Том 7 (Вторая половина XV века, литература эпохи исторических размышлений)

Некогда же бывшема вкупе, князю Василию и сынове его князю Ивану и преподобныма архиепископома Ионе митрополиту и владыки нашему Ионе, велику жалость князь изложи предъ святители на Великий Новъград, аки презираемъ от него, а ему великого княжениа власть над князьми рускими предержащу и сего ради искаше подъяти руце на Великий Новъград. Иона же владыка отвещаваше за град и многа утешителная словеса въ увещание князя предглаголаше. Елма же князь неутешиму жалость имея ярость приимаше помногу, тогда старець подвих ся духомъ, свидетеля полагая митрополита, паче же самого того иже священьства духа аки зря, и вещаше, аще не приведеть от града его зависти ока, не приложит на любовную детель и презре молящася его о граде, въздвигнеть руку на послушныя его люди и ничемже обидевшая его разделяти неправедно произыдет, — да вонмем и себе, — егда како и в чадех его зависти око узрит коеи разделениа последи близ будеть. «Ныне же молитву мою услыши, — глаголаше, — и блажаишее въсприими, яко князь благочествъ паче же и над князи много благодеяти мощну сущу. Неправды коея клевет ради нечестивых языкъ на правдивыя не подвигни и тихима очима своя повинныя сматряй и свободныя на работу приимати не начинай. Тебе самому дние приближаются, яко сынови же твоему Ивану хоругви рускиа съдержати, о семъ молитвы со всеми своими къ всесилному Богови прилежно възносити потщуся. Наипаче же свободу сынови твоему от ординьских царей приати от Бога испрошу за свободу града моего, еже о тебе, еще же молитвую Господеви възвысити десницу сына Твоего над всеми и покорити ему вся супостаты его, и больши прародителей прославитися властию и укрепитися княжению его в руку его и простертися силы его на многы, и страны великиа приати ему точию аще благочестиве поживет, и тихима очима владомыя смотрети будеть».

О сем пророчестве святителя старца услади князь и возвеселися зело о обещании свбоды сынови своему отъ ординьских царей, ведый непогрешателное словесъ его. И внят о чадех любезных радостно, пред митрополитомъ обеща архиепископу снабдети люди его, и всякъ гневъ отложивъ, миръ Великому Новуграду дарова, утвердивъ смирение. Прошаше же князь у святителя тверду быти обещанию Ионину сынови его. Споспешествоваше же вси еи блаженныи митрополитъ, и тако уповавшу Господню обещанию, якоже въ святемъ Евангелии сказася: «Аще два отъ вас совещаетася о всякой вещи, еже аще просита, будеть вама отъ Отца моего Небеснаго, моляще же ся отпущаите аще что имате на кого».[379] Сице князь жалость и гневъ остави граду. Святителя же тезоименная молитися совещаста о прошении князя, еже приати свободу отъ мучительства ординьских царей и татаръ и укрепитися в руку его руским хоругвам. По умолчании же всех прослезися всеосвященны старець и проплака. Князь и митрополит о семъ велми дивящеся желеста увидети от него вину плачя его. Той же рече: «Кто озлобит людии моих толикое множество или кто смирить таковое величество града моего, аще не усобицы их смятуть их и разделение их низложить их, и лесть неправды расточить их, и лукавьство зависти развееть их. Обаче во дни моя да дасть Господь мир и тишину и благословение людемъ моимъ». Тогда же архиепископъ Иона прошение предложи у обою князю монастырю своему управити суди, да снабдимъ будеть от насила многых и от самех наместниковъ их и сами, и поселяне, и работницы монастырьстии все да не судими будуть. Проувиде бо духомъ, яко людемъ его невозможно до конца содержати в свободе града своего продерзовающияся ради неправды в них и насилиа, сего ради взыска Отни пустыни свободу во векы. Князи же таковое прошение радостно даруют, архиепископу грамоту списавше таковаго повелениа и печятавше обою князю въображениемъ надвою позлащеною печатию. Тогда же и самъ князь Василие веровавъ обещанным ему от святителя, духовную грамоту списа, уставляа сыномъ своим и жене своеи грады во власти и како дани подаяти тем великому их князю, вящшему сынови его Ивану. Егда и еще ординьстии цари шатающеся будуть и яко не даяти тем темъ дани великому их князю внегда потребить Господь с лица руских князей.

И тако съ многою честию и говениемъ князи отпустиша архиепископа нашего Иону. И светло провожение преподобному князь и сынове его и боляре их сотвориша. И блаженныи Иона митрополитъ многу любовь к нему имея, такоже и князи великою любовию обиаты зряще на немъ во смирении великъ разумъ и кротость благообычаиное нрава. Съ сими же и добродетелна старца помногу толика благодать от Бога даровася ему пред всеми зрящими его и слышащими, никтоже возборашеть его, но паче говеяху к нему стыдящеся добродетелии его и вси боящеся непогрешателнаго словесе устъ его.