Том 3 (XI-XII века, священная история)

И поидохом на левую страну, идохом днии 40 и не можахомъ терпети смрада по вся дни. И благословихом Бога, подающего намъ терпенье духовное, идохом в печали велицей, и прихожаше ны глас, яко и кони ржуще. И приближихомъ на глас тъ. И видехом езеро полно змий, якоже бяше не видети воды под ним, и слышахомъ плачь и стенание люто. И бяше езеро то полно человекъ, и преде инъ глас с небесе, глаголя: «Си суть людие осужении, ти бо ся людие Бога отвергоша». Да мы со страхом и трепетомъ минухом озеро то осуженое и пошед мало дни и узрехом горе 2 высоце, да ту видехом мужа велика, в высоту 100 локотъ, и бяше привязанъ веригами медяными по всему телу и пламянь паляшет все тело его, и вопияше гласомъ великим.[486] Исхожаше глас мужа того до 30 поприщь. И увидевши ны муже тъ, нача плакатися, прикланяяся к земли, и бяше опалено все тело его. Мы же от страха покрывше лицо свое, минухом гору ту, идохом днии 5, слышаще глас его. И припрохомъ ся стремне месте и глубоце, и видехом ту жену стояшю простовласу на краи глубины, и змий бяше великъ обилъся около ея от ногу и до главы. И хоте рещи слово едино, и не даша ей, и заимаше ей уста хоботом, и бьяшеть ю по устомъ хоботом, да не глаголеть ничтоже. Инии же гласи исхожаху ис пропасти глубоки, народа многа изъ глубины вопиюще: «Помилуй ны, Господи, помилуй ны, Сыне Бога вышняго». Мы же от страха того идохом, рекохом: «Господи, опрости животъ нашь, яко видеста очи наши чюдеса сия и труд на земли сей». И паки поидохом от места того, плачюще, и обретохом место другое и древа бяху смоковнымъ образом на месте томъ, и на древехъ техъ множество народа птиць, тмы тмами бяше. И речь ихъ бяше, яко человеча и вси единимъ гласомъ вопияхут, глаголюще: «Остави ны, Владыко, и помилуй ны, Господи, мы бо согрешихом паче всея твари». Мы же, убозии, та чюдеса слышавше и видевше и поклонихомъ Господеви, глаголюще: «Господи, яви нам чюдеса сия, яже есмы видели и слышали». И молящимъся намъ Богу, и раступися земля пред нами, изиди гласа глаголя: «Ни есть вы дано видети делъ техъ, но идете путем своим».

Мы же минухомъ со страхом и придехомъ на место иное страшно. И ту видехом мужи 4-ре, образа же ихъ несть сказати, и бяше же пред святыми теми мужи оружье остро и стрегуще твердо. Змиеве со ехиднам объстояхуть около, а се 4 мужи венца носяща на главах красны и в рукахъ своихъ имуща палица злата. Да мы, убозии, падохомъ на земли ниць и воспихомъ: «Помилуйте, мужи небеснии, да быша не прикоснулися нас оружья та». И отвеща намъ, глаголяще: «Въсташа, идете путемъ своимъ, аможе вы ведете, не бойтеся ничтоже, не владееть бо вас озлобити оружье се, мы бо и блюдем до дни Суднаго». Да мы то слышавше, прекрестившеся, и поклонихомъся, и прославихомъ Бога, и минухом, яко душа не имуще.

Идохомъ днии 40 и в напрасне и глас слышахом народа многа зело, и насытихомъся благоуханья многа, и от глас поющих благоуханно многа. Сонъ ны обумори, да мы успохом и въстахом, оли слипатися устомъ нашим, от благости паче меду и ста. И въставше, и видехомъ церковь, и бяше я ледяна[487] и велика, посреде же церкви тоя олтарь знамянованъ. Посреди же олтаря того источник знамянань водный белъ, яко млеко. И видехом ту мужи страшны зело, окрестъ воды стояща. И пояхуть аггельския песни. И видевше то, мы трепещюще, яко мертви, да единъ от них красенъ зело, да тот ны рече, приступив: «Се есть источник бесмертенъ, ожидая праведных насладитися». Мы же то слышахом, и прославихомъ Бога, и минухом место то со страхом, и в радости велицей быхом яко Богъ весть. Но бяху устне наша ослажени от воды тоя, до 3-го дни слипахуся устне наша, яко от меду. И доидохомъ реки великия зело и насытихомъся воды ея, и насытихомъся благости и прославихомъ Бога. И к 9-тому часу сущю и седохом на брезе у реки тоя, размышляюще, что створим реце сей. И бяше по реце той светъ седмирицею сего света светлее. И помолихомъся на 4 страны земля и бяху ветри в земли той инаци тварью: западный ветръ зеленъ тварью, а от въстока солнцю от рая рыжь ветръ, яко и желтъ, а от полунощи ветръ яко кровь чиста, а от полуденныя страны ветръ белъ, яко снегъ. Солнце теплее сего 7-мижды и древа болши сихъ и краше и частейши и плодовито, а другое неимуще плод. И горы выше сихъ, и земля 2 лице имущи — червьлена и бела, и птици всеми лици.

Имяхом бо уже 100 дни не вкушавше пища, развее воды тоя, яко Богъ весть. Идущимъ же намъ, и се в напрасне придоша на ны множество мужий, и женъ, и детий, не ве, откуду. Инии же от них грозяхуся на победу на ны, друзии же дивляхуся, но бяху низци зело. Мы же я видевше, устрашихомъся, глаголюще, егда изъядят ны. Начахомъ глаголати к собе, что створимъ, братья. И рече Сергий ко братьи: «Рострясемъ власы главы своея, вперимъся на ня. Ащи ли бо побежимъ, то изъядят ны». И створиша так, да они побегоша, чад своя восхищающа и скрегчюще зубы своими.