Том 7 (Вторая половина XV века, литература эпохи исторических размышлений)

МЕСЯЦА НОЕВРИА 5 ДЕНЬ. ВЪСПОМИНАНИЕ О ЖИТИИ ЧЮДОДЕИСТВИ И О ПРЕСТАВЛЕНИИ О БЛАЖЕНЕМЪ ИОНЕ АРХИЕПИСКОПЕ ВЕЛИКАГО НОВАГРАДА, ИЖЕ БЫСТЬ ПО ВТОРЕМЪ АРХИЕПИСКОПЕ ЕУФИМИИ ЧЮДОТВОРЦИ, ИЖЕ НА ВЕЖИЩАХЪ,[349] В ЛЕТО 6976-Е ДО ЛЕТА 9-ГО

Вспомянути и блаженнаго нашего пастыря Иону добро по немалымъ словом. В чин же и зде приложися въспомянути его по преподобнемъ архиепископе нашемъ Еуфимии, иже въсиавшу пред очима нашима, и добродетелей его, и благодеяний все мы приимателе и свидетеле суще. Толико бо трудися за люди своя, паству свою добре пасый, яко добрый пастырь — въистину Еуфимие![350] Въ время изнеможениа благодушьствуяй и предстоя стаду своему по Гоподню словеси: «Не оставляа стада и бегая наемническы, но душу свою полагая за пасомыа своя».[351]

Преже бо зело малех дней епископьства его въздвижеся Витовтъ, князь виленьский,[352] аки волкъ гладенъ человеком нападая плоти их, оружиемъ хапая иже полнъ и своеродных кровей. И со всем литовским множествомъ ходя на Великий Новъград оборити и попленити хотя. И Порховъ градъ уже аки в неводе обиатъ войска множествомъ, и борити той начинаше, и вся злая творити не умолчеваше. И от сего всему Великому Новуграду в подвизе велице сущу и мнозе труде, не многом бо преже с Немци боришася, таже и гладом дручени быша, таже и от своего князя насиловани; тем же суровый волкъ яко время гладству своему обрете, на уставшая люди уже и много трудившаяся преже прииде пожрети мысля. Преступивъ мирныя клятвы безаконно и пагубно, обаче последи въздасть ему Господь ординьскими цари! Цари бо одриньстии с своими татары многое его литовьское воиньство излезшее на ня в поле, аки худы некиа животны, иже от пещеръ изскачющая погубиша, и силныа коня его и комони отъяша, самому Витовту в мале полце утекшу, и полскыя грады и великая села без заставы оставивъ, свое спасение токмо ища. Их же татарьстии руце пусты ему вся положиша мноземъ гневом царя ихъ.

Егда же борющу сему Витовту град Порховъ и Великому Новуграду зле претящу, тогда блаженному Еуфимию с послы Великаго Новаграда от архиепископа Емелиана, иже Еуфимиемъ преименованнаго,[353] к ратнику сему о смирении ходившу. И много к нему трудися, всяко к лукавьству его тайная бо лсти Витовтова сердца прилежными къ Богу молитвами претворити на благо и преложити на истину мняшеся, видимую же его злобу множеством сребра укрощаваше. И толико трудися в молитвах к Богови и в дарох к ратнику, донележе того въ своя възвратитися сотвори преподобный, и, граду своему многу радость исходатаивъ, прииде.

Не по мнозе же Емелиану честному почившу, сий възведенъ бысть въ архиепископьство. В немже колико трудися, и въгневех своего князя иже на град его, и ратною рукою въздвизающася на своя нелепотно двоицею. Ходатаиствуя посреди и тружаяся зело и ового дарми укротя и тяжестию сребра утоляа, овыя же благыми словесы утешая, мировати къ князю своему увещавая. Изрядндее же доброту показа на плененыа и блаженныи, якоже и въ споминаниих о нем сказася и блаженным Ионою, в повеленом списании в лета яже архиепископьства его.[354]

Сего же самого приснопаметнаго преподобника и святителя Иону въспомянути приложися ныне к памети Еуфимиевы, по нем бо архиереиский престолъ Великаго Новаграда церкве украшаше и пастырьская исправляше достойно и праведно. Аще и в мало лет прилучися ему настояти, тридесяте бо лет точию пасе[355] Христово стадо, но многу и велику светлость показавъ изряднаго благопребываниа и добродеяниа.

Съвершену бо ему сущу старостию помазание архиерейства приатъ, юностию же крепостию поощряемъ на благодеиствиа. Прежде же архиереиства в пустыни рекомеи Отни архимандрита Харитона[356] добродетелей подвигы прохожаше честный сей муж. В той бо пустыни Отни своих власовъ отъятие и мира отречение сътвори, ту и обеты Господеви въздаде; тогда тои потребами велми скуднеи еще. И понеже ту от многъ летъ постяся бе и благожизнию детелии и благодетию, и игуменьства тоя обители достоинъ бывъ, прозвитерства даръ имый.[357] Мнози же от гражанъ и честных немало пустыни тоя уединению чюдящеся и живущая в ней чтяху, наипаче же игумена ихъ, сего Иону, зело любяще, добрыми делы яко светящася мужа видяху и смирениемъ украшена, многым разсудителна же и незлобива, в простоте ходяща, по апостолу. Тем же и спомогаху ему от имений своих, той же приходящая ему имениа не собе сокровищьствует, но въ общину всем живущимъ ему полагает, имиже и обители помощь умышляет; потребная той пристраяет, и приходы искуповая, якоже и иныя обители стяжаша.