Том 7 (Вторая половина XV века, литература эпохи исторических размышлений)

Пришедъ же отъ Москвы абие чюдесному Сергию отцу завещание исполняет: храмъ каменъ внутрь епископиа во имя его созда.[380] И всею лепотою утвори и образ его постави в ней, яко много любя преподобнаго, часто въ храмъ его приходя молитвы творяше священныя. Не по мнозе же посолъ борзоходный отъ митрополита Ионы прииде къ архиепископу Ионе, книги нося поведающая постигшую болехнь святителя и ожидание блаженныя кончины его. И того ради моляшеся насладитися видениа его и утешитися о семъ, еще же да произбереть достойнаго на высокий престолъ митрополии епископа, да некое лукавьство предваритъ, вместо достойнаго нетакова. Самого же честныма си рукама гробу предасть и рукуположит митрополии епископа. Сиа книги митрополича прочет архиепископъ, проплакавъ на мнозе, рече: «Великиа благоты отщетевается Москва ныне и с нею вся Руская, таковую доброту мирови скрывая под землю». Абие же Иона архиепископъ митрополиту Ионе вписа книги, поведующая окрочение и самому старостию, яко болезнени нозе имея. Обеща же ся ему насладитися видениа его по отложении телесе на воскресение общее святыхъ: «Болши ми тогда срадоватися ему въсприимающи мзду трудов своих, от началника пастыремъ». О произведении же епископа в митрополию, его же духъ его произбереть и благословить, самъ того готовъ приати.

По успении же преподобнаго святителя митропольскаго Ионы архиепископъ Иона понудивше помяновеннаго Пахомиа иже от Святыя Горы мниха попа списати последование «памяти» его и службы канонъ священному Ионе митрополиту, ведяше бо его добродетели. Сего ради и память его каноны почте, равно со святыми. Много же понужаше Пахомиа Иона, утешая его и златомъ и соболми, да спишеть ему и еще канонъ преподобному Сергию, да уяснитъ память въ храме его. Пахомие же не рачи послушати архиепископа, но готовяшеся самъ ити в Московскиа страны. Повнегда бо списати ему канонъ блаженному Ионе митрополиту, в немже и назнамена в краех тропарем[381] яко повелением архиепископа Ионы списа каноны митрополиту Ионе. Самъ тои к тому невозможе его принудити писати или житиа или канонъ: ни Михаилу Клопскому, ни иному, ни единому же, емуже хотяше память уяснити архиепископъ. Излиха бо Божиим угодником теплъ беаше Иона, якоже и предварше сказахомъ.

По преставлении же великого князя Василиа сынъ его Иванъ княжениа хоругви приемъ, абие посылаеть ко блаженному Ионе архиепископу в Великий Новъград, моля его молитвовати за нь ко всесилному Богови, якоже преже обещася, въ еже утвердити княжение его и възвысити десницу его надъ врагы его и во всемъ поспешитися. Еще же и освобожении и мучительства отъ ординских царей и татаръ. Архиепископъ же Иона възда ему наречие, яко не погрешитъ надежа да помнить же несумнение отца своего, како веровавъ и в духовной своей вписа и заповеда не истязати ему дани и по изведении Орды на братии его. И яко Господь не презрит скорбящихъ слезъ и молитвъ многых, и име же весть судбами, проженет Орду, точию самъ да честиво поживет и тихима очима власть свою правити. Прочее же и паки воспоминает о монастыри своемъ о Отни пустыни, да дарует и той грамоту свободную и суд свой утвердить по отца его грамоте монастырю, и печатию да утвердить. Таковое наречие князь Иван от архиепископа слышавъ и прошение его внявъ с радостию, еже о монастыри его исполняетъ даровавъ имъ грамоту и свою по отца своего грамоте. И съ свободою суд свои утвердивъ имъ, якоже и преже в грамоте отца его князя Василиа. И изваянемъ позлащеномъ воображениемъ князя печать грамоте надставив да не колебимо в векы повеление его пребудеть.

Не точию же московьстии князи велиции к сему преподобнику многою любовию упространишася, но и тверьстии, и литовьстии, и смоленьстии, и полотстии, и немецстии, и вси, и вси округъ седящии страны во вся лета епископьства его тверду любовь имеяху к нему, и миръ великъ к Великому Новуграду имеяху такоже и ко всемъ пределомъ его. И глубоку тишину вся страна та приятъ и не беяше слышаниа рати во вся дни его.

И гражане любовъ зело между собою поучениемъ его имуще, никако же николиже усобныя брани воздвигоша между собою. Благоплодны же земля зело паче первых летъ и гобизнено по всеи земли Ноугородцкои и Псковскои и плодовито всеми овощми бысть зело.

Такова благослвениа обилна молитвами его Господь Богъ дарова граду нашему, и многоя благодаты вси насладишася, радость и веселие всемъ беяше, и не бяше вражды ни мятежа, но тихость и миръ и любы во вся лета епископьства его.