Том 5 (XIII век, литература трагического века)

Начатъ бо слухъ проходити, яко сии безбожнии многы страны поплениша: Ясы, Обезы, Касогы, и половець безбожныхъ множество избыша, и приидоша на землю Половеческую. Половци же не могуще противися бежаша, и многыхъ избыша, а иныхъ погнаша по Дону въ лукоморя,[162] и тамо избиваеми гневомъ Божиимъ и пречистыа его Матери. Много бо зла сътвориша те окаании половци Руской земли. Того ради всемилостивый Богъ хотя погубити безбожныа сына Измаиловы, куманы, яко да отъмьстятъ кровь христианьскую; еже и бысть надъ ними. Приидоша бо ти таурмени на всю страну Куманьскую и гониша ихъ до реки Днепра близъ Руси.

И прибегоша окаяннии половци, иде же зовется валъ Половеческий, остатокъ избытыхъ: Котянь, князь половеческий, съ инеми князи; а Данило Кобяковичь съ нимъ и Юрий Кончаковичь убьена быста. Сей же Котянъ тестъ бе князю Мьстиславу Мьстиславичу Галичьскому, и прииде съ поклономъ съ князи половеческыми къ зятю Мьстиславу въ Галичь и къ всемъ княземъ рускымъ. И принесе дары многы, кони, и велбуди, и буйволы, и девки, и одариша всехъ князей рускыхъ, кланяяся, ркуще: «Дньсь нашу землю отъяли суть, а вашу пришедше заутра възмутъ, то помозете намъ». И възмолися Котянъ зятю своему Мьстиславу; князь же Мьстиславъ посла кь братии своей, княземъ рускымъ, съ молбою рекъ: «Поможемъ симь; аще ли же мы симъ не поможемъ, то сии имутъ предатися къ нимъ, то онимъ болши будетъ сила, а намъ тяготнее будетъ отъ нихъ». И тако думавше много о себе, и поклона для и молбы князей половеческыхъ яшася Котягу помагати.

Начаша вои пристраивати, кождо свою власть: князь великий Мьстиславъ Романовичь Ростиславича Киевский, и Мьстиславъ Святославичь Черниговский Всеволодича Козельский, и Мстиславь Мьстиславичь Галичьский, сии бо старейшии земли Руской; съ ними же и младии князи: Данило Романовичь Мьстиславича, и князь Михайло Всеволодичь Черниговский, и князь Всеволодъ Мьстиславичь Киевьского сынь, и инии князи мнози. Бывшу же съвету ихъ въ Киеве всехъ князей, послаша къ Володимеру къ великому князю Юрию Всеволодичу на помочь; онъ же посла имъ Василка Ростовскаго. Съвещаша же князи, яко срести ихъ на чюжой земли (тогда же половецкий князь крестыся Бастый), и съвъкупивше всю землю Рускую, поидоша противу татаромъ. Пришедши же имъ кь Днепру на Зарубъ, къ острову Варяжскому,[163] то же слышавше татарове, оже идутъ князи рустии противу имъ, послаша къ нимъ послы своа, глаголюще: «Се слышахомъ, оже идете противъ насъ, послушающе половецъ. А мы вашеа земли не заяхомъ, ни городовъ вашихъ, ни селъ вашихъ, ни на васъ приидохомъ. Но приидохомъ, Богомъ пущони, на конюхи и на холопы свои, на поганыа половци, а вы възмете съ нами миръ. А половци, аще прибежатъ къ вамъ, то не приимайте ихъ, и бийте ихъ отъ себе, а товаръ ихъ възмите къ собе. Зане же слышахомъ, яко и вамъ много зла творятъ, того ради и мы биемъ». Князи же русстии того не послушаша, по послы изъ избыша, а сами поидоша противу имъ. И не дошедше Олешиа,[164] и сташа на Днепре. И прислаша къ нимъ татарове второе послы, ркуще тако: «Аще есте послушали половець, а послы наши избыли, а идете противу насъ, то вы поидите. А мы васъ ничимъ не заимали, а всемъ намъ Богь». Они же отпустиша послы ихъ.

Ту прииде къ нимъ вся земля Половецкаа и съ князи своими. Тогда же Мъстиславъ Мъстиславичь Галичский, въ тысячи войска, перебродися реку Днепръ на сторожи татарскиа, и победи ихъ. А останокъ ихъ въбеже въ курганъ Половецкий съ своимъ воеводою Гемябекомъ, и ту имъ не бысть помочи. И погребоша воеводу своего Гемябека живого въ землю, хотяще его ублюсти. И ту его налезоша, испросивше его половци у Мстислава, и убиша его. То же слышавше князи рустии, поидоша за Днепрь на множестве людей: Мъстиславь князь великий Романовычь съ кианы, Володимерь Руриковичь съ смолняны, черниговьстии князи, галичане, и волинцы, и куряне, и трубчане, и путивльци, и вся страны руския, и вси князи и множество вой. Приидоша же выгонцы галичьские[165] въ лодиахь по Днестру въ море, бе же тысяща лодей. Изъ моря выидоша въ Днепрь, и възведше порогы, сташа у реки Хортици,[166] на броде у Протолчии; воевода же у нихь Юрий Домаречичь, а другой Держикрай Водиславича.