Том 7 (Вторая половина XV века, литература эпохи исторических размышлений)

Тогда честному Ионе епископу рязаньскому[362] митропольскиа архиепископиа власть своими управися епископы, и той преподобный архиерей Иона митрополиа правя. Древле наречену бывшу ему в митрополию рускую, и благословение патриарше преже принесено ему о семъ, еще живу сущу митрополитскому архиепископу. Ради царей ординьских шатаниа и насилиа татарьская неудобенъ путь къ Царюграду. Еще же и бывшаго ради лукавьства Митяева изволиша общею волею благословение напред приимати,[363] поставленую произбираемымъ в митрополию и рукоположениемъ епископьства преже почтену бывшу донеле же живущу митрополиту. Умершу же тому тогда готову сущу нареченному и без труда многаго, епископу сущу, управят митрополию. Посему управися митрополиа честному Ионе епископу рязаньскому по Исидоре митрополите. Сему же Исидору не по правилу пришедшу,[364] но насильствомъ наскочившу на престолъ, преже бо его пронареченъ на престолъ Иона. Сего ради епископьством усаненъ сей Иона митрополит. Сей же о нем епископъ честнаго собора архиепископа Великому Новуграду нашего Иону радостно подастъ. Доброта бо в нем честных детелий светяшеся и толико подвижеся добродетелми на престоле своемъ, яко мнети его самого Еуфимиа или иже преже преподобно епископьствовавших. Вся бо епископьская тщашеся доброчести исправити и вся на добру жизнь управитися учаше. Самъ первие воображашеся доброжизниемъ и очи свои положи на вдовыа, сироты и на убогыя града, яко сему Иевова приглаголати: «Уста вдовыа благословиша мя, бых сирым аки отець. Не помолчях смирити нечестива, ни увратих суда силнаго ради и много мстих на насильствующемъ, и зяхъ от руку грешничю смиренаго, изведох суд нищему».[365] Ако просвети жизни своея доброту, яко видевшим добрыа его дела и славити его ради Бога Отца по евангельскому гласу.

Изволи же ся честному отце Ионе архиепископу нашему поновити обитель архимандрита Харитона Отню пустыню, в неиже древле постися, от приходящаго ему имениа, но не от церковнаго стяжаниа. От негоже церкви великая строение приемлеть, и епископи и причетницы удовляются, и нищии назирание приемлють. Тогда бо всею лепотою все исполнено в велицей церкви и вси урочнии причетницы удовляеми, не лишаеми же и нищии от сего, и невредимо имение то снабдимо бе. Тому же особъ приходящее имение избываемо, имже обнови великодарною десницею Отню пустыню. И лепу церковь камену Богови тамо възвидже въ имя святых триех святитель: Василиа Великаго, Григория Богослова, Иоанна Златаустаго;[366] многою лепотою украсивъ тую хитрых живописец, священныя иконы поставивъ в ней, ихже добреиши не обретеся инъ живописець в то время и во дни наша. Такоже вся стены церкви и столпы нарочитыми живописцы подписа и весь олтарь, и пол мрамореном плинфомъ[367] всюду помостивъ. Наипаче же священными книгами преисполнивъ тую: святая Еуангелиа съ златыми писмены и сребром позлащеном хитро покова с каменми честными. И священныа съсуды и от камене изборна и от сребра чиста положи, и священныя одежа светлыи многы украшены с жемчюги съдела. К сим же и трапезницу камену созда, присовокупивъ ей и церковь во имя святаго Николы, упокоениа ради в зимныа мразы не могущим терпети. Еще же и славному Предтечи церковь созда, к паперти Трем святитель церкви приткнувь, возведе основаниа каменемъ и плинфомъ, да иже до комаръ, верхъ же тоя древесы покры, в неи бо гробъ себе ископа. Да не отяжгавъ каменный верхъ, и коею виною не могии поддержатися, и внутрь падшу когда повредить гробъ его и истнитъ гробная и вся яже во гробе — и тоя ради вины не камениемъ, но древом покры церковь славнаго Предтечи. Многу бо веру имяше к великому и честному Предтечи, ибо и въ имя того наречено ему сущу, и честному празднику его родити матери его приспевши. Тем же и душу прилпену к нему имея яко тако и телеси своему в храме его положитися хотяше, поручая съ душею и тело свое святому, неотторжену веру и любовь к нему известуя блаженыи. Многая же села покупи обители и рыбная заседаниа и въкупивъ и въ вся монастыря вечныя вклады за ню подавъ сребром да не достаточьная тои и оскудеваемая, тии от своих преисполнени и утешают. Многу и велику тяжесть имениа ту истощи и малу сущу обитель велику сотвори, и скудну бывшу велми обогати сию. Толико же любочестенъ о Божиих угодницех и теплъ, яко вся своя особная имениа светлости их ради истощевати. Многу же и светлу о немъ добрдеянию всюду обноситися и всем и любимъ и желаемъ, слышащим и видящим сладокъ, кротокъ бо и смиренъ по многу добродеиственъ ко всем.