Том 7 (Вторая половина XV века, литература эпохи исторических размышлений)

И възложив бо на нь иночьское одеание, и нарече имя ему Кирил, прочее же на Божии воли остави. И тако сему бывающу, приходит предреченный Стефанъ к Тимофею оному, тому же от мирскых молвъ опочинути хотящу в полудне. Пришедшу же Стефану къ дверем и тлъкнувшу, възвещено бысть Тимофею приход Стефановъ. Имяше же велию веру къ Стефану игумену, и яко прииде Стефан, въставъ Тимофей и поклонися ему, благословениа прося. Елма же к сим игуменъ Стефан: «Богомолець вашь Кириилъ благословляет», — рече, оному же въпросившу от именованиа, и «Кто есть Кириил?» — глаголаше. Игуменъ же отвеща: «Козма, — рече, — бывший слуга вашь. Ныне же ему изволися быти иноку, Господеви работати и о вас молити». Онъ же, яко услыша, тяжко си внят слово, вкупе же и скорби исполнився и некая досадителная изрекъ словеса Стефану. Стефанъ же игуменъ, стоя, рече: «Повелено ны есть от Спаса Христа: “Идеже аще приемлютъ вас и послушают, ту пребывайте, а идеже не приемлют вас ниже послушають, исходяще оттуду, и прахъ ихъ прилепший от ногъ ваших отрясайте пред ними въ сведетельство им”».[259] И тако Стефанъ прочее отиде, ничтоже ино глаголавъ.

Жена же того Тимофея, Ирина именем, благочестива и боящися Бога, тяжко си внят Стефаново, паче же Христово, слово. Начят мужа своего увещавати, яко такова мужа оскорби, паче же поминаше реченное тем слово. Мужь же ея раскаявся о словесех, глаголанных къ Стефану, ведый его мужа свята. Темже и въскоре посылаеть възвратитися к нему. Тому же пришедшу, Тимофей прощениа прошаше, вкупе же и Стефанъ прощение приносяше. И сему тако бывающу, и Козму, нареченнаго Кириила, остави на своей воли быти ему, якоже хощеть. И тако Стефанъ отиде, радуяся, яко приобрет брата.

Пришедшу же ему, възвещает Кириилу вся, елика сътвори Богъ о нем. Тогда Кириилъ свобод от всех бывъ, радуяся бяше, хвалениа велия Богу исповедуеть и Пречистей Его Богоматери, отнудуже и Стефану благодарение велие въздааше. Темже и вся, елико имеаше, расточи и дасть убогым и ничтоже себе остави ради телесныа нужда. Не помянувъ ктому ни старости, ни продлъженых лет живота, но от всех нагъ бывъ, никоеяже споны имея, ниже попечение, по Глаголющему: «Не пецитеся о утренем».[260]

О ПРИШЕСТВИИ СВЯТАГО НА СИМОНОВО[261]

И сему тако бывающу, отходит игуменъ Стефанъ в монастырь Пречистыя Успению на Симоновъ нарицаемо, поим съ собою Кириила. И тако предасть его въ руце архимандриту тоя обители Феодору именем,[262] мужу велику въ добродетели и в разуме. И ту абие Феодоръ приемлет его с радостию и тако постризает его съвръшено и дасть ему то же наименование Кириилъ.

Бяше же тогда имеа житие в монастыри том некто Михаилъ,[263] иже последи бысть Смоленьску епископъ, мужь велико житие по Бозе преходя въ молитвах и въ посте и бдениихъ и въ всяком въздержании. Сему бо Кириил ученикъ Феодором врученъ бывает. Сего видевъ, Кириилъ възревнова добродетелному его житию и всем умом повиновашеся ему. И опасно зряше того в молитвахъ протяжное, безъгневное же и въ трудех любомудрое житие, видевъ же того безмерныа труды, тщащеся собою вся та исправити. И тако бяше старцю повинуяся въ всемъ, и сице с постом вменяше наслаждение, и въ зимное время наготу вменяше теплоту, и тако великым въздръжаниемъ всякым томяше плоть свою, по реченному: «Плоть изнуряа, душю же просвещая». Сна же мало нечто приимаше, и сиа тому седящу. Моляше же и старца чрез два или три дни ясти, но не попусти ему старець, но повеле ему съ братиами хлебъ ясти, и сиа не до сытости. Егда же старець в нощи Псалтырь чтяше, сему повелеваше поклоны творити, и сие многажды бываше до времени клепанию.[264] В соборе же тщашеся прьвее всех обрестися на пении.

Глаголють и сии, яко внегда стояти оному Михаилу нощию на своемъ обычнем правиле, с нимъ же и святому Кириилу стоащу. И егда случашеся старцю Михаилу ис келии изыти, тогда многыми виды преобразующася диавола видяше Кириилъ, странными некими и страшными образы хотяще святаго устрашити. Но Исусовымъ званиемъ сии без вести бываху. А иногда же Михаилу сущу съ ним в келии на правиле, слышашеся отвне тутьны некиа и толкание въ стену. Но обаче силою крестною по молитве без вести бывааху.