Том 3 (XI-XII века, священная история)

Умилимся убо и мы убозии и недостойнии иноци Сергий, Теофиль, Югин. Вы же, отци и братья, слышите отрекшихся житья сего прелестного. Внидохомъ въ монастырь отца нашего Асклипия в Сепотаме Сурьстей межю двема рекама, единой имя Ефрантъ, а другой Тигръ. И отпевшимъ нам годину 9-ю, и седохомъ 3-е на месте поливне.[481] И начахомъ другъ друга воспрашати о пьсте и о воздержаньи о мнишьстемъ. И вниде единому въ сердце умъ Божий, и рече Феофилъ братома своима къ Сергею и ко Угинови: «Хотелъ быхъ ходити живота своего и страньствовати по земли, да вижю где прилежит небо к земли». И рекоста оба брата Феофиле: «Тобе имаве во отца место и не останеве тобе». И тоя нощи изидохом из монастыря отаи. Идохомъ въ Ерусалимъ дни 16 и поклонихомъся Божию гробу и честному кресту. Идохом въ святый Вифлеомъ и поклонихомъся святей пещере, идеже родися Христосъ, и видехомъ звезду и кладязь водный. Идохомъ дале 2 поприща, обретохом место, идеже ангели пояху «Слава в вышнихъ Богу». И возвратихомъся, и взидохомъ на гору Елеоньскую, идеже Христосъ взиде, и придохом въ Ерусалимъ, и створихом ту днии 12, ходяще по монастырем и молящеся Богу. И не надеяхомъся возратити в мир ось. И обратихомъся на въсток солнца, идохом дни 8, и преидохом реку Тигръ, и внидехом в землю Персию на поля чиста, имянемъ Асия, идеже убий святый Меркурей Ульяна Парвата.[482] И внидохом въ градъ, имянем Котисфонъ,[483] да в томъ граде лежать 3 отроци — Онанья, Озарья, Мисаилъ.[484] И поклонихомъся 3-мъ отроком, и славихомъ Бога, проведшему землю Персию. И внидохомъ в землю Индию 4-рми денми, обретохъ кровъ единъ индеескъ празденъ, не имуще человека. И, влезъше, прилежахомъ ту. И не бяше в месте томъ град, но коиждо свой кровъ да имат. И быхомъ в крове томъ 2 дни.

И се придоста 2 малжана, венца носяща на главах дивны. И видевше ны, убояшася зело и мнеста, яко исходатаи есмы земли той. И шедше, собраша на ны люде. И бяше ихъ 2000 мужь, и пришедше и обретоша ны кланяющас Богу, и взяша огнь, хотяше ны зажечь. Мы же убоявшеся, избежахом, и стахом посреди ихъ, не бы камо бежати. Они же глаголаху, а мы не разумехом речи ихъ, а они намъ не разумеют. И приимше, и ведоша ны, и затвориша ны в месте тесне, и не даша намъ ясти, ни воды пити. Мы же, грешнии, моляхомъся Богу и благословихом Бога, 10 дни затворени быхом. И собрашася на ны людие, и видеша ны молящаяся Богу, а они мняхуть ны гладомъ умориша. Изведоша ны вонъ ис крова того и погнаша ны из земля тоя, бьюще ны прутьемъ.

А уже имяхом мног днии не вкушавше пища никакояже. И помолихомъся Богу, идохомъ днии 40 и обретохомъ древа красна взору и плодовита зело, родившия плод благъ. И прославихомъ Бога и насытихомъся от плода того благаго. И преидохомъ в землю ину, пьсья главы, и зряхуть на ны, и не творяхуть намъ зла. По вся места собе живуть, межи каменья гнезда сносивше, живуть с чады своими. Идохомъ сквозе землю ихъ 100 дний, перси на въстокъ солнца и внидохомъ в землю трепястокъ. Да они, видевше ны, бежахуть от нас, да мы прославихъмъ Бога, избавляющаго ны от них. И взидохомъ на гору высоку, идеже ни солнце сияеть, ни древа есть, ни трава ростеть, развее гадъ и змиямъ свистающим. И съкрегующи зубы аспиды, ехидны и ували, и василискы.[485] И видехом иныя змия, многиимъ же имяни не ведехомъ. И прославихом Бога, избавляющаго ны от нихъ. Идохомъ 4 дни, слышащи глас змиевъ, уши свои залепивше воскомъ, не могуще терпети змеева свистанья. Перешедшимъ намъ гору ту и придохомъ в землю пусту и велику, и не бяше в земли той ничтоже, ни пришелъ бяше человекъ туду николиже.

Идохомъ днии 60, разумляюще, что створихом, и помолимъся Господеви, иже ны упасет от лютыхъ молвъ. И приде к намъ елень, и поиде пред нами. Идохомъ по олени, и проведе ны сквозе тму и пропасть велику. Идохомъ со страхом и трепетомъ и прешедше, и обретохом место равно и чреду олени пасуще. И преидохом всю землю ту беспутьемъ, и стуживше собе. И помолихомъся Богу, наставляющаго ны на путь благъ. И оттуду идохом дни 70, и придохомъ в места равна и добра, и видехом древа многа на месте том, но толко мегла темна. Да ту, убозии, седъ, поплакахомъся, зане путь ны ся заглади, да не ведяхом, камо путьшествовати. Плачющимъ же ся намъ на месте том до 7-го дни, и прилете голубь с высоты и нача летати пред нами. Мы же, убозии, ради быхом и весели, и славихомъ Бога. Идохомъ по голуби томъ и обретохомъ столпъ и комару. И бяше написано окрстъ ея: «Си столпъ поставилъ есть Александро царь макидоньский, ида от Халкидона и победивъ персы. Воевалъ есть до сего места, се ся нарече Тма, да аще хощет кто минути се место, то налево идет, вся бо воды мира сего от левое страны приходят, да иже ся техъ водъ надержит, то идет на светъ. А на десную страну суть горы великия и езеро полно змий». То бяшет написано на столпе Александрове. Да мы то прочтеше, утешихомъся и спех ны бысть и славихом Бога, спасающего ны.