Том 7 (Вторая половина XV века, литература эпохи исторических размышлений)

Сей блаженный Иона еще детску ему сущу, произбранъ от Бога въ благое, пронареченъ бывъ въ святительство Великому Новуграду. Отрочищу еще ему сущу, осиротевшу ему от родителю своею, вдовица некая, матерьски поболевьши о немъ, въспита й, приемъ того аки истовая родителница. Еюже вдану ему бывшу некоему диакону наказатися священным книгам. Еще же и нищете к сиротству присовокупившися ему, нездрава телом творяшеть его, и чястое болезнемъ приложение худость ему придаяше. Кротостное обычая и тихое нрава по многу снабдевати обыче добрыи сей, радованию же и игранию детей николи же приближатися изволи. И аще когда от учителя отхожаше съ множеством съученическим ему и улица граду кдому приходити бываше, всемъ яко детемъ игранию радующимся, той подале стояти отъ нихъ обычно имяше, егда и случашеся когда яко детску позоровати.

Единою же честному Михаилу, уродивому мирови,[358] Богови же премудрому, въ граде первое шествие творящу, детищу же сему стоящу на месте укромне, и мноземъ съученикомъ его играющим. И блаженнаго Михаила узревше, уродствено грядуща по улицы, вси детие игры своя оставльше, аки на чюдо к Михаилови притекоша, смеющеся о нем и рукающеся ему, изметаемая из домовъ сметиа на главу безумне възметаху и камение по ногах метаху ему, не знаему ему сущу тогда. Ибо преже вселениа его на Клопско и первое въ граде явившуся и ходящу в первый день пришествиа его в Великый Новъград, въ епископьство блаженнаго Иоанна, иже позлати верхъ Святеи Софии.

И блаженный Михайло, ни единоже радение о безумии детей творяше грядый, но устремися въ уголъ улицы, идеже честное детище се стояше в тихости своей. Дневному свету уже оскудевающу и вечеру бывающу, но обаче внутрениа пресветлы очеса Михаилови бываху. Притекъ бо взятъ отрочища сего за власы, и подъемъ его вышши себе, въпиаше ему: «Иване, — тако бо от святаго крещениа имя детищу — учи книгы прилежно, имаши бо великому граду сему архиепископъ быти». И, обиемъ его, отиде. Яко некогда Господь нашь Исус Христос отрочя едино пречистыма си рукама обьемъ, учаше апостолы: «Иже, рече, не смирится, яко отроча се, не прииметь Царства Божиа.[359] И приемляй таково отрочя во имя мое, глаголаше Господь, мене приемлет». Тако и блаженный Михайло Иону сего детска обьем, пророческимъ духомъ глаголаше ему внимати учению святых книгъ, именемъ нарицая, егоже николи не знааше, Иваномъ, тому приглашая. Духовныма бо очима яко настоящая смотря, по мнозех летех хотящаа ему быти, увидевъ божественым откровением пронареченное ему от Бога святительство (якоже древле и къ Иеремию пророку реченое[360] от Бога): «Зрю, яко преже реченое зачятся свем тя, и преже даже не родися, святих тя». И на семъ Ионе, помыслить кто, Божие благословение тако же бываемо.

Преподобный Михайло от далняа земля новопришед и иного отчества сый странствуя прииде в незнаемъ град ему, аще и величества ради своего вселенней всей отдавна ведомъ град и славенъ. Но той тогда первие вниде в сей Великий Новъград, никогдаже преже в нем бывавъ — како ли живущая в нем знаемы ему будуть, яже преже видены никогдаже темъ? И тако скоро, яко отдавна ему знаему, и свое присно отроча приемъ, будущая ему възвещаваше, аки послану ему ко отрочати Иванови бывшу. И аки сего ради прииде, да благословение Божие подасть ему, не чаемое никогдаже, чисту сердцемъ преподобнику сему и Божиа яко зрящу по Божию словеси. «Блажени бо, — рече, — чистии сердцемъ, яко теи Бога узрять».[361] Темъ же не сматряше телесныма очима сиротьства и убожества и худости отрочищу, но яко съвет Господень разуменъ ему, и сердечныма очима зря лежащее на немъ благословение. Моляще его и повелеваше прилежно учити книгы, яко хотящу епископьствовати, и подобаеть многое множество божествеными просвещати, яко всем на нь зрящимъ, да некако не внемлемъ священныхъ книгъ разума. Многому медление подасть препятие кое добрых желательству не по нелепоте сана. Тако тогда прорече и заповеда Ионе детищу и еще чюдный Михайло.

И летомъ мноземъ текущимъ и самому пророку почившу, и Иону старость преимаше, обаче слово Божиа человека не мимо хожаше и время прореченое надстояше. По успении бо честнаго Еуфимиа жребием и нарокомъ всех людий и изволениемъ всего собора Божие наречение архиепископьства прииде на Иону, и въ епископию възведоша его, радующися добродетели мужа и красящеся добронравиемъ того. Утешение приемше по добромъ своем пастыри Еуфимии Ионою к митрополитскому послы с ним абие послаша архиепископу и къ князю, молящеся желаемаго имъ пастыря рукоположити.