Том 7 (Вторая половина XV века, литература эпохи исторических размышлений)

Съй убо преподобный отець нашь Кириилъ родися от благочестиву и христиану родителю. Крестиша и во имя Отца и Сына и Святаго Духа и нарекоша имя ему въ святемь крещении Козма. Устрабившу же ся отроку и божественому Писанию извыкшу, прочее растущу ему въ всяком благовеинъстве и чистоте и просвещеном разуме, и сего ради от всех любим бывает и почитаем. Таже иже посреде время преиде, и родителя его, земная оставльше, к Господу отходят, того же предиреченнаго Козму, сына своего, предавше сроднику своему Тимофею именем.[256] Бяше бо тъй предиреченный Тимофей околничий у великого князя Дмитреа, богатьствомъ и честию паче инех превосходя тогда, Сему бо яко сроднику своему вручает сына своего, еже пещися и промышляти яже о нем. Богъ же, иже сирым отець и скорбящим утеха, свыше зряше, проведый же напоследокъ хотящаа быти от него и яже имяше въ серци добродетель.

Прежереченный же Козма, о немже нам слово, яко виде родителя своа къ Господу отшедша, въ мнозе размысле бяше и недоумеяшеся, что сътворити. Желаше же и въ иноческая одеатися, но никтоже смеаше руковъзложение сътворити о нем ради велможа оного. И тако бяше прилежа къ церкви Божии, постомъ же и молитвами преспевая. Видев же предиреченный Тимофей тако въ благых преуспевающа, множае паче начатъ любити его за бывающую в нем добродетель, темже и зело радовашеся о немъ. Елма же доспевшу ему в муж съвръшенъ, сподобляет и седаниа на трапезе с собою, по мале же и на казначий бывает его имению.

Но онъ тако в мысли своей дръжаше, якоже и прьвее: како бы възмоглъ быти инокъ, — рачением же симъ и любовию къ Богу, якоже некым огнем распалаем. И сего ради в печали мнозе бяше о сем и никомуже тайну свою поведати смеаше, но тако въ уме си дръжаше и по манастыремъ отходя, где бы моглъ улучити желаемое ему иночьское пребывание. Но не мощно ему бяше от преждереченнаго велможа. Что же онъ? Аще и мирьская ношаше, но вся иноческая дела тому бяху; глаголю же постъ и молитва, и милостыня, и прьвее всех къ церкви хожение, конечное же и выше всех телесная чистота и незлобие, с неюже всякъ узрит Господа. Поминаше же слово, глаголющее: «Блажени чисти серцем, яко те Бога узрят».[257] Темьже и всем тогда и преже иночьскаго житиа инок познавашеся. Что же по сих?

Богъ, хотя желание оного Козмы исполнити, споспешьствова ему таковым смотрениемъ сице скончати ему иже от многых лет иноческаго образа желаниемъ образом сицевым.

О ПОСТРИЖЕНИИ СВЯТАГО

Случися убо приити Махрищьскому игумену Стефану,[258] мужу сущу в добродетели съвръшену, всем знаем великаго ради житиа. Сего пришествие уведевъ, Козма течеть убо с радостию к нему, много бо время преиде, отнелиже ожидааше его. И припадаеть къ честным того ногам, слезы от очию проливая, и мысль свою сказуеть ему, вкупе же и молить его еже възложити на нь иночьскый образъ. «Тебе, — рече, — о священная главо, от многа времени желах, но ныне сподоби мя Богъ видети честную святыню твою. Но молюся: Господа ради не отрини мене грешнаго и непотребнаго, подражавъ своего Владыку: Он бо не отрину, но приимаше грешникы — мытаря же и блудника. Темьже убо и ты мене приими грешнаго, якоже Онъ тех приалъ есть. Твоа бо, — рече, — и твоеа святыни дело се, аще въсхощеши». Сиа же и ина многа глаголющу и молящуся ему, и понеже игуменъ Стефан умилися о словесех его, видевъ толико усердие и плач, и от сего разумевше, яко съсудъ хощет быти Святому Духу, еже и бысть последи. Сиа же бяше Божиа смотрениа бываемое, но паче Оного промышлениа бяше дело.

Темьже и от слезъ велит ему престати, глаголя: «Престани, чадо. Якоже изволится Богови, тако и будет». И тако помышляше, како и коим образом възложити на нь иночьский святый образ и сътворити его инока. «Аще, — рече, — възвестим вышереченному Тимофею, но не попустит сему быти. Аще ли пакы и молим его, но не послушает нас». Умысли же и таковое, еже просто тако и несъвръшено възложити на нь иночьская, еже и сътвори.