Том 7 (Вторая половина XV века, литература эпохи исторических размышлений)

В то же время неки купецъ, зело богатъ, именем Дмитрей,[1072] йсхожъдаху ему ис Царяграда[1073] с нимъ же быстъ рабовъ множества, и с нимъ быстъ сынъ его единочадны, младъ возростамъ. Плавалъ же по морю 8 месяцавъ, внезапу воста ветрь великъ и носяше корабль волною, и узреша изьдолече видивъ гратъ великъ, и возрадовашеся радостию великою, и обратися, и присташа во присьтаниша короблиное. И виде множества короблей, помыслиша в себе, яко великъ сей гратъ и богата земля, купцовъ многа. Сниде купець Дмитрей с коробля своего, иде во гратъ, и стретоша его граждене и рекоша ему: «Откуды, господине, и коея веры еси?» И рече купецъ Дмитрей: «Азь есмь християнин греческия веры от преслоушаго града купець греческия веры!» — «Купче, единыя еси греческия веры с нами, толка за наша прегрешения имеемъ у себе царя законоотступника латынския веры, томитъ нась, хотя привлеши во свою латынъску веру! Видеши, господине, — приходетъ купцы со всехъ странъ, хотяше торговать!» — «Вемъ!» — «Царь же повеле имъ три загатки отгадать, приводя ихъ к своей латыньской вере: не можетъ имъ техъ три загатки отгадатъ, — и за то всажены быстъ в темъницы! Мы же имели у себе учителя, потриярха Анфилофия, царь же откоянны, не вемы камо, сослалъ его въ заточения!»

Купецъ же Дмитрей, слышавъ токовыя глаголы от гражденъ, возвратися на корабль свой и хотя отплытъ от града того, и приди на корабль свой, а ужъ на корабле его стоятъ сторожи царевы, понеже закон токовъ царевъ: егда приде ко граду корабль, коковъ и от которава царства, повелитъ царь сторожамъ своимъ стеречъ, чтобы не ушель купецъ прочъ.

Дмитърей же купецъ, воздевъ упование на Бога и въземъ дары великия, и поиде к царю, имя же царю — Несмеянъ Горды. И приде к нему купецъ Дмитрей, и ста пред царемъ, и рече: «Государь царь Несмеянъ Горды! Купчишка есми, пришель из греческия земли от преслаушаго Царяграда, чтобы, господинъ, дары принель, а мне, купчишку, во своемъ царьстве велель торьговать всякими товары!» И рече царь: «Завътре буди ко мне отобедать!»

Наутре же приде к царю обедать. Пообедовъши же, и рече царь купцу: «Купче, коея еси веры?» Купецъ же рече царю: «Я есми, государь, веры християньския, греческаго языка!» И рече царь: «Аз чаел, еси единыя веры со мъною! И аз хотель тебе датъ во своемъ царьстве торговатъ всякими товары и хотель тебе отпуститъ з дары и с проводники — ин ты со мъною не единыя веры! Купче, ведома тебе буди: отгодай мне три загатки. Аще ли отгадаешъ, — азь тебе повелю во своем царьстве торговатъ всякими товары, аще ли не отгадаешъ — и ты пребуди со мною в моей вере, аще ли не хочещъ со мною бытъ в моей вере, — и то тебе велю главу твою отсечи мечемъ своимъ, а товар твой взятъ в козьну!» Дмитре же купецъ ста на долги чась, пониче главу свою. И Несмеян царь рече: «Что царю не отвешаеш?» И, склонися, купецъ рече царю: «Государь царь Несмеянъ Горды! Дай же мне сроку на три дни!»