сбери воя моя и воеводы моя, и пристрой я. И готовъ буди месяца августа 25 день на поли Егупетьсте. И когда аз выйду, тогда пристрой воя, аки на бранъ, яко есть у мене посол Фараоновъ, и хощю, да видить воя моя».

И вда сынъ мой Анаданъ грамоту со двема отроками, присла ко мне, творя я от царя. Анаданъ, сынъ мой, предстояше цареви и принесе обе грамоте пред царемь, еже бе написалъ к ратнымъ царемь, и рече: «Царю, въ веки живи! Се грамота отца моего Акира, и азъ не приях совета его, но се принесохъ к тобе грамоте его, зане ялъ есмь брашно твое, и не достоить ми тьбе зла мыслити. Послушай речи моея, господи царю! Ты отца моего Акира възвыси и възвелици паче велможь своих, и се вижь, что писа на тя и на царство твое». И се рекъ, вда цареви грамоты.

И яко слыша царь и велми оскорбе и рече: «Господи Боже! Кое зло створих Акирови, да селико зло помысли на мя и на царство мое?» Отвеща ему Анаданъ, рече: «Царю мой! Что то есть, да оклеветанъ будеть? Но месяца августа дабы шелъ на поле Егупетьское, тогда бы увидилъ, аще есть истина». И послуша царь сына моего. Приде царь на поле Егупетеское, и сынъ мой Анаданъ бе со царемь. И яко узрехъ царя приближающася и уготовахъ воя, яко въ день брани по реченому писанью. И не ведяхъ, яко сынъ мой Анаданъ подо мною ровъ копаеть. Яко узре мя царь с вои уготовившася, великимъ страхомъ обьяся и рече, яко: «Вся глаголаная Анаданом истина суть». И отвеща Анаданъ: «Господи мой царю! Се уже видилъ еси своима очима, еже створи отець мой Акиръ. И уже възвратися отсюду, азъ иду къ отцю моему Акиръви и развещаю мысль его злую, и распущу воя, и самого увещавъ добрыми словесы, приведу к тобе, и тогда судиши ему противу деломъ его».

Обращающися цареви, и се сынъ мой Анаданъ приде ко мне и, человавъ мя, и рече: «Здравъ буди, отче Акире! Се царь мой прислалъ мя к тобе и реклъ ти: “Благословенъ буди, Акире, яко угоди мне въ днешний день и представи воя моя, яко ти бех велелъ. И се възвелицихся пред послы Фараоновы. И сам ко мне приди”». И по речению распусти воя и идохъ съ сыномъ своимъ Анаданомъ къ цареви.