Том 7 (Вторая половина XV века, литература эпохи исторических размышлений)

Тако же убо и ныне, аще поревнуеши своему прародителю, великому и достойному хвалам Димитрию, и тако же потщися избавити стадо Христово от мысленаго волка, и Господь Богь, видевъ твое дерзновение, такожде поможет ти и покорит врагы твоя под нозе твои. И здрав и ничим же врежен победоносець явишися Богу съхраняющу тя, и осенит Господь над главою твоею въ день брани. Аще ли убо ты, о крепкый, храбрый царю, и еже о тебе христолюбивое воиньство до крове и до смерти постражут за православную христову веру и за Божиа церкви, яко истиннии присная церковная чада, в ней иже породишася духовною и нетленьа банею, святым крещениемъ, якоже мученици своею кровию, блажени бо и преблажени будут в вечном наследии, улучивше сие крещение, по немже не възмогут согрешити, но восприимут от Вседержителя Бога венца нетленны и радость неизреченную, ихже око не виде и ухо не слыша, и на сердце человеку не взиде.[847] Яко же первии мученици и исповедници, тако сии последнии будут, бо рече Господь: «Первии последнии, а последнии первии».[848]

Аще ли же еще любопришися и глаголеши, яко: «Под клятвою есмы от прародителей, — еже не поднимати рукы противу царя, то како аз могу клятву разорити и съпротив царя стати»,[849] — послушай убо, боголюбивый царю, аще клятва по нужди бывает, прощати о таковых и разрешати нам повелено есть, иже прощаем, и разрешаем, и благословляем, яко же святейший митрополит, тако же и мы, и весь боголюбивый събор, — не яко на царя, но яко на разбойника, и хищника, и богоборца. Тем же луче бе солгавшу живот получити, нежели истинствовавшу погибнути, еже есть пущати тех в землю на разрушение и потребление всему христьанству и святых церквей запустение и осквернение. И не подобитися окаанному оному Ироду, иже не хоте клятвы преступити и погибе. И се убо который пророк пророчествова, или апостол который, или святитель научи сему богостудному и скверному самому называющуся царю повиноватися тебе, великому Русских стран христьанскому царю!

Но точию нашего ради согрешениа и неисправления к Богу, паче же отчааниа, и еже не уповати на Бога, попусти Богъ на преже тебе прародителей твоих и на всю землю нашю окаанного Батыа, иже пришед разбойнически и поплени всю землю нашу, и поработи, и воцарися над нами, а не царь сый, ни от рода царьска. И тогда убо прогневахом Бога, и Богь на ны прогневася и наказа нас, яко же чадолюбивый отець, по глаголющему апостолу: «Егоже любит Господь, наказает, бьет же всякого сына, егоже приемлет».[850] И се убо тогда и ныне той же Богъ и в векы, потопивый фараона и избавлей Израиля, и преславная съдеявы. И аще убо, государю, покаешися от всего сердца и прибегнеши под крепкую руку его, и обещаешися всем умом и всею душею своею престати от первых твоих, еже прилучитися, яко человеку, согрешити. Человечьско бо еже согрешати, рекше падати, и покаанием возстаати, аггельское же не падати, бесовское же не возстаяти и отчаятися. «И сотвориши суд и правду посреде земля». Любов же имети ко ближним и не насиловати никому же, и милость показати к согрешающим, да милостива Господа обрящеши в день зол.