Том 7 (Вторая половина XV века, литература эпохи исторических размышлений)

Нашедшая ради нынешняя скорби и бед от безбожных варваръ, Богу тако изволшу нашего ради согрешениа, и тебе убо, государю нашему, приехавшу во царствующий град Москву ко всемилостивой госпоже Богородици и ко святым чюдотворцем помощи ради и заступлениа, и ко своему отцу митрополиту, и ко своей матери великой княгине, благоверным князем и богочтивым бояром добраго ради совета и думы, еже како крепко стояти за православное христьянство, за свое отчьство противу безбожному бесерменству. Тебе же, государю нашему, повинувшеся молению и доброй думе и обещавшуся крепко стояти за благочестивую нашу православную веру и оборонити свое отчьство от бесерменьства, духъ еже лстивых, шепчюще во ухо твоей державе, еже предати христьянство, никако же послушавшу, обещавшу ти ся. И митрополиту со всем боголюбивым собором тебя, государя нашего, благословившу и знаменавшу,[822] вкупе же и сие прирекшу: «Богъ да сохранит царство твое силою честнаго креста своего и дасть ти победу на враги, и покорить под нозе твои вся сопротивныя твоя, яко же древле Давыду и Костянтину,[823] молитвами пречистыя его матери и всех святых».

Токмо мужайся и крепися, о духовный сыну, яко же добрый воинъ Христов, по евангельскому великому господню словеси: «Ты еси пастырь добрый, душу свою полагает за овца. А наимник несть, иже пастырь, ему же не суть овца своя; видит волка грядуща, и оставляет овца, и бегаеть; и волкъ расхитит и распудить. А наимник же бежить, яко наимникъ есть, и не радит о овцах».[824] Ты же убо, государю, духовный сыну, не яко наимник, но яко истинный пастырь, подщися избавити врученное тебе от Бога словесное ти стадо духовных овець от грядущаго волка. А Господь Богъ укрепить тя и поможет ти, и все твое христолюбивое воинство. Нам же всем вкупе рекшим: «Аминь», еже есть: «буди».

Тако Господу помогающу, тебе же вся сиа, государю нашему, на сердци своем положшу, яко истинный добрый пастырь. Взем Бога на помощь и пречистую его матерь, и святых его, и святительское благословение, и всенародная молитва, крепко вооружився силою честнаго креста, исходиши противу оному окаанному мысленому волку, еже глаголю страшливому Ахмату,[825] хотя изхитити из уст его словесное стадо Христовых овець.

И по твоем отшествии, государя нашего, святителем, митрополиту, вкупе же и нам, богомолцем вашего благородиа, со всеми боголюбивыми съборы молитву непрестанно сътворяющим, по всем святым церквам всегда молебены и святую службу во всей нашей отчине о вашей победе съвершающим, и всем христианом непрестанно Бога молящим, дабы даровал тебе победу над супротивныа ти врагы, иже и надеемся улучити от всемилостиваго Бога.

Ныне же слышахом, яко же бесерменину Ахмату уже приближающуся и христианство погубляющу, наипаче же на тебе хваляшеся и на твое отечьство, тебе же пред ними смиряющуся и о мире молящуся,[826] и к нему пославшу. Ему же окаанному одинако гневом дышущу и твоего молениа не послушающу, но хотя до конца разорити христианство. Ты же не унывай, но възверзи на Господа печаль твою и той тя укрепит.[827] «Господь бо гордым противится, смиреным же дает благодать».[828] Прииде же убо въ слухы нашя, яко прежнии твои развратници не престают, шепчуще въ ухо твое льстивая словеса, и совещают ти не противитися сопостатом,[829] но отступити и предати на расхищение волком словесное стадо Христовых овець. Внимай убо себе и всему стаду, в немже тя Духъ Святый постави.

О боголюбивый вседержавный государю, и молимся твоей державе, не послушай таковаго совета их, послушай убо вселенныа учителя Павла, глаголюща о таковых: «Открыется гнев Божий с небесе на всяко нечестие и неправду человеком, иже истинну въ неправде держащим, но осуетишася помышленми своими и омрачися неразумное их сердце. Глаголюще быти мудре, обьюродеша и якоже не искусиша Бога имети в разуме, предасть их Богъ в неискусен умъ творити неподобная».[830] И паки самому Господу глаголющу: «Аще око твое съблажняет ти, исткни е», или рука или нога, отсещи повелевает.[831] Не сию же разумевай видимую и чювьственую свою руку, или ногу, или око, но ближних твоих, иже советующих ти неблагое, отверзи далече, отгони, сиречь отсецы и не послушай съвета их. И что убо совещают ти льстивии сии же лжеименитии, мнящеся быти христиане, но токмо еже повергше щиты своя, нимала съпротивльшеся окаанным сим сыроядцом, предав христианство и свое отечьство, яко бегуном скытатися по иным странам.