Том 5 (XIII век, литература трагического века)

Рече ему король: «Не взялъ быхъ тысяще серебра за то, оже еси пришелъ обычаемь рускимь отцевъ своихъ». И просися у него въ станъ, зане зной бе великъ дне того. Онъ же я и за руку и веде его в полату свою, и самъ соволочашеть его, и облачашеть и во порты свое, и таку честь творяшеть ему.

И прииде в домъ свой.

Въ то же лето изгна Миндогъ сыновца своего Тевтевила и Едивида, пославшю ему на войну со вуемь своим на войну со Выконтомъ,[604] на Русь воевать ко Смоленьку. И рече: «Што хто приемлеть, собе дерьжить». Вражбою бо за ворожьство с ними литву зая, поимана бе вся земля Литовьская и бещисленое имение их, притрано бе богатьство ихъ. И посла на не вои свое, хотя убити и я. Онема же уведавшима, и бежаста ко князю Данилу и Василкови, и приехаша во Володимеръ. Миндогови же приславшю слы своя, река: «Не чини има милости». Не послушавъшима има Данилови и Василкови, зане сестра бе ею за Даниломъ.[605]

Потом же Данило сгада с братомъ си и посла в Ляхы ко княземь лядьскьмь, река, яко: «Время есть христьяномь на поганее, яко сами имеють рать межи собою». Ляхове же обещашася, нъ не исполниша. Данилу же и Василку пославшима Выкыньта во ятвязе и во жемойте[606] ко немцемь в Ригу, и Викынтъ же убеди я серебромъ и дарми многими ятвязе и полъ жемойти. Немцем же отвещавшимъ Данилу, яко: «Тебе деля миръ створимъ со Выкынтомь, зане братью нашу многу погуби». Обещаша же ся немци братья[607] ити на помощь Тевтивулу. Данило же и Василко поидоста к Новугороду.[608]

Данилъ же и Василько, братъ его, розгадавъ со сыномъ, брата си посла на Волковыескь, а сына на Услонимъ, а самъ иде ко Здитову.[609] И поимаша грады многы и звратишася в домы.

Потом же присла Выкынтъ, рекый, яко немце хотять востати на помощь Тевтивилу. И посла Данило Тевтевила и помочь собе и с нимь русь и половце, и многое воевание бысть межи ими.

Оттуда же Тевтивилъ иде с полономъ Даниловымъ в Ригу, и прияша рижани с великою честью, и крещенъ бысть.

Уведав же се Миндого, яко хотять ему помогати божии дворяне[610] и пискупъ и вся вои рижьзкая, и убоявся, посла тайне ко Андрееви, мастеру рижьску,[611] и убеди и дарми многими, сиречь умоли его, послалъ бо бе злата много и сребра, и сосуды серебреныи и златыи и красныи, и коне многы, рекый: «Ащь убьеши и женеши Тевтивила, и еще болша сих приимеши». Оному же рекъшу: «Не можеши избавленъ быти, аще не послеши к папе и приимеши крещения, не одолееши врагу. Дружбу имею к тебе». О, злее зла! Златомь ослепихъ очи свои, имже ныне пакы от нихъ беду приемлеть. Миндогъ же посла к папе и прия крещение, крещение же его льстиво бысть, жряше богомъ своимъ в тайне: первому Нънадееви, и Телявели, и Диверикъзу заеячему богу, и Меидеину,— егда выехаше на поле, и выбегняше заяць на поле, в лесъ рощения не вохожаше вону и не смеяше ни розгы уломити. И богомь своим жряше, и мертвых телеса сожигаше, и поганьство свое яве творяше.

Тевтивилу же исповеде пискупъ и пребощь Вирьжань, сожалишаси по немь, ведяху бо, аще Тевътивилъ не бы изгнанъ, Литовьская земля в руку бе ихъ, и крещение неволею прияли быша. Си жи вся некрестьяных литву створи Андрей, и изгнанъ бысть сану своего от братья. Тевтевилъ же прибеже во Жемойть ко вуеви своему Выкынтови, поима ятвязе и жемойть и помощь Данилову, иже бе далъ ему Данилъ древле, иде на Мидогва.

Миндъвгъ же собрался бе и умысливъ же собе не битися с ними полкомъ, нъ вниде во град именемь Ворута.[612] И высла шурина своего[613] нощь, и розгнаша и русь и ятвязе. Наутрея же выехаша немце со самострелы, и ехаша на не русь с половци и стрелами и ятвязи со сулицами, и гонишася на поли подобной игре. Оттуда же вратишася во Жемойть.

И приде Миндовгъ, собравъ силу велику, на город Выкинтовъ именемь Твиреметь.[614] Выеха же Тевтевилъ изъ города, русь и половци Данилови с ними и жемойть с ними и мнозии пешсце. Гонящимъ же имь застрели кочь половчинъ Миндогова въ стегно, и возвратися Минодовгъ в землю свою. Многымъ же ратьнымъ бывшимъ межи ими, Висимотъ[615] подъ тем же градомъ убьенъ бысть.

Въ лето 6761. Тевтивилъ присла Ревбу[616] река: «Поиди к Нову-городу». Данило же поиде с братомъ Василкомъ и со сыномъ Лвом и с половци со сватомъ своимъ Тегакомъ,[617] и приде к Пиньску. Князи же Пиньсцеи имеяху лесть и поя е со собою неволею на войну. И послаша стороже литва на озере Зьяте, и гнаша чересъ болота до рекы Щарье.[618] Совокупивошим же ся воиемь всим, светъ створиша, рекуще, яко: «Весть уже есть на насъ». Прящим же ся имъ, не хотящимъ ити воеватъ, Данилъ же мудростью речь створи, яко: «Срамоту имеем от Литвы и от всихъ земль, аще не доидемь и вратимься. Наутрея же — рече — светъ створим». Тое нощи пославъ по всимъ воемь, рекый: «Поидете, да разумно будеть всимъ не хотящимъ ити на войну». И зревше же вое пошедшие, и сами нужею поидоша, инии же вси.