Том 7 (Вторая половина XV века, литература эпохи исторических размышлений)

По сем же, аще некогда недостатци некако бываху въ обители, но братиа ничтоже смеаху глаголати святому о семъ, видяще вси: еже просит у Бога и изъобилно приемлеть.

Иногда же келиам загоревшимся в монастыри том, братиамъ не могущим утолити, пламени възвышающуся и превъзношаашеся и вся купно обьяти. Святый же, взем честный крестъ, течяше тамо, идеже келиа горяше. И бяше ту некий мирянин, из града пришедше, иже видевъ святаго, скоро с честным крестом грядуща, яко посмияваяся святому бяше. Видяше, яко неутолимо все огнь обьятъ и угасити немощно. Святому же пришедшу и противу пламени с честным крестом ставшу и Бога молящу, и абие в том часе огнь, устыдився молитвы святаго, угасающи. Понашающа мирянина гневъ Божий постиже: вси бо уди тела его разслабешася. Познавше мирянинъ тъй свое съгрешение, — заеже святому поноси и сего ради пострада, и начатъ святаго съ слезами молити, прося от него прощениа. Святый же помолився о нем и честным крестомъ знаменавъ его, и прочее здрава сътвори, иже, повсюду проходя, и проповедаше святаго чюдеса.

Слышана же быша святаго преславная чюдеса не токмо въ окрестных местех монастыря святаго, но и далече суща, въ туждиихъ странах. Приидоша же и до князя Михаила Белевскаго. Князь бо Михаилъ пребысть съ княгинею своею, Марию именемъ, 8 лет, чада не имуще, и сего ради в печали велице бяху о своем безчадстве. Слышавше же о святемъ Кириле, яко вся, елика аще просить у Бога, приемлеть, темъже посылаеть некая два от боляръ своих ити къ святому и молити его, яко да помолить Бога и разрешить их неплодства. Святому же яко прозорливу и се паче не утаися. Яко приидоша от князя Михаила посланнии, и не поспевшимъ им от князя посланиа вдати, и рече имъ блаженый: «Понеже, чада, велик путь преидосте, трудившеся, но верую Богови и Пречистей Его Матере, яко труд вашь не вътще будеть. Князю же вашему дасть Богъ плод детородиа». Они же начаша дивитися, како се уведе, о немже они приидоша суть, но понеже познаша человека того Божиа быти, и посланиа давше от князя святому. Святый же повеле упокоити их от пути.

Тоя же нощи видить предреченный князь Михаилъ въ сне старца некоего светлоносна сединами украшена, три съсуды некыя дръжаща в руце своей и глаголюща къ князю: «Приими, еже просилъ еси от мене». Такоже тоя нощи и княгине Марии явися тем же образом, такоже и три съсуды некыя дасть ей. И възбнувъ же князь Михаилъ от сна своего, и размышляше от видениа сна своего, паче же о старце, явльшемся ему. И начат видение поведати княгине своей Марии, она же изъ устъ его слово въсхитивъ и рече, яко: «Мне таков же старець явися и три съсуды некыа дасть ми, и рекъ: “Приими сие, еже просила еси от мене”». И видевше же, яко съгласна видениа обоихъ быша, и назнаменаша день, в онже сиа обои видеша.

И сему убо тако бывающу, и триемъ днемъ уже минувшимъ, блаженый же Кирилъ отпущает посланныхъ боляръ от князя Михаила. Повеле же келарю дати тем полъдругаго хлеба на путь. Бяше бо мужей 8 пришедшихъ от князя Михаила. Рече же нмъ святый: «Идете с миром к пославшему вас князю и от нас благословение и благодарение въздадите. Рцете же ему се: еже просили есте, дасть вам Богъ. Прочее же не скорбите». Рекоша же они: «Отче, повели, да дадут нам хлебы и рыбу на путь, яко далече имамы путь шествовати, и места суть пуста, и не будеть намъ где купити хлебы». Святый же рече, яко: «Послах вам хлебъ дати на путь». Они же реша, яко: «Даша нам полъдругаго хлеба и мало рыбиць». Святый же рече: «Идете с миром, яко сиа доволна будеть вам, даже и до дому вашего изъобилуеть». И тако отидоша прочее, размышляюще о хлебе, где купят, путь бо ихъ бяше яко 20-мъ днем шествие или множае. Хлеба же, иже бе с ними, помышляху единаго дни имети пищу.

Прешедшимъ же им до прьваго обиталища, начаша варити нечто мало от рыбъ, иже святый дасть имъ. То егда бысть варено, тогда много бысть видети рыбъ. Седшим же им ясти, взяша полъхлеба оного и начаша ясти, ядоша и насытишася, и полъхлеба единаче бяше видети цела сущи. Такоже от рыбъ мало бяше варено, но святаго молитвами много паче изобиловаше. И тогда познаша истинну, реченную святымъ, и ктому бес печали бяху о пищи. И преидоша же многым днем путь шествиа дому своего, токмо едином полухлебъ изъядше, другый же целъ с собою имяху.

Яко приидоша къ князю и сказаша ему святаго словеса, пророчьскы реченная к ним, о немже пришли суть, яко: «Нам — рече, — не поспешившим вдати от вас посланиа, и рече к намъ святый: “Понеже, чада, великъ путь преидосте, трудившеся, но верую Богови и Пречистей Его Матери, яко дасть князю вашему плод детородия”». Сказаша же чюдо о хлебе, яко: «Полъдругаго хлеба повеле нам дати на путь и рече, яко: “Доволна вам сиа будуть, даже и до дому вашего изобилуеть”. И се убо единаго полъхлеба доволна быша в весь путь нами, другый же целъ имамы с собою. Рече же нам: “Идете къ князю вашему съ миром и рцете ему: еже просили есте у Бога, даруеть вам Богь. Прочее не скорбите”».