Том 3 (XI-XII века, священная история)

И створихом вечернюю молитву, и седохомъ ту, и воспросихом святого Мокарья, и рекохом: «Отче благий, како еси пришелъ на се место на святое, скажи намъ». И рече намъ Мокарей искони житья своего: «Скажю вам, братья. Приклоните уши своя во глаголы устъ моихъ и послушайте мене, да въскажю о всемъ. Азъ, грешный, Ивановъ сынь быхъ, и нужю ми створиша родители жененьемъ. И створиша бракъ, и приведоша ми жену. И бывшю вечеру и хотеша мя положити. Народу пляшющю, изидохъ отаи, людемъ же не ведущимъ и скрыхся у жены вдовица. Да быхъ ту 7 дний, крыяся у вдовица, да та ми старица приношаше ми вести и плачь от родитель моихъ. И рече ми старица: “Сыновче, отиди от мене, да не уведять тобе зде. Боюся родитель твоихъ”. И въстахъ в полунощи в мертвеное время, изидохъ от нея и прослави Бога, не оставляющаго никогоже, но всем руку подая молящимъся ему. И посла ми Господь ангела Рафаила во образе мужа стара и странна, и приближися ко мне, и азъ воспросихъ его: “Где идеши?” И рече ми онъ: “Где ты умомъ мыслиши, да и азъ с тобою иду”. И рекох: “Господи, настави мя на путь живота моего”. И поидохъ вследъ его по земли, и начахове просити милостыня пищи собе. Азъ же не разумехъ, яко ангелъ водит мя, но мнях, яко старець водить мя. И бысть хоженья нашего 3 лет, идохове на место, и легша поспахове. И азъ же убудихся и не видех у собе старца, и азъ восплакахся, глаголя к собе: “Камо ся дежю в пустыняхъ сихъ?” Да ту ми яви глас, глаголя: “Азъ есмъ Рафаилъ, ангелъ Господень, приведый тя на се место повеленьемъ Божиимъ”. И слышав глас тъ, утешихся. И паки поидохъ, не ведый пути, камо ити. И стрете мя дивий, яко пасыся. И закляхъ его Богомъ, створшимъ небо и землю, и рекохъ ему: “Поведи мя в место жилища человечскаго”. Да онъ поиде пред мною, и азъ поидох вьследъ его. Идохъ 2 дни по немъ и стрете мя елень, да узревъ дивий олень, взратися въспять. И веде мя олень другия 2 дни и стрете мя змей. И видевъ олень змия того, возратися воспять. Азъ же видевъ змия того, устрашихся и закляхъ его Богомъ, дабы ми не створил зла ничтоже. Да ту змий став на опашь своемъ и нача глаголати, яко человекъ, и рече ми: “Добре еси пришел на место се, рабе Божий Мокарей, се бо уже 12 лет ожидаеть тобе место се, уготованое тобе. И поиди въслед мене и узриши место свое”. И прославих Бога, слышавъ речь от змия того, и поиде пред мною, уношею ся створив, и приведый, постави мя у дверей пещеры, и не видемъ бысть.