Том 7 (Вторая половина XV века, литература эпохи исторических размышлений)

В манастыри же и в келии ничтоже не веляше имети, ниже своимъ звати, но вся общая, по апостолу, имети,[278] яко да сего ради не раби будем темъ, ихже нарицаемъ. Сребряно же или златое весма отинуд не именовашеся в братии, кроме манастырьскыя ксенодохиа, сиречь казны. Оттуду вся к потребе братиамъ имяху. Жаждею же кто одръжим бываше, в трапезу идяху и тамо съ благословениемъ жажду устужаху. Хлебъ же и вода или ино что таково в келии никакоже обреташеся, ничтоже бяше в келии видети разве иконы. Но тако попечение токмо имуще — еже другъ друга смирением и любовию превъсходити и первее на пение въ церкви обрестися. Тако и на дело манастырьское, идеже аще прилучаашеся, съ страхом Божиим отхождааху и бяху работающе не яко человеком, но Богови, или пред Богом стояще. Не бяше в них никоего празднословиа или мирьская пытати или глаголати, но яко кождо ихъ молча съблюдааше свое любомудрие. Аще же кто и глаголати хотяше, но ничто ино, разве от Писаниа, на ползу прочиимъ братиам, паче же иже Писаниа не ведущим.

Много же бяше различие и устроениа тех житиа, комуждо бо от братии образъ же и меру правилом блаженый даяше. Умеше рукоделие делаху, в казну отношаху. Себе же ничтоже без благословениа не делаше. Вся бо от казны, якоже и преже рехом, имяху — одеаниа же и обуща, и прочая же к телесней потребе. Сам же святый отинуд ненавидяше видети на себе некую лепоту ризную, но тако просто хождааше в ризе раздранней и многошвене.

И моляше же всех и запрещааше не имети отинуд свое мудрование и готовым быти ко всякому послушанию, да тако плод Богови приносится, а не своей воли.

Бяше же се обычай блаженаго Кирила: по отпении заутреняго славословиа и по своем обычнем правиле приходити в поварню видети, кое братиам будет утешение. Моляше же и служителя блаженый, да елико мощно делати къ братскому упокоению. Иногда бо и сам способъствоваше имъ своима рукама к тех учрежению и тако всякыми виды упокоение братиамъ готовляше. Мед же или ино питие, елика пианства имут, никакоже в манастыри обретатися повеле. И тако блаженый симъ уставом змиеву главу пианства отреза и корень его прочее исторже. Устави же не токмо же при своем животе меду и иному, елика пианства имуть, не быти, но паче и по своем преставлении таковым не обретатися заповедавъ.

И се убо бяше блаженаго удивленна достойно Божие дарование, яко николиже от усердиа можаше слез удръжати, егда служаше божественую литоргию, тако и въ чтениихъ, егда чтяху или сам чтяше, наипаче же въ своем келейном правиле. От сего убо бяше познати, колико усердие и веру имяше къ Богу.

Бяше же таково, егда неции недостатки случаашеся в монастыри, братиа понуждаху послати святаго к некыим христолюбцем еже просити у нихъ на потребу братиам. Он же никако сему не веляше быти, глаголя: «Аще Богь и Пречистая забудеть нас на месте сем, въскую есмы в жизни сей?» И тако братию утешааше и учаше еже у мирьскых не просити милостыня.

Бяше некто святаго ученикъ, Антоние именем, великъ сый по Бозе житием и разсужение имея въ иночьскых и въ мирскых. Сего убо блаженый Кирилъ единою летом посылаше купити еже к телесней потребе братиам — рекше одеждю и обущу, масло же и прочая. Ктому же из монастыря не исхождаху, аще не некая нужда прилучашеся. Аще кто от мирскых присылаше милостыню, яко от Бога та посланая приимаху, благодаряще Бога и Пречистую Его Матерь.

Прииде же княгини благочестиваго князя Андрея,[279] егоже и отечьство бяше место то, Агрепина именем.[280] И та благочестива и милостива зело, веру имяще къ иноческому образу, паче же къ блаженому Кирилу, и хотяше братию учредити рыбными снедьми. Но святый не повеле рыбы ясти в пост Великый. Княгини же, яко благочестива, и моляше его, яко да простит братию ясти рыбу. Он же никакоже попусти ей, глаголя: «Аще сице сътворю, то сам азъ уставу манастырьскому разорител буду по реченному: “Еже съзидаю, сиа самъ и разоряю”. Паче же имуть и по моем преставлении глаголати, яко Кирилъ повеле в пост рыбу ясти». И сиа убо святый творяше, да никакоже разорится манастырьскый обычай, паче же уставлено от святых отець. Княгини же, учредивъ братию постными снедми, и отиде прочее в домъ свой, и святаго крепкое в подвизе похваляа.

Некый же братъ, Феодоръ именем, еже си живый далече растоаниа местом обители святаго Кирила, елма же слышалъ бяше от многыхъ яже о святемъ, и прииде в монастырь, и молить святаго же съжительствовати ему. Святый же приатъ его и съ братиами причте, и живяше некое время съ братиами. Ненавидяй же добра диаволъ сему брату Феодору възложи ненависть на святаго. Елико прьвее веру имяше къ блаженому, толико последи начат его ненавидети, елико не мощи поне видети его, ниже гласа его слышати. И тако онъ братъ мыслию побежаем, приходит къ предреченному старцю Игнатию и свою мысль ему сказуеть и ненависть, юже имяше къ святому, и яко: «Хощу, — рече, — от обители изыти». Старець же крепляше его, глаголя: «Терпи, брате, понеже от врага есть бываемое тебе». Брат же утешився, послуша старца и рече: «Се пожду едино лето, аще переменится старець къ мне».