Том 5 (XIII век, литература трагического века)

Данилъ же воружився, поемь вое свое, поиде реце Сяну. Броду же глубоку сущу, и приехаша половци напередъ, и приехавше видиша стада ихъ. Не бе же стражь ихъ у рекы. Половцем же не смеющимъ разъграбити ихъ бес повеления княжа. Онем же узревшимъ и убегшимь со стады своими во станы свое. Данилови же и Василко не умедлиста, но скоро придоста реку. Исполчивша же коньники с пешьци, поидоста с тихостью на брань. Сердце же ею крепко бе на брань, и устремлено на брань. Лвови же детьску сущу, поручи и Василкови, храбру сущу боярину и крепку, и да и стрежеть его во брани.

И видив же Ростиславъ приходъ ратных, исполчивъ же вои свое, русь и угры и ляхы, и доиде противу имъ, пещце же остави противу вратом града стрещи вратъ, да не изиидуть на помощь Данилу и не исекуть праковъ. Ростислав же исполчився преиде дебрь глубокую. Оному же идущу противу полку Данилову, Андрееви же дворьскому тоснущюся, да не сразится с полкомъ Даниловым, ускоривъ сразися с полкомъ Ростиславлимъ. Крепко копьем же изломившимся, яко от грома тресновение бысть, и от обоихъ же мнози, падше с коний, умроша, инии уязвени быша от крепости ударения копейного.

Данилъ же посла 20 муж избраных на помощь ему. Василей же Глебовичь и Всеволодъ Олександрович, Мьстиславъ, не мога Андрееви, бежаста назадъ ко Сянови. Андрееви же оставшу с малой дружиною, возьездя крепци боряшеся с ними.

Видев же Данилъ ляхы крепко идущимъ на Василка, керьлешь поющимъ,[574] сильньнъ гласъ ревуще в полку ихъ.

Данилъ же видивъ близъ брань Ростиславлю, и Филю в заднемь полку стояща со хорюговью, рекущю, яко: «Русь тщиви суть на брань, да стерпимъ устремления ихъ, не стерпими бо суть на долго время на сечю». Богу же не услышавшу славы его, приде на нь Данило со Яковомъ Марковичемь и со Шьльвомъ. Шелвови же сбодену бывшу, Данила же емшу, исторжеся из руку его, и выехал ис полку, и видевь угрина, грядущаго на помощь Фили, копьемь сътче и, и вогружену бывшу в немь уломлену, спадеся, изъдше. О того же гордаго Филю Львъ, младъ сы, изломи копье свое. Пакы же Данило скоро приде на нь и раздруши полкъ его, и хоруговь его раздра на полы. Видив же се Ростиславъ, побеже, и наворотишася угре на бегъ.

Василкови же сразившуся с ляхы, наворотившимся и не зрящимъ обоимъ на ся. Ляхомъ же лающимъ, рекущим: «Поженемь на великыи бороды». Василкови же рекшу, яко: «Ложь глаголъ есть вашь. Богъ помощникъ нашь есть». И тъкну конь свой и движеся. Ляхове же не стерпевше побегоша от лица его. Данилови женущу чересъ дебрь глубокую на угры и русь, бьющю е, и скорбяще о брате, не ведый. Узрев же хоруговь его, по ляхомъ женущу, и бысть в радости велице.

Ставшу же ему на могиле противу городу, и приеха Василко к нему. Данилови же хотящу гнати по нихъ, Василко же возбраняше ему. Ростиславу же познавшу, направи конь свой на бегъ. Угре же и ляхове мнози избьени быша, и ятии быша, и от вьсих мнози яти быша. Тогда же и Филя гордый ятъ бысть Андреемь дворьскимь, и приведенъ бысть к Данилу, и убьенъ бысть Даниломъ. Жирославъ же приведе Володислава, злого мятежника земле. Въ тъ ж день и тотъ убьенъ бысть, и инии угре мнози избьени быша за гневъ. Данило же и Василко не идоста в городъ, и Львъ ста на месте воиномь посреде трупья, являюща победу свою. Гонящим же и приездящимъ воиномъ и полунощи, и ведущимъ користь многу, яко же всее нощи клику не переста, ищущимъ другъ друга.

Яви же Богъ милость свою и дасть победу Данилу на канунъ великую мученику Фрора и Лавра.[575] Данилъ же город зажже, еже Ростиславъ создалъ, иде же в Холмъ с колодники многими, иже бе создалъ самъ. Литве же приехавшимъ и ляхомъ Кондратовымъ, к нему приспевшимъ ко брани и воротишася во свояси. А Ростиславъ бежа в Ляхы, и поемь жену свою, иде Угры. Про то бо из Угоръ пришелъ бяшеть съ женою в Лядьскую землю, мысляше во уме своемь взяти Галичь и обладати имъ. Богъ же за высокомыслие его и не створи того, еже онъ мысляше.

Въ лето 6758. Приславшу же Могучееви[576] посолъ свои к Данилови и Василкови, будущю има во Дороговьскыи:[577] «Дай Галич», бысть в печали велице, зане не утвердилъ бе земле ее городы. И думавъ с братомъ своимъ и поеха ко Батыеви река: «Не дамъ полу отчины своей, но еду к Батыеви самъ».

Изииде же на празник святаго Дмитрея,[578] помолився Богу и приде Кыеву, обдержащу Кыевъ Ярославу бояриномъ своимъ Ейковичемь Дмитромъ.[579] И пришед в домъ архистратига Михаила, рекомый Выдобичь,[580] и созва калугеры и мниский чинъ и рекъ игумену и всей братьи, да створять молитву о немь. И створиша, да от Бога милость получить. И бысть тако, и падъ пред архистратигомъ Михаиломъ, изииде из манастыря въ лодьи, видя беду страшьну и грозну.

И прииде Переяславлю, и стретоша татарове. Оттуда же еха къ Куремесе[581] и виде, яко несть в них добра.