Том 7 (Вторая половина XV века, литература эпохи исторических размышлений)

Помысли убо, о велеумный государю, от каковы славы и в каково безчестие сводят твое величество! И толиким тмам народа погыбшим и церквам Божьим разореным и оскверненым, и кто каменосердечен не въсплачется о сей погыбели! Убойся же и ты, о пастырю, не от твоих ли рук тех кровь взыщет Богъ, по пророческому словеси? И где убо хощещи избежати или воцаритися, погубив врученное ти от Бога стадо? Слыши, что пророк глаголет, яко: «Аще взыграешися, яко орелъ, и аще посреде звездъ гнездо свое сътвориши, то и оттуду тя свергу, рече Господь».[832] И ин же глаголет: «Камо поиду от духа твоего и от лица твоего камо бежу; аще възыду на небо, ты тамо еси, и в последних моря рука Божиа наставляет и удержит десница».[833] И где паки отходиши, пастырю добрый, кому оставляеши нас, яко овца не имущи пастыря? Мы же надеемся, яко не отринет Господь людий своих и достояниа своего не оставит.[834] Не послушай убо, государю, таковых, хотящих твою честь в безчестие и твою славу в беславие преложити, и бегуну явитися и предателю христьанскому именоватися. Но отложи весь страх и возмогай о Господе, о державе и крепости его; «един бо поженет тысящу, а два двигнета тмы».[835] По пророческому словеси: «И не суть бо бози их, яко же Богъ наш».[836] И рече Господь: «Где суть бози их, иже уповаша на ня, яко близ день погыбели их».[837] И паки: «Лукъ силных изнеможе, а немощни препоясашася силою»; «Господь мертвит и живит», и «Дасть крепость князем нашим, и възнесет рогъ Христа своего».[838] И паки: «Близ Господь призывающим и, всем призывающим и воистинну»[839] и «не в силе коньстей въсхощет, ни в лыстех мужьскых благоволит, благоволит Господь на боящихся его и на уповающих на милость его».[840] Слыши, что глаголет Димокрит, философом первый: «Князю подобает имети умъ ко всем временным, а на супостаты крепость, и мужество, и храбрость, а къ своей дружине любовь и привет сладок».[841] Въспоминай же реченная неложными усты Господа Бога нашего Исус Христа: «Аще весь миръ человекъ приобрящет, а душю свою отщетит, и что дасть измену на души своей!»[842] И паки: «Блаженъ человекъ, иже положит душю свою за другы своя».[843]

И сей убо, яко слышим, безбожный сей агарянский язык приближися ко странам нашим, къ отечьству тии. Уже бо многыа сумежныа странам нашим поплени и движется на ны. Изыди убо скоро, въ сретение ему изыди, взем Бога на помощь и пречистую Богородицю, нашего христианства помощницю и заступницу, и всех святыхъ его. И поревнуй преже бывшим прародителем твоим, великим князем, не точию обороняху Русскую землю от поганых, но и иныа страны приимаху под себе, еже глаголю Игоря, и Святослава, и Владимера,[844] иже на греческих царих дань имали, потом же и Владимира Манамаха, како и колико бися съ окаанными половци за Русскую землю, и инеи мнози, иже паче нас веси.

И достойным хвалам великый князь Дмитрие, прадед твой, каково мужьство и храбьство показа за Доном[845] над теми же окаанными сыроядци, еже самому ему напреди битися и не пощаде живота своего избавлениа ради христьанскаго! И видевъ милосердый человеколюбивый Богъ непреложную его мысль, како хощет не токмо до крове, но и до смерти страдати за веру и за святыя церкви, и за врученное ему от Бога словесное стадо Христовых овець, яко истинный пастырь, подобяся преже бывшим мученикомъ. Святии бо мученици на страданиа и раны любве ради Божиа, якоже на пищу, святии на смерть течаху. Тако и сей боголюбивый и крепькый смерть яко же приобретение вменяаше. Не усумнеся, ни убояся татарьскаго множества, не обратися въспять, и не рече въ сердци своем: «Жену имею, и дети, и богатество многое; аще и землю мою возмут, то инде вселюся».[846] Но без сомнениа скочи в подвигъ и напред выеха, и в лице ста противу окаанному разумному волку Мамаю, хотя исхытити от устъ его словесное стадо Христовых овець. Тем же и всемилостивый Богъ дерзости его ради не покосне, ни умедли, ни помяну перваго его съгрешениа, но въскоре посла свою помощь, аггелы и святыя мученикы, помогати ему на супротивныа. Тем же Господа ради подвизавыйся и доныне похваляем есть и славим, не токмо от человекъ, но и от Бога. Аггелы удиви и человекы возвесели своим мужеством, и с подвизающимися ему иже до смерти, от Бога согрешением оставление приаша и венци мученичьскыми почтени быша, равно якоже первии мученици, иже веры ради пострадаша от мучителей, исповеданиа ради Христова умроша. Сии же такожде и в последнее время за веру и за церкви Божиа умроша и равно с сими венца приаша. А иже тогда от супротивных уязвляеми и по победе живи обретошася, сии кровию своею отмыша первая съгрешения и яко победители крепци врагом явишася, и великим хвалам и чести достойни быша не токмо от человекъ, но и от Бога.