Том 7 (Вторая половина XV века, литература эпохи исторических размышлений)

Наутре же приде онъ купецъ с сыномъ своимъ и с рабомъ и ста пред царемъ и поклонишеся ему, и рече царь: «Млады отрокъ! Отгодывой мою вторую загатку: чесо днемъ десятоя частъ в миру убываетъ, а десятоя частъ в миру пребываетъ?» И рече отрокъ царю: «Государь царь, Несмеянъ Горды! То ли твоя мудроя загатка? У нась ети твои загатки младыя отроки, мне сверстники, промежъ собою загадываютъ и отъгадывают! То ли твоя, царю, загатъка? — Сонъце зноемъ высушаетъ десятою частъ воды в мори, и в реках, и в озерах. Понеже нощъ имеетъ в себе мокроту и росу впушаетъ в мори, и в реки, и в озеры, — и то десятая часть в мире прибываетъ ношъшию, — то тебе, царю, вторая загатка!» И удивися царь таковому ево разуму и многоразумному ево мудрому отъвету, — борзо токово смышленъ. И рече царь: «Отроча! Отгадывай третью загатьку: чтобы естъ окаяныя не смеялись поганы вамъ, провославным християном?» И рече отрокъ к царю: «Дай мне сроку на петь дней, а въ те 5 дней повели проповедникомъ своимъ по въсемъ торгамъ и по всему граду, чтобъ все шли к лобному месту, и ты повели себе сотворитъ на лобномъ месте выше всех людей место, чтобы глась твой быль слышитъ во все люди!» И дастъ ему царь сроку на пет дней, а в те пятъ дней, по велению его и по приказу, все устроили.

В шесты денъ сяди царь на высокое место, на престоле своемъ. И сбрашеся вси людия града того. Царь же на лобьном месте седя и держаше у себе в руце мечъ, а въ другой руце жезль, и хотя имъ отсечи главу купцу, и сыну ево, и робу их. И приде купецъ с сыномъ своимъ и с рабомъ их, и ста пред царемъ, и поклонишеся емудо земъли. И рече царь детишу: «Млады отрокъ борзомысленны! Отгадывай мою третью загатъку: чтобы поганыя не смеялись вам, провославънымъ християномъ?» И рече отрокъ: «Ты, царь, великъ еси, а сидишъ на высокомъ месте, и глась твой сходитъ во все люди слышитъ, — азъ я — отрокъ младъ, а се стою на земъли ниско, отгатъки моей никто не услышит, — соиди ты, царю, с высокова места своего, да пусти мене и дай мне одеяние свое, и жезль свой, и мечъ, — аз тебе отгадаю загатъку твою!» Слыше же царь, попы, и тироны, князи, и бояри, и вси людие: «Государь царь! Отрокъ есть младъ, что можетъ сотъворитъ?» Царь же сниде с высокова места своего и даде отроку одеяние свое, и жезль, и мечъ свой. Отрокъ же взыде на высокое место. Царь же помыслиша в себе: «Что будетъ?», — а того не ведает, яко Богъ дает царьствовати кому хощетъ, се и творитъ. И быстъ в народе шумъ великъ: всякъ хошет видитъ, что ся будетъ. Рече отърокъ: «Повели, царю, молчати!» И быстъ тишина великая. И возопи отърок великимъ гласомъ: «Попы, и тироны, князи и бояре, и вси людие, мужие и жены! В которою веру хошетя веровать? Во Светую ли Троицу: Отца и Сына и Светаго Духа, или в проклятою ельенскую веру?» И возопиша вси людие единымъ гласомъ: «Хошем, господине, вероватъ во Светую Троицу: Отца и Сына и Светаго Духа!» Отрокъ же извлекъ мечъ и отсече царю главу и рече себе: «То твоя третъя загатка отгадана! Не смейся, поганы, намъ, провославънымъ християном!»

И быстъ в мире молва велика, и рече отрок: «Миръ вамъ, провославнымъ християномъ!», — и все умолкоша. И паки рече отърокъ: «Изберитя себе царя от православныя веры!» И возопиша вси людие единым гласомъ, глаголаше: «Ты нас избавил от толикия веры и от злаго мучителя — ты намъ буди царь!» И рече отърокъ: «Коли есть изволиль Богь, и мне быстъ у вас себе царемъ! Царь же именуеца слуга Божиим изволением, и царьство бо ему даетца Божиемъ повелениемъ, и мы возьвеличим Господа и прославимъ Матер его, яко избавиль Господь отца моего, и мене, и раба нашего от латынъского сего мучительства и от толикия напрасныя смерти. И вась милостию своею посетил Богь, не отринуль вась от православныя веры, и вамъ подобаетъ славитъ Троицу Светую: Отца и Сына и Светаго Духа. Сие сотворил Божиемъ повелениемъ, а не нашим изволением: аще Богь с нами — никто же на ны!» И зкликнуша вси людие единымъ гласомъ, яко едиными усты глаголюше: «О Божи мудрости владыки много леты, государю нашему, царю Борзосмыслу Дмитреевичу!»