Том 7 (Вторая половина XV века, литература эпохи исторических размышлений)

Но понеже бо аще кто слугу царева почтитъ, но той от царя честь приметь. Но и аще ли кто самого царя почтитъ, но и болма той велицей чести и даромъ достоинъ есть. А князь же великий Борисъ Александровичь но и самого царя велико чтяаше Христа, но тако же и слугы его. Но и инъ храмъ устрои самому царю Христу на вратехъ Богомъ спасенаго града Тфери. И нарекова же имя храму тому еже «Вход въ Иеросалимь». Но тамо бо входъ Господу нашему Исусу Христу въ градъ Иерусалимь, и от детей еврейскыхъ велику почесть приимъ, но яко царемъ израилевымъ звахутъ его и «осанна в вышнихъ» вопиахуть ему, и понеже еще мнози не веровахутъ в него, и симъ же и ризи свои постилахутъ под ногами его по пути.[159] А зде же въсквозе той пречестнейший храмъ входъ сотворенъ въ богоспасеный градъ Тферь, но да всяк человекъ входяще и исходяще поклоняеться, но почесть велику и възмездие от Бога приимаше, и вместо ризнаго постиланиа но главы своя постилааше пред честнейшимъ темъ храмомъ и велегласно, яко единеми усты, въпиющимъ имъ и глаголющимъ: «Многа лета ти, великий князь Борисъ Александрович, но якоже таковый входъ устроилъ еси въ богоспасеный градъ Тферь! Но и великое спасение тобою приобретаемъ».

Но и слуги же почти царя Христа, святыхъ великихъ мученикъ, тезоименита же себе Бориса и брата его Глеба. И устрои имъ храмъ среди своего двора от камени белаго[160] и украси в немъ иконами, и златом, и жемъчюгомъ, и камениемъ драгымъ, и паникадилами, и свещьми, но и якоже было и при Соломоне въ Святая Святыхъ.[161] Ни умъ человечьи не дотечетъ, ни языкъ известовати тоя красоты не можетъ; но понеже земънымъ человекомъ в томъ храме стояти, якоже и на небеси мнетнся. Но и иная же премудрости и строениа великого князя Бориса Александровича,но кто изочтетъ, якоже и последняя скажемъ.

Но якоже изъмлада святая Писаниа добре ведый, понеже бо и Господь, запрещая, глаголаше: «Пытайте Писаний, но якоже в техъ жизнь вечную имате»,[162] но того бо ради великий князь Борисъ Александровичь всемъ сердцемъ пытаетъ Святого Писаниа. И въ строениихъ бо смысленый и славнейший въ всехъ земляхъ великий князь Борисъ Александровичь, но вдохновенъ же бысть милостию Спасителя Бога, и нача собе помышляти, и да бы где градъ создалъ, но собе памети достоинъ, но якоже и праотци его. И нача смотрити места, но якоже бы граду приходно быть. И усмотри же место близ града Тфери на устие на Тмацкомъ. Есть храмъ святого Христова мученика Феодора.[163] Но тол бо дивно место тое, но, въистинну, по желанию сердца великого князя Бориса Александровича. И далъ ему Богъ место таково, но никимъже ни копанно, ни сыпано. Но съ проста реку: но Богомъ съделанно, и якоже бы искони приходно граду быти, но не преспе ему время. И ныне же помощию Божиею и мыслию великого князя Бориса Александровича и съветомъ всехъ людей и нача великий князь Борисъ Александровичь велми любити место тое, и наипаче же видя толь пресловущь храмъ великого Христова мученика Феодора вне града стояща. И о томъ велико попечение имея, и да бы такий храмъ не вне града былъ, но въ граде. И того ради великий князь Борисъ Александровичь призываютъ ту суща святителя своего и вси свои поместнии князи и боляре, еще же и аръхымандриты и игуменыи. И повеле всемъ быти въ храме великого Христова мученика и воина Феодора. И ту повеле служити Божественую литоргию. Егда же свершену бывшю Божественому и великому делу, и тогда повели великий князь Борисъ Александровичь всемъ изыти на место тое, идеже хощетъ основати градъ. Но онемь же изсшедъшимъ съ кресты, и с свещами, и с кандилы, а князю же великому Борису Александровичю по нихъ идущу, и ту народу сущу многу. И егда же приидоша на мъсто то, и идеже хощетъ основатися градъ, и князь же великий Борисъ Алексанъдровичь въздвигнувый гласъ свой и велегласно нача глаголати ту сущему народу: «Мужи и братие, сынове рода тферскаго, но вамъ слово рку: како ми поручи Богъ престолъ отца моего, великого княжениа тферскаго, но оттоле и до и ныне велми въжелахъ и да бы где градъ създалъ, но якоже и праотци наши съставиша грады собе памяти достойны. Но не приспе ми время. И ныне же помощию Божиею и помощию святого великого мученика Христова Феодора и излюби ми ся сие место, и на семъ месте хощу основати градъ. Но хощу того якоже съвети мои, такоже и съвети ваши — утверждение вашему великому граду Тфери».