Том 7 (Вторая половина XV века, литература эпохи исторических размышлений)

Не словом же кайся, а въ сердци ина помышляй, не приимлет бо Богь таковаго покааниа, но точию же словом, то и сердцемь. Яко же благоразумный разбойник на кресте не в долзе времени, но единем словом спасенъ бысть, истинно, всем сердцемъ позна свое согрешение к Творцу возпий: «Помяни мя, Господи, егда приидеши во царствии сии».[851] Но милостивый и щедрый Господь не токмо согрешениа прости ему, но и раю наследника сотвори его. Сицевому поревнуй покаанию, истинное бо покаяние — престати от греха. Аще убо сице покаемся, и тако же помилует ны милосердый Господь, и не токмо свободит и избавит, яко же древле израильских людей от лютаго и гордаго фараона, нас же, новаго Израиля, христианских людей, от сего новаго фараона, поганого Измаилова сына Ахмета, но нам и их поработит. Яко же древле согрешающии израильтяне к Богу, и поработи их Богъ иноплеменником; егда же покаахуся, тогда воставляет имъ Богъ от их колена судиа и избавляаше их от работы иноплеменник, и работаху имъ иноплеменници. Яко же се, егда работаху въ Египте, и избави их Господь от работы египетскиа Моисеом, рабом своим. Потом же дарова имъ Господь Исуса сына Навгина, еже и введе их в землю обетованиа, прием 29 царствъ, и вселишася ту. И по сем согрешиша сынове Израилеви Господу Богу, и Господь Богъ предасть их в работу в руце врагом ихъ. И пакы покаашася, и постави имъ Господь Богъ Июду от рода их, и изби хананея и ферзея и поима царя их Аданивезека.[852] И повеле Июда Аданивезеку отсещи по запятье руку его и плесне ногу его. Сей же Аданивезек самъ глаголя: «Седмидесят царем отсекох конець рукам ихъ и окорнени збирахуся под трапезою моею; яко же бо сътворих, тако же и отда ми Богъ». И приведоша и во Иерусалимъ и умре ту. Июда же не усумневся и не рече тако, яко не царь есмь сый, ни от рода царьскаго, како царю съпротивлюся, но на Бога надеяние и всю надежу имеа, царя царем побежааше. Поимав же и казнию повелев казнити его, и взя землю их, поработи их сыном Израилевом. И паки, егда согрешаху сынове Израилеви Господу Богу, тогда предааше их в руце врагом ихъ и работаша имъ. И егда покаашася, тогда воставляше имъ от рода их судиа, яко же се глаголю Годаниила, и Аода, и Девору с Вараком, и Гедеона, погубившаго трема сты множество тысящь мадиамлян, даже и до Самсуна,[853] убившаго ослею челюстью тысящу муж. И иных многых въставляше имъ Богъ и избавляаше их от работы иноплеменник, и работаша имъ иноплеменници.

Ныне же той же Господь, аще покаемся вседушевно престати от греха, и возставит нам Господь тебе, государя нашего, яко же древле Моисиа и Исуса и иных, свободивших Израиля. Тебе же подасть нам Господь свободителя новому Израилю, христоименитым людем, от сего окааннаго, хвалящагося на ны, новаго фараона, поганаго Ахмата. Но его велеречие покорит Господь под нозе твои и послет ти способникы, аггелы своя и святыя мученикы, и смятут ихъ, и погибнут. Тем же и пророческии рещи, Богом утверженый царю, — напрязи, и спей, и царствуй истинны ради, и кротости, и правды; и наставит тя чюдне десница твоя,[854] престолъ твой правдою, и кротостью, и судом истинным свершен есть,[855] и жезл силы послет ти от Сиона, и удолееши посреди враг твоих.[856] Тако глаголет Господь: «Аз воздвигох тя, царя правды, призвах тя правдою и приях тя за руку десную, и укрепих тя, да послушают тебе языци. И крепость царем разрушу, отворю ти двери и гради не затворятся. Аз пред тобою поиду и горы поравнаю, и двери медныа сокрушу, и затворы железныа сломаю».[857] Се твердое, и честное, и крепкое царство дасть Господь Богъ в руце твои, Богом утвержденый государю, и сыновомъ сыновъ твоих в род и род в веки.

Тем же убо от чистыа веры, молитвою к Богу день и нощь, въ молитвах и молбах, литиами и соборы святительскыми, и божественными возношенми вашими, потребную и лепую память о благочестивей вашей державе и царскиа вашеа победы исповедаем во святыхъ тайнах, яко да покорени будут врази ваши под ногами вашими и да одолеете среди ратных. Да разсыплются поганыа страны, хотящая брани, от Божиа молниа омрачаеми, яко пси гладни языки своими землю да лижют, и аггель Господень буди поганяа их.[858]