Том 7 (Вторая половина XV века, литература эпохи исторических размышлений)

Приде Дмитърей на корапль, плаче и рыдаетъ, чая на себе смерти от царя. А сынъ его игъраетъ на корабли на дьревце: единою рукою древца держитъ, а другою рукою по древцу бияше и седя, яко на кони, и скокаша по кораблю, якоже токовъ извычай детишенъ игру творяше. И видевъ отрок отца своево, плаче велми печаленъ, и абия отрокъ, отложивъ игру свою прочъ, и скоро притече ко отцу своему и рече: «Вижу тя, отче, вельми печаленъ! Что тебе прилучилося в граде семъ от царя?» И рече Дмитре сыну своему: «Чадо мое милое! Еще еси ты млатъ, семи летъ, и ты играешъ по-децъки, таво не ведоешъ отцовай печали! И не веселися, чадо милое, что мне царь смертъ скозал! И тебе, чадо мое, не пособитъ!» И рече отрокъ отцу своему: «Отча, скажи мне, кокую тебе царь смертъ скозалъ? И аз тебе пособлю» . И воздохнувъ из глубины серца своего, и рече купецъ сыну своему: «Как, чада милое, пособити, толику младу сущу? Мне, отцу своему, пособитъ не смыслишъ! Аз, чадо, отец твой — муж совершен, смыслю много, болши тебъ, — аше не знаю, что царю отвещати, — а ты, млат, хочешъ пособитъ!» И рече детища отцу своему: «Ведома тебе, отча, буди: удаль конъ познаваетца на рати, а веренъ друхъ у дела познаваеца! Токмо поведой мне, отча, слова царево! Аще не поведаешъ, — самъ от царя смертъ наведешъ и меня погубишъ!» Слышевъ же отецъ от сына своего мудрыя речи, подивися и рыдание свое утали, печаль свою на радостъ преложи, и рече отецъ сыну своему: «То мя печаль и рыданье — сказаль мне царь, велель пред собою 3 загатьки отгодатъ. И сихъ ради трехъ загадакъ кораблей множества купцевъ сидятъ въ темъницах и терпетъ великую муку и скорбь имене ради Христова! И заповедал царь, не велитъ хлеба на торгь печъ, дабы гладомъ мерли, аще ли кто не хочетъ, да обратились ево латынской вере! Азь, чадо, страха царева убояся, взялъ сроку на три дни, а в четверты денъ хочетъ главу отсечи мечемъ, а товар мой хочетъ взятъ в козьну!» И рече сынъ отцу своему: «Прости мя, Господи, и ты, отча, — скорби, и рыдания, и печаль — безумъных людей, а се ты, отча, тому жъ уподобися: хочешъ единъ печаль свою в себе удержатъ, а мне ты, сыну своему, не поведоешъ! И аз тебе, отча, пособлю и загатъки царевы отгадаю!» И взятъ отрок игру свою и начатъ игратъ.

И пришедше той четверьты денъ, приде купецъ к сыну своему и рече ему: «Сынъ мой! Четверты денъ, коего я у царя просил, пришель! Что велишъ глаголати пред царем?» И рече отрокъ: «Придемъ, отча, пред царя, и возми себе единаго раба да меня, да буди воля Господня! Якоже годна Господеви, тако и совершимъ!» Купецъ же Дмитрей подивися разуму ево и мудрому ево ответу, сына своего, и помыслиша в себе: «Что ся хощетъ быты!» И ста купецъ сыномъ своимъ и с рабомъ пред царемъ.

И рече царь купцу: «Купецъ! День твой пришель, коего ты просиль, — отгадывай загатки мои!» И рече сынь купцевъ: «Дай мне, царю, меду пить, — я тебе загатки твои отгадаю!» И рече царь детишу: «Не тебе аз загатки загадываю, но сему купцу!» И рече детиша: «Царь! Аз — купцевъ сынъ есми, — загатки твои за отца своего отгадаю!» Царь же, наливъ чашу меду, и дастъ детишу. Детише же дастъ отцу своему. Отець же, испивъ меду, хотя отдатъ чашу, и рече детише отцу своему: «Отча! Не довай царева даяния чашу, но скры в недры своя,[1074] понеже царева дояния не отходитъ въспятъ!» Отецъ же скры чашу вь недры своя. Царь же, наливъ вторую чашу меду, и дастъ детишу, детише же дастъ рабу своему, повелиша питъ, скрыти в недры. Рабъ же тако сотвориша повеления. Царь же, наливъ третью чашу меду, и дастъ отроку. Отрокъ, выпивъ, и скры чашу в недры своя. И рече детиша: «Царева даяния не отходит вьспятъ!» И рече царь отъроку: «Отроча! Тебе глаголю, отгадывай загатъку мою: много ли от востока до запода?» Отрокъ рече: «От востока до запода 12 часовъ, от запода до востока 12 часовъ, и всего тово во дни и в ночи от востока до запода 24 чеса!» И удивися царь младому ево разуму и мудрому ево ответу. И паки наливъ чашу меду, и дастъ купцу, и сыну ево, и рабу ихъ. Они же, выпивъ чаши, и скрыша в недры своя и рекоша: «Царево дояние не отходитъ вьспятъ!» И рече царь отроку: «Отроча! вторая загатка: от чего десятая частъ в мире пребываетъ и десятая часть убывает?» И рече царю отрокъ: «Аз твою загатьку отгадаю завътра, ась ты, царю, постави престоль свой среди двора своего и сиди на немъ!»