Том 5 (XIII век, литература трагического века)

Се бо чюдный князь Юрьи потщася Божья заповеди хранити и Божий страх присно имея в сердци, поминая слово Господнее, еже рече: «О семь познают вы вси человеци, яко мои ученици есте, аще любите друг друга. Не токмо же друга, но и врагы ваша любите и добро творите ненавидящим вас. Всякъ зломыслъ его прежемененыя безбожныя татары отпущаше одарены.[152] Бяхуть бо преже прислали послы свое злии ти кровопийци, рекуще: «Мирися с нами». Он же того не хотяше, яко же пророкъ глаголет: «Брань славна луче есть мира студна». Си бо безбожнии со лживым миром живуще велику пакость землям творять, еже и зде многа зла створиша. Богъ бо казнить напастми различными, да явяться яко злато искушено в горниле — христьяном бо многыми напастми внити в царство небесное. Сам бо Христосъ Богъ: «Нужно е царство небесное, и нужници въсхытают е». Георгие, мужьство тезоимените, кровью омывъся страданья ти! Аще бо не напасть, то не венець, аще не мука, ни дарове. Всякый бо держася добродетели, не может безъ многих враг быти.

Милостивъ же бяше паче меры, поминая слово Господне: «Блажении милостиви, яко ти помиловани будут». Темь и не щадяше имения своего, раздавая требующим; и церкви зижа и украшая иконами безъценными и книгами, и грады многы постави, паче же Новъгородъ вторый[153] постави на Волзе усть Окы, и церкы многы созда и манастырь святыя Богородица[154] Новегороде. Чтяшет же излиха чернечьскый чинъ и поповьскый, подая имъ еже на потребу. Тем и Богъ прошения его свершаше, исполни лет его в доброденьствии. И поседе в Володимере на отни столе лет 20 и 4, а на 5-е убьенъ бысть от безбожных и поганых татаръ. Се же все сдеяся грех ради наших.

Но не предай же нас до конца имени твоего ради святаго и не остави милости твоея от нас молитвою святыя Богородица и блаженаго епископа Кирила. Не презре Господь молитвы его и слезъ, иже приношаше Господеви, моляся день и нощь, абы не оскудела правоверная вера христьяньская. Еже и бысть: сдея Господь спасенье велико князем нашим, избавилъ есть от враг наших; «очи бо Господни на боящаяся его, а уши его в молитву ихъ». Гониша по них татарове и не обретоша. Яко же и Саулъ гоняше Давида,[155] но Богъ избави от руку его, тако и сих Богъ избави от рукы иноплеменник, благочестиваго и правовернаго великого князя Ярослава с благородными своими сыны. Бе же ихъ 6: Олександръ, Андрей, Костянтинъ, Офонасий, Данило, Михайло. А Святославъ с сыном с Дмитрием, Иванъ Всеволодичь, Володимеръ Костянтинович, Василковича 2 — Борисъ и Глебъ, Всеволодичь Василий, — си вси схранени быша Божьею благодатью; но мы на предреченая взидем.

Того же лета татарове взяша Переяславль Рускый, и епископа убиша, и люди избиша, и град пожьгоша огнем, и люди, и полона много вземше, отидоша. Того же лета Ярославъ иде г Каменьцю; град взя Каменець, а княгыню Михайлову со множьством полона приведе в своя си. Того же лета священа бысть церкы Бориса и Глеба в Кидекшии[156] великым священьем на праздник Бориса и Глеба священымъ епископомъ Кириломъ. Того же лета взяша татарове Черниговъ, князи ихъ выехаша въ Угры; а град пожегше, и люди избише, и манастыре пограбиша, а епископа Перфурья пустиша в Глухове;[157] а сами идоша в станы свое. Того же лета Ярославъ иде Смолиньску на Литву, и Литву победи, и князя ихъ ялъ; а смольняны урядивъ князя Всеволода посади на столе, а сам со множеством полона с великою честью отиде в своя си. Того же лета на зиму взяша татарове Мордовьскую землю, и Муром пожгоша, и по Клязьме воеваше, и град святыя Богородица Гороховець пожгоша, а сами идоша в станы своя. Тогды же бе пополохъ золъ по всей земли, и сами не ведяху и где хто бежить.

В лето 6748. Родися Ярославу дщи и наречена бысть в святомь крещении Марья. Того же лета взяша Кыевъ татарове и святую Софью разграбиша и манастыри все. И иконы, и кресты честныя, и вся узорочья церковная взяша, а люди от мала и до велика вся убиша мечем. Си же злоба приключися до Рожества Господня на Николинъ день.[158]

В лето 6749. Родися Ярославу сынъ и нареченъ бысть въ святомь крещении Василий. Того же лета татарове победиша угры. Того же лета татарове убиша Мстислава Рыльского.

ИЗ ТВЕРСКОЙ ЛЕТОПИСИ