Том 7 (Вторая половина XV века, литература эпохи исторических размышлений)

Иное же похваляем святых, яко инех въздвигнути хотяще къ зелному тех преизящьству и любве еже къ Богу. Сихъ бо похвалъ послушающим и Богови вниманиемъ тех внимающих и отсюду приходящим боголюбезных и в самехъ тех повестей произволяющим пребытокъ обилный и много мздовъздание, паче же помышляюще: «Такови они человеци беху, якоже и мы, и подобострастни прочим человеком, но не бяше тех произволение, якоже прочим человеком». Но вместо телеснаго покоя изволиша зелныя труды и болезни, и вместо сна всенощное стоание, и вместо веселиа радостнотворный плачь, и вместо человечьскых молвъ выину съ Богомъ беседование. И к Нему, якоже по некыих степенех, дьнь от дьне приближающеся, и глас всегда тех бяше: «Готово сердце мое, Боже, готово сердце мое!».[248] Не бо ти уклониша сердце свое въ словеса лукавствиа, ниже елей грешникъ техъ помаза главы, но бяху ревнующи онем древним Богу угодившим мужем, ходивъшим въ овчинах и козияхъ кожах, по вся дьни лишаеми, скорбяще, злостражюще, в пустынях скитающеся, въ горах и вертьпах, в пропастех земных Господеви работающе и въ своихъ удехъ Господа прославляюще. Темже и Богъ тех прослави, якоже пишет: «Прославляющаа Мя прославлю».[249]

Отнуду же иже въистинну ныне похваляемый нами всесветлую вину настоащаго слова предлежить. Днесь основанию начало приати хощетъ — иже сихъ ревнитель достохвалный Кириилъ да глаголеться.

Помыслит же кто, яко иныя ми земли суща и не ведяще опасно яже о святем. И въправду, не бо своима очима видехъ того блаженнаго, ниже пакы что таковых бываемое, но, еще ми сущу далече, слушах о святем, колика чюдеса творить Богъ его ради, — зело удивихся. И сего ради, овогда повеленъ бывъ тогда самодръжцем великым княземъ Василием Василиевичем[250] и благословениемъ же Феодосиа митрополита всеа Руси[251] приити въ обитель святаго и тамо своими ушесы слышати бывшая и бывающая чюдеса от богоноснаго отца, темьже и великъ труд подъемъ далечяйшаго ради растоаниа местом. Но понеже усердиемъ и любовию еже къ святому, якоже некыим ужемъ длъгымъ, влеком, путь преидох и обитель святаго достигъ.

Видехом тамо настоателя тоя обители Касиана именем,[252] достойна игуменом глаголатися, мужа, от многых лет въ трудех постничьскых състаревшася. Сей убо множае начат ми глаголати нечто о святем написати, бяше бо велию веру имея къ блаженному Кирилу, иже самовидець бяше блаженаго и многым его чюдесем сказатель ми истинный бысть. Обретох же тамо и иных многыхъ от ученикъ его. Яко столпи непоколебимии въистинну пребывающе, иже многа лета живше съ святым, въ всем ревнующе учителю своему, якоже научени бывше отъ него. И ничтоже предела отечьскаго не разорися от них, но тако пребывающе бяху благодатию Христовою в постех и в молитвах и бдениихъ, безмолствующе: якоже видяше отца творяща сиа, тщахуся собою и делы исправити, якоже бы рещи: «Сии — род ищущих Господа и ищущих лице Бога Иаковля».[253] Паче подобно глаголати: «Сии — древеса доброплодна, ихже насади Господь Богъ нашь».[254] И бяше видети образъ техъ житиа доволенъ и кроме писаниа къ извещению тех добродетелей.

Ихже азъ въпросивъ о святем, начаша беседовати ко мне о житии святаго и о чюдесех, бывающих от него: овъ — сиа, ини же — подобна тем. И на многы различны части глаголанна бе святаго действиа. Елма же азъ слышавъ от самовидца того житиа паче же достовернейшая отъ самого того ученика Мартиниана именем,[255] бывшаго игумена тезоименитнаго манастыря, Сергиева зовома, иже от малаго възраста живша съ святым Кирилом, иже ведый известно о святем. Съй по ряду сказаше мне о нем, ихже слышавъ, зело удивихся.

Темьже желаниемъ и любовию еже къ святому множае огня разждигаем, аще и грубъ сый, не наученъ внешней мудрости, но понеже понуженъ бывъ и разсудивъ, яко неподобно святаго чюдесем по разньству глаголатися, и сиа вся, елика слышах, въедино събравъ и помощи убо Божиа прося, святаго же и приснопамятного отца боговещателных молитвъ надеяся, по достижному къ иже по Бозе живущим истине дателем опасним, руку прострох къ повести, яко да не умолчано будет праведное и да не забвению глубине предано будет иже пред многыми леты бывшее, но на общую всем преложится ползу хотящим слышати, якоже явить и ныне.

О РОЖДЕНИИ СВЯТАГО