Том 7 (Вторая половина XV века, литература эпохи исторических размышлений)

Тем же и московьстии князи много любяху его и с говениемъ почитаху, и писаниа множицею посылаху к нему, и от него въсписаниа желанно приимаху, беяше бо и разуменъ и в словех благъ. Множицею аки и пророчески вещати ему. Егда кои увещаваеми симъ къ смирению и не преклоняхуся на послушание, запрещениа кая темъ наложити възвещаваше, и словесемъ его не погрешати николиже, и кротце ему на лукавыа отвещавающу. И сего ради вси велможи говение велико к нему имеяху, елма самому ему зело благонравну и благодеиву. И в толице высости сановнеи мужю древню и сединою многою украшену, гнева же и гордениа в немъ николи же имуща видяху, велику честь и боязнь к нему соблюдаху.

Прииде же московский князь в Великий Новъград Василей, сынъ Василиевъ, и с нимъ сынове его Георгий и Андрей мирно.[368] И архиепископа посещая и дани своя приемля. Преже бо двократы при блаженнемъ Еуфимии ратию приходивъ беяше, тогда же миром приде и часто съ архиепископомъ беседоваше и вся по прошению его творяше князь, ведый великую его добродетель, и словесе устъ его непогрешателное. И любя зело, почиташе его князь, аки отца, и послушаше его въ всемъ. Тогда же и великое чюдо преподобнаго Варлама сотворися на постелници княжемъ Григории, иже рязаньских боляръ сынъ[369]: от смерти бо того паки жити възведе и от тяжкиа болезни нецелимыя вскоре здрава его показа. Сему чюдеси самовидци быша — все множество градское и москвичь, всех бывших тогда въ граде, и архиепископъ и князь самъ и сынове его, и иже о нем боляре и воеводы. И сие умысли архиепископъ Иона в вечныя памяти вписати на увидение последним родовомъ, еже и сотвори. Пахомию тогда попу сербину, от Святыя Горы пришелцу[370] живущу у него, книжным слогням искусну. Сему повелевъ списати чюдо сие преподобнаго Варлама, одаривъ его множеством сребра, куны[371] же и соболми почтивъ зело Пахомиа. Повеле же и житие с похвалным словом и канонъ преподобному Варламу списати, еще же и великому Ануфрию такоже последование бдению списати повеле, яко храму его внутрь Отни пустыни сущу, еиже и ктиторъ[372] именовася блаженный. Повеле же каноны[373] и житиа списати и еще блаженныя княгини Олги началницы христианству в Рустеи земли, иже въ святом крещении Елена наречена, и преподобному Саве, создавшему монастырь на Вешере реке,[374] и преже его бывшему архиепископу блаженному Еуфимию. Не пощадевъ имениа множество истощевати светлости ради памятем Божиих угодникъ, аки к ним прильпнувъ кто беше и добродетели их яко любя, сего ради зело почиташеть я.

Бысть же зовому быти блаженному архиепископу нашему Ионе митрополитскымъ архиепископом Ионою и князьми Василиемъ и Иваном в Москву к себе ити.[375] Ионе же архиепископу нашему и старостию одерджиму яко труд великъ ему к толице долготе путние, обаче жалость людей своих понуди его толикъ труд пути подъяти. Ведяше бо ковъ на люди своя и на град зависти око поощряемо, подвижеся со обычною своею простотою и смиренемъ помощи граду и людемъ — добрый воистину пастырь душу свою за овца своя готовъ положити! Бывшу же ему близ Москвы аки шестьдесят поприщь,[376] въспомянувъ Сергиа преподобнаго,[377] иже в Маковце. Ту к нему завещание положи, любве юже отдавна имея и храмъ почести съ избранными равно преподобнаго, не бяше бо и еще храма где въ имя преподобнаго Сергиа.

Егда же приближающю ся блаженному ко граду Москве аки за три поприща, ту устретоша его неции отъ боляръ княжих повелением князеи и неколико честных игуменъ повелениемъ митрополита. И вшедшу ему въ град любезно прият бысть блаженным Ионою митрополитомъ и зело почтенъ. Приде же и къ князю, тако же любезно прият бысть и лепотною честию почтенъ усретенми частыми светлыми: вне двора княжа и внутрь боляры, на степенех же сынове княжи по чину своему усретаху и под руцы водяще его, в преддверия же и самъ князь изыде въ сретение архиепископу и поддержа десницю его князь, вниде с нимъ в княжьская своя храмы. И елики тяжести даровъ принесены быша архиепископомъ радостно прият князь. Елико же пребысть время в Москве, многою честию присно почитаемъ и от князя и митрополита и собирающеся церковная исправляху. Медлящу же князю отпустити архиепископа нашего Иону въ град свой, яко жалящу князю на град его, тем же и запиная от мнозе ему.[378] Та же и множицею посылаше наречие князь архиепископу боляры своими ласкаше и жаля на гражаны его, аки не по нелепоте от них чтомъ, и аще посулит ему въздвигнути руку на град свой.