Том 5 (XIII век, литература трагического века)

Диогенъ. Сему въдаша много вина въ пиру, и, въземъ, пролья. Инемъ же поносящимъ ему, зане губить вино, и се отвеща: «Аще бы вино не погыбло мною, то азъ быхъ погыблъ виномъ».

Нахаръсосъ. Сеи рече: «Егда сядеши в пиру, первую чашю испьеши здоровью, а въторую сладости, а третиюю безумью, а последнюю — бесовьствию!»

Софоклисъ. Сь, въпросимъ, рече: «Лоза три розгы ражаеть: первый съ сластью, вторый пьяньства, третьюю безумью».

О ДЕРЗОСТИ И О ОБЛИЧЕНИИ

Сему древле послану от Афиней[929] къ Филипу цесарю и съ дерзновениемъ беседующю, и Филипъ рече: «Не убоиши ли ся, зане повелю усекнути главу твою?» И онъ рече: «Ни, аще бо ты усекнеши ю, то мое отечьство бесмертиемъ почьстить ю».

Врагъ, истину исповедавъ, луче лицемерна друга.

О СТРАДАЛЮБИИ

Димостенъ. Сь, въпросимъ, како риторикию училъ, и рече: «Склочилъ масла боле вина».

О ТЩЕСЛАВИИ

Не хвались, егда ся явиши лучши злыхъ, но печалуйся, егда добрых не пристигнеши.

Буесть отнимаеть бытье мудрьное.

Тать ненавидить солньца, а гордый — кроткаго.

Сей, узревъ отрока[930], о многоценне хламиде гордяща, и рече ему: «Престани гордя о овчии волне!»

О ИСТИНЕ И ЛЖИ

Соломон. Иже ся утвержает лъжею, тотъ пасеть ветры и птице крилатыя.

Богословъ. Истина одина есть, а лъжи многомыслены.

Осопъ. Сь, въпросимъ, что польза от лъжи лъжющимъ, и рече: «Аще и право молвять, не имуть имъ веры».

О ХВАЛЕНИИ

Феофилактъ. Истинъная хула лучеи есть лицемерныя славы.

Исократъ. Верных мни не техъ, иже по твоему слову молвять, но иже противяться глаголемымъ тобою по криву.

О КРАСОТЕ

Сирах. Не похвали мужа красоты его ради, красота человеческая познаеться възрастомъ сединъ.

Плутархъ. Приникни къ зерцалу и смотри лица своего: да аще и красенъ ся явиши, твори протива своей красоте и не посрами ее злыми делы; аще же злообразенъ еси, то личьное оскудение украси добродеяньемъ.

Красны жены лобзания блюдися, яко змиина еда злаго.

О СЛАВЕ

Бещестье стерпети — велико и крепко, а еже славе причяститися — великы душе требуеть и зело умны, дабы не отпалъ славы приимый. Но оже хощеши славу обрести,— отжени славу; аще ли гониши славу — отпадеши славы, та бо слава — стень славе.

Никто же, на стене вапомъ написана хлеба зря, аще и велми гладенъ есть, и иде укуситъ его.

Александръ. Сь пленилъ индеянина, славна стрелыда и нарочита. И онемъ рекшимъ: «Сь можеть сквозе перьстень прострелити» — повеле ему явити хытрость его пред собою. И не хотящу ему повеле посещи. Ведущимъ же его на посечение, глагола къ водящимъ, яко: «Много время минуло, яко въ руку лука не прияхъ и убояхся, еда, погрешивъ, погублю си славу». Слышавъ же, Александръ дивися и отпусти и съ дары, зане умрети изволи, нежели славу свою погубити.

О МНОГОМОЛВЛЕНИИ

Евагрий. Молви, яже достойно, и егда достойно, и о нихъ же достойно — и не услышиши, яже не достойно.

Мигдольный цветъ мразомъ гыбнеть, зане ранеи всехъ цвететь, человеци же многымъ скоромолвлениемъ истляють. Подобаеть беспрестани умом възбраняти языку и въздержати струя его, да не будемъ безумнеише гусии. Ти бо, егда прилетять от Киликия и къ Таурмении, ведуще, яко исъполнена места та суть орлии, емлють въ уста каменье, яко замокъ гласу, и нощь прелетять.

Сь, въпросимъ, како две уши имеемъ[931], а единъ языкъ, и рече: «Зане достойно сугубо слышати, а одиною молвити».

О СМИРЕНИИ

Нилъ. Блаженъ мужь, иже имееть житье высоко, умъ же смеренъ.

О ВРАЧЕХЪ

Никоклий. Сь, слышавъ злаго лечьца, яко глаголаше, велику силу имееть, и рече: «Како бо не хощеши тако рещи, иже толико людий убивъ, и яко неповиненъ ходиши!»

О ПАМЯТИ

Платонъ рече. Дети и стареи равно непамятиви суть: ови растуще, ови изнемагающе. Что есть память? Держание видимых и слышаныхъ, погонение же ихъ испоминание наречеться. Темъ бо тупии памятиви суть, а хитрии въспоминаньливи.

О ЗАВИСТИ

Якоже мухы сдравая удеса прелетають, а къ гнойнымъ местомъ прилипають, тако же и завистивии.

Что стонеши, завистьливыи, о своей ли напасти, цили о чюжем блазе?

Анахарсъ рече. Сь скутьскый философъ, въпросимъ бысть, коеи вины деля человеци печальни суть воину, и рече: «Яко не токмо о своихъ напастехъ пекуться, но и о чюжемъ добровазньстве».

Зависть — есть струпъ правьде.

Агафонъ. Аще бы не была въ человецехъ зависть, то вси быхомъ равни были.

О ВОЛЬНЕМ И НЕВОЛЬНЕМ

Уне ти есть волею печальну быти, нежели неволею радоватися.

О РАЗУМЕ И О СОБЕ

От Евангелия. Что зриши сучьца въ оце брата своего, а въ своемъ бервьна не видиши!

Платонъ. Начало разуму — разуменье невежьства своего; мы же, не ведуще ничтоже, мнимся всеведуще.

Ираклий. Сь, уноша сый, приведенъ бысть пред учителя, вънегда философью учаше, и, въпросимъ сы от него: «Что, уноше, училъ ся еси?», и онъ отвеща: «Се училъ ся есмь, яко не вемъ ничтоже». Слышавъ же, учитель чюдися, и вси, окрестъ стоящеи учителя, кликоша: «Воистину сь уноша хитрее всехъ насъ есть!»

О ЗАКОНЕ