Том 5 (XIII век, литература трагического века)

Повесть о Калкацкомъ побоище, и о князехъ рускыхъ, и о храбрыхь 70. Въ лето 6732. По грехомь нашимъ приидоша языци незнаеми, безбожнии моявитяне, их же никто же добре не весть ясно, кто суть, и отколе изыидоша, и что языкь ихъ, и которого племени суть, и что вера ихъ. И зовуть я татари, а инии глаголють таурмени, а друзии печенези. Инии же глаголють, яко сии суть, о нихъ же Мефодий, епископь Паторомский, сведительствуетъ, яко сии суть вышли ис пустыня Ефровскиа, сущи межи въстока и севера. Тако бо глаголеть Мефодий: «Яко въ скончание времени явитися имъ, их же загна тамо Гедеонъ, и изшедше оттуду, попленятъ всю землю отъ востока до Ефранта, и отъ Тигра до Понетскаго моря, кроме Ефиопиа». Богь же весть единъ, кто суть и отколе изыидоша, премудрии мужи ведятъ я добре кто книгы разумеетъ. Мы же ихъ не вемы, кто суть, но и зде написахомъ о нихъ памяти ради рускыхъ князь и беды, яже бысть отъ нихъ.

Но не сихъ же ради сие случися, ко гордости ради и величаниа рускыхъ князь попусти Богь сему быти. Беша бо князи храбры мнози, и высокоумны, и мнящеся своею храбростию съделовающе. Имеяхутъ же и дружину многу и храбру, и тою величающеся, от них же о единомъ въспомянемъ зде, описаниа налезше.

Бе некто отъ ростовскыхъ житель Александрь, глаголемый Поповичь, и слуга бе у него именемь Торопь; служаше бо той Александръ великому князю Всеволоду Юриевичу. Повнегда же дасть князь великий Всеволод градъ Ростовъ сыну своему князю Костантину, тогда и Александрь начатъ служити Костантину. Егда же преставися великий князь Всеволодъ, Костантину не восхотевшу быти въ Володимери, но у пречистиа Ростовскиа и чюдотворцевь излюбы жити. Темь и прошаше Вълодимера къ Ростову, а не Ростова къ Володимерю, ту бо омышляше столу быти великому княжению; но не въсхоте сего пречистая Богородица. И дасть князь великий Всеволодъ столъ свой меншему отъ Костантина сыну своему Юрию. Темъ Костантинь гневашеся на брата о княжении, а князь великий Юрий многы браны на Костантина въздвиже, хотя съ Ростова съгнати его; и не попусти ему Господь.

Пришедшу бо ему на нь ратию, Костантинъ отъиде къ Костроме и тоа съжже. Князь великий Юрий стоаше подъ Ростовомъ, въ Пужбале, а войско стояше за две версты отъ Ростова, по реце Ишне,[159] биахутъ бо ся вместо острога объ реку Ишню. Александръ же выходя многы люди великого князя Юриа избиваше. Их же костей накладены могыли великы и доныне на реце Ишне, а инии по ону страну реки Усии: много бо людей бяше съ великымъ княземь Юриемь. А инии побиени отъ Александра же подъ Угодичами, на Узе, те бо храбрии выскочивше на кою либо страну обороняху градъ Ростовъ молитвами пречистыа. Многажды бо князь великий Юрий на братне достоание прихождаше, но съ срамомъ възвращашеся.

Единою выйде на него изъ Ростова Костантинь, и бысть имъ бой за Юриевымъ на реце Гзе,[160] и тамо победи Костантинь, молитвами пречистыа, своею правдою и теми же храбрыми Александромъ съ слугою Торопомъ; ту же бе и Тимоня Золотой поясъ. И ту убиша у великого князя храбраго Юряту, о семъ велми опечалися князь великий Юрий; побеждень же смирися съ братомъ. Потомъ прииде на Ярослава Переяславьского Мьстиславь Мьстиславичь, тесть его, и инии князи, съ собою же и Костантина подвигоша, а за Ярослава сталъ князь великий Юрий за брата. И бысть имъ бой на Липицахъ и на Юриеве горе,[161] а ту все полки великого князя Юриа избыти. Въ них же убиень бысть храбрый и безумный бояринъ Ратиборъ, иже похвалися седлы наметати супротивныхъ. Князя же Юриа победивше, и на столе въ Володимере Костантина посадиша. Два же лета Костантинъ бывь князь великий, пакы столъ дасть брату Георгию, а детемъ Ростовъ и Ярославль, а самъ кь Господу отходитъ.

Видевъ же Александрь князя своего умрьша, а Юриа седша на столе, размышляше о животе, еда како отдасть мьщение князь великий, Юряты ради, и Ратибора, и инехъ мнозехъ отъ дружины его, их же изби Александрь. Вскоре смысливь посылаетъ своего слугу, их же знаше храбрыхъ, прилучившихся въ то время, и съзываетъ ихь къ собе въ городъ, обрытъ подъ Гремячимъ колодяземъ на реце Где, иже и ныне той сопъ стоитъ пустъ. Ту бо събравшеся съветъ сътвориша, аще служити начнутъ княземъ по разнымъ княжениямъ, то и не хотя имутъ перебитися, понеже княземъ въ Руси велико неустроение и части боеве. Тогда же рядъ положивше, яко служити имъ единому великому князю въ матери градомъ Киеве. Бе же тогда въ Киеве князь великий Мьстиславь храбрый Романовичь Смоленского и Володимеръ Руриковичь Ростиславича, въ то же время Мъстиславь Мьстиславичь въ Галичи. И быша челомъ вси тыи храбрыи великому князю Мьстиславу Романовичу, о них же князь великий велми гордящеся и хваляшеся, донеле же сиа злоба съключися, о ней же повесть предлежитъ.