Том 7 (Вторая половина XV века, литература эпохи исторических размышлений)

По обхождении же многых местъ, последи приидоша на место, идеже ныне манастырь стоит. И абие позна святый прежде указанное ему место и взълюби его зело. И сътворивъ молитву, и рече: «Се покой мой въ векы века. Зде вселюся, яко Пречистая изволи его. Благословенъ Господь Богь отныне и до века, иже услыша моление мое». И тако крестъ въдрузивше на месте, и благодарный канонъ отпевше в похвалу Пречистые Владычице нашея Богородици и Приснодевыа Мариа. Тогда убо блаженый Кириилъ вся явленна сътворяеть спутнику своему Ферапонту, — како Пречистая явися ему еже въ древней обители и глас, бывший къ нему, еже изыти отъ древняа обители и в сиа места приити. «Еже и не погрешихъ, — рече, — помощию наставляем Пречистыа Богородица». Ферапонтъ же услыша, и оба прославиша Бога и Пречистую Его Матерь.

И тако нача копати келию въ земли, а прьвее сень потыкше. И тако сему бывающу, и время некое препроводивше вкупе. Но не съгласни бяше обычаи в них: Кириилъ бо тесное и жестъкое хотяше, Ферапонтъ же пространное и гладкое, и сего ради другъ от друга разлучашеся: блаженый же Кириилъ остася на месте том, Ферапонтъ же отиде прочее оттуду — не далече, но яко 15 поприщь или нечто мало множае, и обретъ место тамо близъ езера Паское зовомо, и ту вселися, и церковь създа тамо во имя Пречистыа Владычица нашея Богородица и Приснодевы Мариа, честнаго ея Рожества. Събраша же ся и братиа к нему. Есть же монастырь на месте том зело красенъ, много имуще братий, Господеви работающихъ, даже и до сего дне. Темже и монастырь онъ прозвася Ферапонтовъ даже и доднесь.

Место же оно, идеже святый Кириилъ вселися, боръ бяше велий, чаща, и никому же ту отъ человекъ живущу. Место убо мало и кругло, но зело красно, всюду, яко стеною, окруженно водами. Глаголють же тако, яко тамо живша земледелца некоего Исайю именемъ близ места того, идеже ныне манастырь есть Пречистыя. Пред многыми леты пришествиа святаго Кириила звонъ велий слышашеся от места того. Пред пришествием же святаго не токмо звонъ слышашеся от места того, но яко и певци поюще бяху. Сие же не единому Исайе звонни и гласи слышахуся, но и многим окрестъ места того живущим. Темже и прихождааху мнози въ время звона, хотяще известно уведети, откуду звони и песни. Но сиа ушесы слышаху, и очима же ничтоже можаху видети, но токмо дивляхуся и не просту быти вещь познаваху.

Святый же, якоже преже рехом, ископа келию в землю и в ней подвизашеся противу невидимаго врага кознем. И прихождаху к нему два христианина, въ окрестъных местех святаго живуще: Авъксентие именемъ, прозванием же Вранъ нарицаем, другый же Матфей, Кукосъ нарицаем, иже последи бысть пономарь[275] тоя обители. Ходящу же святому по той пустыни, и темъ двема человеком с ним, ненавидяй же добра врагъ, ведый, яко оттуду изгнанъ быти хощеть святым, и сего ради на нь подвизается, наложи бо сонъ таковъ святому, яко и стоати от сна не могущу и хотяше мало възлещи. Рече же къ сущим с ним человекомъ: «Пождита вы ту, дондеже мало усну». Они же не оставляху его, глаголюще: «Иди въ келию свою и тамо покой приимеши». Он же, не могый братися, побежаем сном, но видевъ место таково къ упокоению сну, възлеже мало поспати. Уснувшу же ему толико, абие слышить глас, напрасно глаголющь: «Бежи, Кирииле!» Онъ же, отъ необычнаго гласа въспрянувъ, прочее от места отскочи. И абие въ том часе вражиимъ наветомъ древо велие падеся и удари въпрекы место, на немже святый лежаше. Разумевъ же святый диавольское наветование быти, темже яко добръ и съвръшенъ подвижникъ истинне моляше Господа и Пречистую Его Матерь еже отъяти сонъ от него, еже и бысть, многащи бо день и нощь без сна пребывая, яко мощи до конца победити безсониемъ съпротивным. Диаволъ же виде, яко ничтоже възмогоша ухищрениа его, сего ради яко посрамленъ прочее отиде множае побеженъ, нежели победивъ. Сиа убо о сем тако.

По семъ же святому лесъ посекшу и место отребившю и въ едино събравши хврастие оно, мысляше бо зелие некое насеяти, заеже быти скудно место бяше и пусто. И тако хврастие оно зажегшу, но и тако диаволъ не преста, ратуя на святаго: ветру велию бывшу, и дыму съ пламенем отвсюду святаго окружившу, и от дыму не ведущу, камо бежати. И абие видит некоего человека въ образе предреченнаго Матфея Кукоса, имша за руку, глаголюща ему: «Иди въслед мене!» И абие изыде ничимже не вреженъ бывъ, но съхраненъ помощию Владычица нашеа Богородица.